تۇركىستان وبلىسى سارىاعاش اۋدانىنا قاراستى ىنتىماق اۋىلىنداعى مەكتەپتە ەجەلەپ وقيتىن مۇعالىم تۋرالى ۆيدەوروليك بۇعان دەيىن الەۋمەتتىك جەلىلەر ارقىلى تاراپ كەتكەن بولاتىن. ورىس ءتىلى مەن ادەبيەتىنەن ساباق بەرەتىن ۇستاز قازىر بالا كۇتىمىنە بايلانىستى دەمالىسقا كەتكەن، دەپ حابارلايدى «ادىرنا» ۇلتتىق پورتالى azattyq-ruhy سايتىنا سىلتەمە جاساپ.
سادريددين ايني اتىنداعى №8 ورتا مەكتەپتىڭ ديرەكتورى گۇلسارا حاسانوۆانىڭ ايتۋىنشا، ەجەلەپ وقيتىن مۇعالىمدى جۇمىسقا ول ءوز ەركىمەن قابىلداماپتى. جاس ماماندى اۋداندىق ءبىلىم ءبولىمى جىبەرگەن.
«ول الدىمەن تەستتەن وتكەن، سوسىن ەكىنشى كەزەڭ – اڭگىمەلەسۋدەن وتكەن. ماعان دايىن جولداۋىمەن كەلدى. مەن جۇمىسقا الدىم»، - دەدى مەكتەپ ديرەكتورى.
ونىڭ ايتۋىنشا، مۇعالىم تەك العاش كەلگەن 2019 جىلى عانا وسىلاي ەجەلەپ وقىعان. قازىر ونىڭ ساۋاتىندا كىنارات جوق دەيدى. الايدا اتا-انالار مۇنىمەن كەلىسپەي وتىر. ينتەرنەتتە تاراعان ۆيدەو بىلتىر كارانتين ۋاقىتىندا تۇسىرىلگەن دەيدى ولار.
بەلگىلى بولعانداي، پەداگوگ جوو-دا ءوزى ساباق بەرەتىن ورىس ءتىلى مەن ادەبيەتىنەن مەملەكەتتىك ەمتيحاندى بەسكە تاپسىرعان ەكەن.
"ادىرنا" ۇلتتىق پورتالى
(فوتو otyrar.kz سايتىنان)
