«Elsana Amanat» قوعامدىق قورى، مەملەكەت جانە قوعام، ونەر مەن ادەبيەت قايراتكەرلەرى، عالىمدار، قوعام بەلسەندىلەرى قازاقستان پرەزيدەنتى قاسىم-جومارت توقاەۆقا ۇندەۋ جولدادى.
ولار ناۋرىز مەيرامىنا بايلانىستى بىرنەشە ۇسىنىس تاستادى.
«مەملەكەتتىك مەرەكە ساناتىنداعى ناۋرىز مەيرامى حالىقارالىق يۋنەسكو ۇيىمىندا جالپىادامزاتتىق ماتەريالدىق ەمەس قۇندىلىق رەتىندە تىركەلگەنى ءمالىم. الايدا، بۇل مەرەكەنىڭ اتاپ ءوتىلۋى ويداعىداي ەمەس. ونى ءوزىڭىز «ەگەمەن قازاقستان» گازەتىنىڭ 2024 جىلعى 3 قاڭتاردا جاريالانعان «ءبىز وزىق ويلى ۇلت رەتىندە تەك قانا العا قاراۋىمىز كەرەك!» اتتى سۇحباتىڭىزدا «ناۋرىز – جاڭارۋ مەن جاڭعىرۋدىڭ سيمۆولى. سوندىقتان ءتول مەرەكەمىزدىڭ مازمۇنىن بايىتىپ، ونى بارىنشا ەرەكشەلەپ، جاڭاشا اتاپ ءوتۋىمىز كەرەك» دەپ جاڭاشا ۇيىمداستىرۋعا شاقىردىڭىز»، دەپ جازىلعان ۇندەۋدە.
وسىعان وراي، ناۋرىز مەيرامىنىڭ جوعارى دەڭگەيدە شەشىلۋگە ءتيىستى تۇيتكىلدى تۇسىنا قاتىستى مىناداي بىرنەشە ۇسىنىس جولدادى:
- 14 ناۋرىز عىلىمي نەگىزسىز تۇردە بۇگىندە «امال مەرەكەسى»، «كورىسۋ كۇنى» اتالىپ ءجۇر; بۇل كۇن شىن مانىندە جالپىتۇركىلىك تانىم بويىنشا جاڭا جىلدىڭ باسى بولىپ تابىلادى; سوندىقتان وسى كۇنگە ارنايى مۇشەلدىك جىل باسى دەگەن مارتەبە بەرىلۋىن سۇرايمىز;
- 23 ناۋرىزداعى مەرەكەگە قاتىسى جوق قيسىنسىز دەمالىس كۇنىن 14 ناۋرىزعا اۋىستىرۋدى ۇسىنامىز;
- مەرەكەنىڭ ءمانى مەن مازمۇنىن اشا تۇسەتىنىن ەسكەرە وتىرىپ، مەكتەپ وقۋشىلارىنىڭ كوكتەمگى كانيكۋلىن ناۋرىزدىڭ 14-22 ارالىعىنا ورايلاستىرۋدى دا وتىنەمىز.
