ەلباسىنىڭ "قامقورلىق" باستاماسى قامقورشىلار كەڭەسىنىڭ وتىرىسى بارىسىندا ەرەكشە قاجەتتىلىكتەرى بار بالالارعا، سونداي-اق قارت ادامدارعا ارنالعان ينفراقۇرىلىم قۇرۋعا باعىتتالعان ەكى باستامانى ىسكە اسىرۋ تالقىلاندى.
ەلباسىنىڭ تاپسىرماسىنا سايكەس "قامقورلىق" باستاماسى شەڭبەرىندە ەكى جىل ىشىندە قازاقستاننىڭ 8 وڭىرىندە ءاۋتيزمى جانە باسقا دا مەنتالدى بۇزىلىستارى بار بالالارعا ارنالعان تۇزەتۋ-دامىتۋ ورتالىقتارىن اشۋ كوزدەلگەن، وندا 18 جاسقا دەيىنگى بالالاردىڭ كۇندىزگى بولۋى، ولاردىڭ دامۋىنا ارنالعان جاعدايلار جانە وتباسىن قولداۋ قىزمەتىنىڭ جۇمىسى كوزدەلەتىن بولادى. ورتالىقتاردا الەمدىك دالەلدەنگەن پراكتيكالار نەگىزىندە بالالاردىڭ الەۋمەتتىك بەيىمدەلۋى مەن ومىرلىك داعدىلارىن دامىتۋ ءۇشىن ساباقتار وتكىزىلەتىن بولادى. بۇدان بولەك، بالالار مۇگەدەكتىگىنىڭ الدىن الۋ ماسەلەسىن شەشۋ ءۇشىن ەلىمىزدىڭ 17 وڭىرىندە پەريناتالدىق ورتالىقتار بازاسىندا ەرتە ارالاسۋ ورتالىقتارى اشىلماق.
زەينەتكەرلىك جاستاعى ادامداردى قولداۋدىڭ جۇيەلى شارالارىن دامىتۋعا جانە ولاردى قوعامعا تارتۋعا ەرەكشە نازار اۋدارىلعان. "بەلسەندى ۇزاق ءومىر" اتتى جاڭا باستاما ەلىمىزدىڭ 17 وڭىرىندە كوممۋنالدىق وبەكتىلەردىڭ بوس تۇرعان الاڭدارىندا بەلسەندى ۇزاق ءومىر ءسۇرۋ ورتالىقتارىن اشۋدى كوزدەيدى. اتالعان ورتالىقتاردا ەمدىك دەنە شىنىقتىرۋ، كومپيۋتەرلىك ساۋاتتىلىق، شاحمات ساباقتارى، وسكەلەڭ ۇرپاقتى، ونىڭ ىشىندە بالالار ءۇيىنىڭ بالالارىن قولداۋعا جانە پاتريوتتىق تاربيەلەۋگە باعىتتالعان الەۋمەتتىك باعدارلامالاردى ىسكە اسىرۋ كوزدەلەتىن بولادى. ورتالىقتاردا مەكەندەۋ قاراستىرىلماعان، تاماقپەن قامتاماسىز ەتىلەتىن كۇندىزگى بولۋ جوسپارلانعانىن ايتا كەتۋ كەرەك.
"ەلباسىنىڭ "قامقورلىق" باستاماسى اياسىندا جىلىنا 21 000 بالا ءۇشىن وڭالتۋ مەن كاسىبي سۇيەمەلدەۋگە قول جەتكىزۋ ۇيىمداستىرىلدى، بۇل سوڭعى ونجىلدىقتا ەرەكشە قاجەتتىلىكتەرى بار بالالار ءۇشىن ەڭ اۋقىمدى جوبالاردىڭ ءبىرى بولىپ تابىلادى", - دەپ اتاپ ءوتتى "قامقورلىق" باستاماسى قامقورشىلىق كەڭەسىنىڭ توراعاسى ءا. ءو. يسەكەشەۆ.
باستامالاردى نۇرسۇلتان نازارباەۆ قورى ۇكىمەت، "سامۇرىق-قازىنا "ۇاق" اق جانە وڭىرلەردىڭ اكىمدىكتەرىمەن بىرلەسە وتىرىپ ىسكە اسىرۋدا.
ەستەرىڭىزگە سالا كەتەيىك، ەلباسىنىڭ "قامقورلىق" باستاماسى اياسىندا 2020 جىلدىڭ جەلتوقسانىندا جىل سايىن 5 مىڭ بالانى قامتيتىن سەگىز وڭالتۋ ورتالىعى اشىلدى. اعىمداعى جىلى باستاما اياسىندا اقمولا، اقتوبە، الماتى، شىعىس قازاقستان، جامبىل، قىزىلوردا، ماڭعىستاۋ جانە تۇركىستان وبلىستارىندا قوسىمشا 10 ورتالىق قۇرۋ بويىنشا جۇمىس جۇرگىزىلۋدە.
