قاراعاندىدا 91 جاستاعى زەينەتكەردىڭ پاتەرىن توناعان قاراقشىلار ۇستالدى، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.
«27 مامىردا ساعات 2:30 شاماسىندا قاراعاندى قالاسىنىڭ پب تەمىرجول پوليتسيا بولىمىنە بەلگىسىز ادامدار 91 جاستاعى زەينەتكەر تۇرعان پاتەرگە باسىپ كىرىپ، ونىڭ بارلىق جيناقتارىن الىپ كەتكەنى تۋرالى حابارلاما ءتۇستى.
قىلمىستىق كودەكسىنىڭ 191-بابى (توناۋ) بويىنشا قىلمىستىق ءىس قوزعالىپ، جەدەل-تەرگەۋ توبى ىسكە كىرىستى. جابىرلەنۋشىنىڭ ايتۋىنشا، توناۋشىلار ەكەۋ بولعان. ولار زەينەتكەردىڭ پاتەرىنە ەسىك ارقىلى كىرگەن، قارت ادامعا قۇلىپتى اشىپ جابۋ قيىندىق تۋدىرعاندىقتان، ەسىكتىڭ سابىن ورىندىققا ارقانمەن بايلاعان. بەتتەرىن مەديتسينالىق ماسكالارمەن جاپقان قاسكۇنەمدەر، قاريانى قورقىتىپ، اقشا تالاپ ەتكەن. زەينەتكەر ولارعا بارلىق جيناقتارىن – 449 مىڭ تەڭگە بەرىپ قۇتىلعان.
پوليتسيا قىلمىستىڭ ىقتيمال كۋاگەرلەرىن انىقتاي وتىرىپ، وقيعا بولعان جەرگە جاقىن ورنالاسقان تۇرعىندار مەن گاراج يەلەرىمەن، سونداي-اق ءوتىپ بارا جاتقان ادامدارمەن سويلەسە ءجۇرىپ، كۇدىكتىلەردىڭ ىزىنە ءتۇستى.جەدەل-ىزدەستىرۋ ءىس-شارالارىن جۇرگىزۋ بارىسىندا كريمينالدىق پوليتسيا قىزمەتكەرلەرى كۇدىكتىلەردى – 26 جانە 27 جاستاعى ەر ادامداردى انىقتاپ، ۇستادى»،— دەلىنگەن حابارلامادا.
كۇدىكتىلەر ۇرلانعان اقشانىنىڭ ءبىراز بولىگىن جۇمساپ ۇلگەرگەن. وسى قىلمىستىڭ ەگجەي-تەگجەيىن انىقتاعاننان كەيىن قىلمىستىق ءىس قازاقستان رەسپۋبليكاسى قىلمىستىق كودەكسىنىڭ 192-بابى (قاراقشىلىق) بويىنشا قايتا سارالاندى.
قازىرگى ۋاقىتتا تەرگەۋ امالدارى جۇرگىزىلىپ جاتىر. كۇدىكتىلەر ۋاقىتشا ۇستاۋ يزولياتورىنا ورنالاستىرىلدى.
«ادىرنا» ۇلتتىق پورتالى
