ءماجىلىستىڭ ەڭ جاس دەپۋتاتى ءمادي احمەتوۆ وسىعان دەيىن ەلباسىنا ەسكەرتكىش قويۋ تۋرالى پىكىر بىلدىرگەن بولاتىن. بۇل ۇسىنىسىنان كەيىن حالىقتىڭ سىنىنا دا ءىلىندى. الايدا احمەتوۆ بۇل ويىنان اينىماعانىن ايتتى، دەپ حابارلايدى «ادىرنا» ۇلتتىق پورتالى.
«مەن ءالى كۇنگە دەيىن ەلباسىن سول ۇسىنىسقا (ەسكەرتكىش ورناتۋ - اۆتور) لايىق دەپ ەسەپتەيمىن. بۇل - مەنىڭ جەكە ازاماتتىق ۇستانىمىم. ەلباسى - الەم بويىنشا مويىندالعان ساياساتكەرلەردىڭ ءبىرى جانە بىرەگەيى. كورشىلەس جاتقان قىرعىزستان مەن تاجىكستان ەلدەرىندە شەكارا داۋىنا بايلانىستى قاقتىعىستار بولىپ جاتىر. قۇدايعا شۇكىر، بۇنداي ماسەلە ءبىزدىڭ ەلدە جوق. كەزىندە نۇرسۇلتان نازارباەۆ پرەزيدەنت بولىپ تۇرعان كەزدە شەكارا ماسەلەسىن تولىقتاي شەشكەن. مىنا ءبىز وتىرعان نۇر-سۇلتان قالاسىن دا ەلباسى تۇرعىزعان. نۇر-سۇلتان قالاسىن ەلباسىنىڭ باستاماسىمەن كوتەرىلگەن مەگاجوبا دەپ بىلەمىن. ەلباسىنىڭ جاساعان ەڭبەگىن ەشكىم جوققا شىعارا المايدى دەپ ويلايمىن»، - دەدى ءمادي احمەتوۆ نۇرسۇلتان قۇرمانعا بەرگەن سۇحباتىندا.
"ادىرنا" ۇلتتىق پورتالى
