بەلگىلى جازۋشى احات جاقسىباەۆ ومىردەن ءوتتى

1309

بەلگىلى جازۋشى احات جاقسىباەۆ ومىردەن ءوتتى دەپ حابارلايدى «ادىرنا» ۇلتتىق پورتالى.

بۇل تۋرالى قر جازۋشىلار وداعىنىڭ وكىلى دۋمان رامازان Facebook-تەگى پاراقشاسىندا جازدى.

احات جاقسىباەۆ 1940 جىلى 5 شىلدەدە پاۆلودار قالاسىندا تۋعان. ورتا مەكتەپتى بىتىرگەن سوڭ 1958-1960 جىلدارى ەكىباستۇز قالاسىندا درەناجدى شاحتادا جۇمىس ىستەگەن.

1965 جىلى قازاق مەملەكەتتىك ۋنيۆەرسيتەتىن فيلولوگيا فاكۋلتەتىنىڭ جۋرناليستيكا ءبولىمىن بىتىرگەن.

1965-1967 جىلدارى “لەنينشىل جاس” (قازىرگى “جاس الاش”) گازەتىنىڭ ادەبي قىزمەتكەرى، ءبولىم مەڭگەرۋشىسى، 1972-1992 جىلدارى “جۇلدىز” جۋرنالىنىڭ جاۋاپتى حاتشىسى، 1993-1997 جىلدارى “قازاق ادەبيەتى” گازەتىنىڭ باس رەداكتورى، 1998-2000 جىلدارى “اقيقات” جۋرنالىنىڭ باس رەداكتورى قىزمەتتەرىن اتقارعان.
2001 جىلدان “جاس وركەن” بالالار باسىلىمدارى اكتسيونەرلىك قوعامىنىڭ پرەزيدەنتى.
2005 جىلدىڭ شىلدە ايىندا «جاس وركەن» اشىق اكتسيونەرلىك قوعامى «جاس وركەن» جاۋاپكەرشىلىگى شەكتەۋلى سەرىكتەستىگى بولىپ قايتا قۇرىلۋىنا بايلانىستى «جاس وركەن» جشس باس ديرەكتورى بولىپ تاعايىندالدى. 2007 جىلدىڭ اقپان ايىندا ءوتىنىشى بويىنشا قىزمەتتەن بوساتىلىپ، زەينەتكە شىعىپ، ەركىن شىعارماشىلىق جۇمىسقا كوشكەن.

ايتا كەتۋ كەرەك، ونىڭ “مەنىڭ دوستارىم” (1968),“قايىرلى تاڭ” (1970),“بوزارال” (1973) پوۆەستەرى، “ەگەس” (1975), “بوگەت” (1981), “قورعان” (1991), “قايتپاس قايسار” (2002), “يسا اقىن” (2010) روماندارى، “جانى جايسان جاقسىلار” (2006) اتتى ەستەلىكتەر كىتابى شىققان. گ.حاگگاردىڭ “مارگارت ارۋ” رومانىن، ر.مەدۆەدەۆتىڭ ء“ستاليننىڭ سەرىكتەرى” كىتابىن، ۆ.استافەۆتىڭ ء“ومىر وتكەلدەرى” پوۆەسىن قازاق تىلىنە اۋدارعان.

"ادىرنا" ۇلتتىق پورتالى جازۋشىنىڭ وتباسىنا، اعايىن-تۋىستارىنا قايعىرىپ، كوڭىل ايتادى.

«ادىرنا» ۇلتتىق پورتالى.

پىكىرلەر
رەداكتسيا تاڭداۋى