قوستاناي وبلىسىندا جىلقى اتقانى ءۇشىن اڭشىلار جەتى جىلعا دەيىن باس بوستاندىعىنان ايىرىلۋى مۇمكىن، دەپ حابارلايدى "ادىرنا" ۇلتتىق پورتالى. بۇل تۋرالى قر ءىىم رەسمي سايتى مالىمدەدى.
«27 قىركۇيەكتە جىتىقارا اۋدانى، اققارعا اۋىلىندا بەلگىسىز بىرەۋلەر جىلقى ۇرلادى. 63 جاستاعى جەرگىلىكتى تۇرعىن پوليتسيا بولىمىنە جۇگىنىپ، تەگىن جايىلىمدا جۇرگەن تابىندى ەسەپتەگەننەن كەيىن ءۇي يەسىنىڭ ءبىر باسى جوعالعانىن ايتتى. اۋداندىق پوليتسيا قىزمەتى ىزدەستىرۋ شارالارىن باستادى. ناتيجەسىندە اۋىلدان 12 شاقىرىم جەردەگى سايدان جانۋاردىڭ قالدىقتارى تابىلدى»، - دەلىنگەن حابارلامادا.
وقيعا ورنىن قاراۋ كەزىندە ولاردىڭ قىلمىس ءىزىن مۇقيات جاسىرۋعا تىرىسقانى انىقتالدى.
«جەدەل-ىزدەستىرۋ شارالارىنىڭ ناتيجەسىندە پوليتسيا قامىستى اۋدانىنىڭ ەكى تۇرعىنىن انىقتادى. 29 جانە 24 جاستاعى كۇدىكتىلەر - اڭشىلار جانە ازاماتتىق قارۋدىڭ يەلەرى. ءۇيدى تەكسەرۋ كەزىندە كۇدىكتىلەردە زاتتاي ايعاقتار - ۇرلانعان جىلقىنىڭ ەتى تابىلدى، - دەيدى جىتىقار پوليتسيا ءبولىمى باستىعىنىڭ ورىنباسارى الىبەك شادالينوۆ.
كۇدىكتىلەر تۇسىندىرگەندەي، ولار اڭشىلىققا شىعىپ، ءۇيىردى كورىپ، جانۋاردى اتىپ تاستاعان. كەيىن ولار سويىپ، ەتتى ۇيگە الىپ كەتتى. قازىرگى ۋاقىتتا قر قك 188-بابى (مال ۇرلىعى) بويىنشا سوتقا دەيىنگى تەرگەۋ جۇرگىزىلۋدە، باپتىڭ سانكتسياسى بويىنشا 7 جىلعا دەيىن باس بوستاندىعىنان ايىرۋ جازاسى قاراستىرىلعان.
«جىتىقارا پوليتسيا ءبولىمى قىلمىستى اشۋعا ۋچاسكەلىك پوليتسيا ينسپەكتورى مارات يۋسۋپوۆ، كريمينالدىق پوليتسيا ءبولىمىنىڭ باستىعى تولەگەن كاەرلاپوۆ جانە اعا جەدەل ۋاكىل دجامبۋل تاپاەۆ قاتىسقانىن ءتۇسىندىردى»، - دەلىنگەن حابارلامادا.
"ادىرنا" ۇلتتىق پورتالى
