قحر باسقارۋشى پارتياسىنىڭ باسشىسى سي تسزينپين ۆلاديمير پۋتينمەن شاقىرتۋىمەن رەسەيگە اتتانباقشى. رەسمي كەزدەسۋ 20-22 ناۋرىز كۇندەرى وتەدى دەپ جوسپارلانعان. بۇل تۋرالى The Wall Street Journal جۋرناليستەرى حابارلادى، دەپ جازدى "ادىرنا" ۇلتتىق پورتالى.
باسىلىمنىڭ 21 اقپان كۇنى جازعان جاڭالىعىندا:
"قىتاي كوشباسشىسى سي تسزينپين الداعى ايلاردا رەسەي پرەزيدەنتىمەن مەملەكەتتىك دەڭگەيدەگى كەزدەسۋ ءۇشىن ماسكەۋگە بارۋعا دايىندالىپ جاتىر", - دەپ حابارلاعان ەدى.
سونىمەن قاتار، ولار قىتايدىڭ رەسەي مەن ۋكراينا اراسىنداعى قاقتىعىستى شەشۋدە ماڭىزدى ءرول اتقارعىسى كەلەتىنىن جازدى.
ال رەسەيلىك "rbc.ru" اگەنتتىگى رەسمي كەزدەسۋدىڭ ساياسي ماڭىزىن بىلاي ايشىقتادى:
- كرەمل 17 ناۋرىزدا سي ءتسزينپيننىڭ ماسكەۋگە ارناي كەلەتىنىن جەتكىزدى. قحر توراعاسىنىڭ ساپارى ءۇش كۇنگە سوزىلادى. قىتاي كوشباسشىسى رەسەي پرەزيدەنتىمەن ستراتەگيالىق ءوزارا ءىس-قيمىلدى دامىتۋدى تالقىلايدى، مەملەكەت باسشىلارى حالىقارالىق ارەنادا رەسەي-قىتاي ىنتىماقتاستىعى ماسەلەلەرى بويىنشا پىكىر الماسادى. سونىمەن قاتار، كەلىسسوزدەر اياسىندا "بىرقاتار ماڭىزدى ەكىجاقتى قۇجاتتارعا" قول قويىلادى دەپ كۇتىلۋدە.
ەستەرىڭىزگە سالا كەتەيىك، قىتايدىڭ سىرتقى ىستەرىنە جاۋاپتى ۆان ي رەسەي مەن ۋكراينا اراسىنداعى اسكەري قاقتىعىستى شەشۋگە قاتىستى ۇسىنىسىن جەتكىزگەن ەدى. مۇنى رەسەي باسىلىمدارى سان-cاققا جۇگىرتىپ، وتىرىك-شىنى ارالاس ءبىراز جازدى. ورىس ءتىلدى باسىلىمدار ءالى دە قىتاي باسشىسىنىڭ رەسەيگە ارنايى ات باسىن بۇرۋىن باتىستى تىزە بۇكتىرتىپ، اقش پەن ەۋروپانىڭ ۋكرايناعا قارۋ تاسىمالداۋىن ءبىرجولاتا توقتاتادى دەپ سەنەدى.
دەگەنمەن، قىتاي كوشباسشىسىن ءپۋتيننىڭ ءوزى ءبىرىنشى بولىپ 2022 جىلدىڭ جەلتوقسانىندا ماسكەۋگە شاقىرعان.
ءپۋتيننىڭ ايتۋىنشا، بۇل ساپار "كۇللى الەمگە رەسەي-قىتاي بايلانىستارىنىڭ بەرىكتىگىن كورسەتىپ، جىلدىڭ باستى جاڭالىعىنا" اينالاتىن ساپار بولماق.
"ادىرنا" ۇلتتىق پورتالى
