پەنتاگون ورتا ازيا ەلدەرىن ءوزىنىڭ ىقپالىنا الىپ، اسكەري بازالارىن سالۋعا ارەكەتتەنىپ جاتىر. اق ءۇي اكىمشىلىگى وسى ۇلكەن شاراعا ارنايى قارجى ءبولىپ وتىر. اقش قازىر الەمنىڭ 20-عا جۋىق ەلدەرى مەن تەڭىز جاعالاۋلارىندا ءوزىنىڭ اسكەري تەڭىز پورتتارىن سالۋمەن اينالىسۋدا. قازىر ورتالىق ازيا رەسەي مەن اقش-تىڭ، قىتايدىڭ گەوساياسي تارتىسىندا تۇرعان ايماق سانالادى.
قازاقستان دا ءوزىنىڭ سىرتقى ساياساتتا بالانسىن ساقتاپ كەلەدى. كەشەگى ەاەس جيىنىندا پرەزيدەنت توقاەۆتىڭ رەسەيگە قاراتا نىقتاپ ايتقان سوزدەرى كوپ نارسەنى اڭعارتادى. ءبىزدىڭ باسشىلىق تا الداعى ۋاقىتتا ورتالىق اازيا اۋماعىندا بولاتىن گەوساياسي وزگەرىستەردىڭ بەتالىسىن بولجاپ، ءپىشىپ وتىر. ال، رەسەي تاراپى بولسا، جانتالاسىپ، ءوزىنىڭ ىعىنان ەشكىمدى شىعارماۋعا بارىن سالىپ، ەاەس-ءتىڭ جيىنىن وتكىزىپ، باعۋدا.
سوڭعى كەزدە رەسەي مەن قازاقستاننىڭ اراسىندا باسقا دا ەكونوميكالىق تەتىكتەردى قالىپتاستىراتىن وداق جۇمىس جاساۋى مۇمكىن دەپ وتىر ساراپشىلار. بۇل اقش-تىڭ ورتا ازيا اۋماعىنا مىسىقتابانداپ ەنىپ كەلە جاتقانىنان سەسكەنگەن رەسەيدىڭ جانتالاسقان ارەكەتى. رەسەي قايتكەندە دە قازاقستاندى ءوزىنىڭ ىقپالىنان شىعارعىسى كەلمەيدى. رەسەيدىڭ ەڭ باستى كيسلورودى دا وسى قازاقستان. قازاقستان ىقپالىنان شىعىپ كەتسە، رەسەيدىڭ قابىرعاسى سوگىلىپ كەتۋى مۇمكىن.
پەنتاگوننىڭ سوڭعى شەشىمدەرىنە كوز جۇگىرتەر بولساق، الداعى ۋاقىتتا قازاقستان مەن وزبەكستاندا ءوزىنىڭ اسكەري بازالارىن سالۋعا رۇقسات الىپ، لوگيستيكالىق، ينفراقۇرىلىمدىق جوبالار مەن اسكەري دوكترينالىق قىزمەتتەردى ىسكە اسىرماق. اقش قازىر بارلىق ينجەنەرلىك كورپۋستارىن دايىنداپ قويىپتى.
الداعى ۋاقىتتا ورتالىق ازيادا گەوساياسي جاعداي كۇرت وزگەرۋى دە مۇمكىن. قازاقستاننىڭ سىرتقى ساياساتتاعى بالانستى ۇستاي بىلگەن ساياسي پوزيتسياسى دا وسىندايدا ازداپ بولسىن كومەگىن تيگىزەدى دەپ ويلايمىن.
بەكبولات قارجان،
"ادىرنا" ۇلتتىق پورتالى
