شارىن شاتقالىنداعى سەلدەن الماتى قالاسىنداعى گيمنازيانىڭ مۇعالىمى مەن وقۋشىسى قايتىس بولدى. بۇل تۋرالى ءبىلىم مينيسترلىگىنىڭ ءباسپاسوز قىزمەتى مالىمدەدى، دەپ حابارلايدى «ادىرنا» ۇلتتىق پورتالى.
اقپاراتقا سايكەس، قالاداعى №199 گيمنازيانىڭ 8 وقۋشىسى شارىن شاتقالىنا ەكسكۋرسياعا شىققان. ولاردىڭ جانىندا 5 اتا-انا مەن 3 مۇعالىم بولعان.
«قايعىلى وقيعا سالدارىنان ءبىر وقۋشى مەن بەيىندىك ءپان مۇعالىمى كوز جۇمدى، تاعى ءبىر وقۋشىنى ىزدەۋ جۇمىستارى جالعاسىپ جاتىر»، - دەلىنگەن حابارلامادا.
ءبىلىم مينيسترلىگى قايتىس بولعانداردىڭ وتباسىلارىنا كوڭىل ايتتى.
«وقۋ جىلى اياقتالعان كەزدە مۇعالىمدەر مەن اتا-انالار ءوز ساپارلارىن جوسپارلاپ قويعان بولار. وسى رەتتە وزدەرىڭىزگە جانە بالالارىڭىزعا ساق بولۋدى سۇرايمىز. مۇمكىندىگىنشە اباي بولىپ، بالالارمەن دەمالۋعا نە ەكسكۋرسياعا بارعاندا، سۋ قويمالارىنا تۇسپەگەن ابزال. سونىمەن بىرگە قاۋىپتى ايماقتارعا جاقىنداماي، ءاردايىم بالالارىڭىزدىڭ جانىندا بولىڭىز»، - دەيدى ۆەدومستۆو.
"ادىرنا" ۇلتتىق پورتالى
