Elbasynyń "Qamqorlyq" bastamasy qamqorshylar keńesiniń otyrysy barysynda erekshe qajettilikteri bar balalarǵa, sondaı-aq qart adamdarǵa arnalǵan ınfraqurylym qurýǵa baǵyttalǵan eki bastamany iske asyrý talqylandy.
Elbasynyń tapsyrmasyna sáıkes "Qamqorlyq" bastamasy sheńberinde eki jyl ishinde Qazaqstannyń 8 óńirinde aýtızmi jáne basqa da mentaldi buzylystary bar balalarǵa arnalǵan túzetý-damytý ortalyqtaryn ashý kózdelgen, onda 18 jasqa deıingi balalardyń kúndizgi bolýy, olardyń damýyna arnalǵan jaǵdaılar jáne Otbasyn qoldaý qyzmetiniń jumysy kózdeletin bolady. Ortalyqtarda álemdik dáleldengen praktıkalar negizinde balalardyń áleýmettik beıimdelýi men ómirlik daǵdylaryn damytý úshin sabaqtar ótkiziletin bolady. Budan bólek, balalar múgedektiginiń aldyn alý máselesin sheshý úshin elimizdiń 17 óńirinde perınataldyq ortalyqtar bazasynda erte aralasý ortalyqtary ashylmaq.
Zeınetkerlik jastaǵy adamdardy qoldaýdyń júıeli sharalaryn damytýǵa jáne olardy qoǵamǵa tartýǵa erekshe nazar aýdarylǵan. "Belsendi uzaq ómir" atty jańa bastama elimizdiń 17 óńirinde kommýnaldyq obektilerdiń bos turǵan alańdarynda Belsendi uzaq ómir súrý ortalyqtaryn ashýdy kózdeıdi. Atalǵan ortalyqtarda emdik dene shynyqtyrý, kompıýterlik saýattylyq, shahmat sabaqtary, óskeleń urpaqty, onyń ishinde balalar úıiniń balalaryn qoldaýǵa jáne patrıottyq tárbıeleýge baǵyttalǵan áleýmettik baǵdarlamalardy iske asyrý kózdeletin bolady. Ortalyqtarda mekendeý qarastyrylmaǵan, tamaqpen qamtamasyz etiletin kúndizgi bolý josparlanǵanyn aıta ketý kerek.
"Elbasynyń "Qamqorlyq" bastamasy aıasynda jylyna 21 000 bala úshin ońaltý men kásibı súıemeldeýge qol jetkizý uıymdastyryldy, bul sońǵy onjyldyqta erekshe qajettilikteri bar balalar úshin eń aýqymdy jobalardyń biri bolyp tabylady", - dep atap ótti "Qamqorlyq" bastamasy Qamqorshylyq keńesiniń tóraǵasy Á. Ó. Isekeshev.
Bastamalardy Nursultan Nazarbaev Qory Úkimet, "Samuryq-Qazyna "UÁQ" AQ jáne óńirlerdiń ákimdikterimen birlese otyryp iske asyrýda.
Esterińizge sala keteıik, Elbasynyń "Qamqorlyq" bastamasy aıasynda 2020 jyldyń jeltoqsanynda jyl saıyn 5 myń balany qamtıtyn segiz ońaltý ortalyǵy ashyldy. Aǵymdaǵy jyly bastama aıasynda Aqmola, Aqtóbe, Almaty, Shyǵys Qazaqstan, Jambyl, Qyzylorda, Mańǵystaý jáne Túrkistan oblystarynda qosymsha 10 ortalyq qurý boıynsha jumys júrgizilýde.
