مەملەكەت باسشىسى قاسىم-جومارت توقاەۆ قازاقستاننىڭ بريكس-كە قوسىلۋى تۋرالى ۇسىنىس الدى. بۇل تۋرالى پرەزيدەنتتىڭ ءباسپاسوز حاتشىسى بەرىك ءۋالي Tengrinews.kz-كە ايتتى، دەپ حابارلايدى “ادىرنا” ۇلتتىق پورتالى.
«قازاننىڭ 23-24-ءى قازاندا بريكس ءسامميتى وتەدى. بىلۋىمىزشە، پرەزيدەنت قاسىم-جومارت توقاەۆ بۇل فورۋمعا قازىر وسى بىرلەستىكتى باسقارىپ وتىرعان ۆلاديمير ءپۋتيننىڭ قوناعى رەتىندە شاقىرىلعان. پرەزيدەنتتىڭ جوسپارىندا بريكس سامميتىنە قاتىسۋ بار. ول سوندا 24 قازاندا ۇيىمنىڭ اۋتريچ فورماتىنداعى كەڭەيتىلگەن وتىرىسىندا ءسوز سويلەۋدى جوسپارلاپ وتىر»، - دەدى بەرىك ءۋالي.
بريكس-كە كىرۋگە وتىنىمدەردى ءازىربايجان، بەلارۋس جانە تمد-نىڭ باسقا ەلدەرى دە بەرۋى مۇمكىن.
بەرىك ءۋاليدىڭ ايتۋىنشا، قازاقستان بريكس ۇيىمىنىڭ دامۋىن مۇقيات باقىلاپ وتىر جانە ونىڭ نەگىزىن قالاۋشى مەملەكەتتەردىڭ كەز كەلگەن ءىرى دەرجاۆالاردىڭ گەگەمونياسىنان ازات، ءادىل جانە دەموكراتيالىق الەمدىك ءتارتىپ قۇرۋعا شاقىرۋلارىن قولدايدى.
سونىمەن قاتار، قازىرگى تاڭدا جانە جاقىن بولاشاقتا قازاقستان بريكس-كە مۇشەلىككە ءوتىنىش بەرمەيدى. بۇل شەشىم ۇيىمنىڭ دامۋ پەرسپەكتيۆالارى مەن كوپ ساتىلى پروتسەسىن ەسكەرە وتىرىپ قابىلدانعان.
پرەزيدەنت حاتشىسىنىڭ ايتۋىنشا، قازاقستاننىڭ سىرتقى ساياساتىنداعى نەگىزگى باسىمدىق بىرىككەن ۇلتتار ۇيىمىنا بەرىلەدى. پرەزيدەنت قاسىم-جومارت توقاەۆ بىرنەشە رەت بۇۇ-نىڭ ادىلەتتى الەمدىك ءتارتىپتى قالىپتاستىرۋداعى ءرولىن اتاپ وتكەن. ۇيىمنىڭ كەيبىر كەمشىلىكتەرى بولعانىمەن، باسقا بالاما قۇرىلىم جوق، سوندىقتان بۇۇ حالىقارالىق قولداۋعا مۇقتاج.
