Túrkistan oblysy Saryaǵash aýdanyna qarasty Yntymaq aýylyndaǵy mektepte ejelep oqıtyn muǵalim týraly vıdeorolık buǵan deıin áleýmettik jeliler arqyly tarap ketken bolatyn. Orys tili men ádebıetinen sabaq beretin ustaz qazir bala kútimine baılanysty demalysqa ketken, dep habarlaıdy «Adyrna» ulttyq portaly azattyq-ruhy saıtyna silteme jasap.
Sadrıddın Aını atyndaǵy №8 orta mekteptiń dırektory Gúlsara Hasanovanyń aıtýynsha, ejelep oqıtyn muǵalimdi jumysqa ol óz erkimen qabyldamapty. Jas mamandy aýdandyq bilim bólimi jibergen.
«Ol aldymen testten ótken, sosyn ekinshi kezeń – áńgimelesýden ótken. Maǵan daıyn joldaýymen keldi. Men jumysqa aldym», - dedi mektep dırektory.
Onyń aıtýynsha, muǵalim tek alǵash kelgen 2019 jyly ǵana osylaı ejelep oqyǵan. Qazir onyń saýatynda kinárat joq deıdi. Alaıda ata-analar munymen kelispeı otyr. Internette taraǵan vıdeo byltyr karantın ýaqytynda túsirilgen deıdi olar.
Belgili bolǵandaı, pedagog JOO-da ózi sabaq beretin orys tili men ádebıetinen memlekettik emtıhandy beske tapsyrǵan eken.
"Adyrna" ulttyq portaly
(foto otyrar.kz saıtynan)
