پارلامەنت ءماجىلىسىنىڭ توراعاسى نۇرلان زايروللاۇلىنا!
ءبىزدىڭ سىزگە حابارلاسىپ وتىرعان سەبەبىمىز - ول ءبىزدىڭ قىزىلوردا وبلىسىنىڭ اكىمىنەن، وبلىستىق دەنساۋلىق ساقتاۋ ۇيىمىنان، دەنساۋلىق ساقتاۋ مينيسترىنەن كۇدەر ۇزگەننەن كەيىن تىكەلەي سىزگە شىعىپ وزىڭىزدەن جانە پارلامەنتتەن كومەك سۇراپ وتىرمىز. ماجىلىستە مەديتسيناعا بايلانىستى كوتەرگەن ماسەلەلەرىڭىز، تالاپتارىڭىز، سىندارىڭىز ورىندى، وزەكتى شىعار، بىراق وسى سالاداعى وزگەرىستەر الىس تۇرعىندارعا جەتپەيدى.
ءبىز ەندى ماجىلىسكە عانا ۇمىتتەنەمىز، حالىقتى ويلايتىن بىرەۋ بولسا ول تەك سىزدەر دەپ سەنەمىز. وسى جۇرەكجاردى ءوتىنىشىمىزدىڭ نەگىزگى سەبەبى ەكولوگياسى ناشار رادياتسيالىق ايماققا جاتاتىن بايقونىر، تورەتام، اقاي حالقىنىڭ بايقونىر اۋرۋحاناسىندا بولىپ جاتقان كەلەڭسىز جاعدايلارعا بايلانىستى جان ايقايى. بايقونىر اۋرۋحاناسىندا بولىپ جاتقان بىلىقتاردى "ادىرنا" ۇلتتىق پورتالىندا 05.03.2021ج،17.03.2021ج،01.04, 2021ج كوتەردىك. پرەزيدەنتكە، پرەزيدەنت اكىمشىلىگىنە وسى جاعدايلاردى ايتىپ حات جازدىق. بىراق تا جوعارىدان: سىزدەردىڭ كوتەرگەن ماسەلەرىڭىزدى وبلىستىڭ اپپاراتىنا جىبەردىك دەپ جاۋاپ كەلەدى. ال وبلىس ونى قارماقشى اۋدانىنا جىبەردىك دەيدى (بايقونىر سول اۋدانعا قاراستى). سوندا وبلىس شەشپەگەن ماسەلەنى اۋدان قالاي شەشەدى؟
مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىنىڭ توراعاسى اليك شپەكباەۆقا، دەنساۋلىق ساقتاۋ ءمينيستىرى الەكسەي تسويعا باق ارقىلى اشىق حات جازدىق. جاۋاپ، ارەكەت جوق. اۋىلداعى حالىقتىڭ مۇڭ مۇقتاجى ولارعا كەرەك ەمەس. وسى ۋاقىتقا دەيىن اۋرۋحاناعا ءبىر تەكسەرۋ كەلگەن جوق. دالىرەك ايتساق، ول ءبىز تۇراتىن بايقوڭىر قالالىق اۋرۋحاناسىنىڭ جاعدايىن مۇشكىل حالگە جەتكىزگەن باس دارىگەر ءادىلحان جاندوستىڭ وكتەمشىل-سوراقى، كورگەنسىز ءىس ارەكەتى.
ەكولوگيالىق كەساپاتتان اۋرۋ-ناۋقاس بولعان قالا تۇرعىندارىن، اۋرۋحانا قىزمەتكەرلەرىن باس دارىگەردىڭ تاكاپپارلىق، ياعني ەتيكاعا جات، جيىركەنىشتى تىرلىگى مەن كەلەڭسىز بىلىقتارى ابدەن شارشاتتى. سىبايلاستىق نەگىزدە ءوزىنىڭ ايتقانىن بۇلجىتپاي ورىندايتىن بىرگە بولىسەتىن قىزمەتكەرلەرگە تۋعان بالدىزى، باس ەكونوميست فايزۋللاەۆ نۋرلان ارقىلى كارتوچكالاردى كەلىسىم بويىنشا مولشەردەن تىس ارتىق جىبەرەدى دەگەن سىبىس بار. بىراق ول بىزگە قۇپيا، تەكسەرەتىن، انىعىنا جەتەتىن مەكەمە جوق. حالىق اراسىندا ايتىلىپ جۋرگەن: باس دارىگەر مەدبيكەنى جۇمىسقا الۋ ءۋشىن 700 مىڭ تەڭگە پارا الادى دەگەن سوزدەرى راس ەكەنىنە سەنە باستادىم. مەن داۋتوۆ بازارباي سىدىكوۆيچ، باس دارىگەردىڭ شارۋاشىلىق جۇمىسى جونىندە ورىنباسارى بولىپ جۇمىس ىستەيمىن. جوعارىدا ايتىلعانداي، ماعان دا ەگەر ورنىڭدا قالعىڭ كەلسە، 1 ميلليون الىپ كەلەسىڭ دەپ تالاپ قويدى. مەنىڭ ورنىما سول اقشاسىن بەرەتىن ادام دايىن تۇر ەكەن. ول ىشكى ىستەر مەكەمەسىنەن ەڭبەك ەرەجەلەرى بويىنشا جات قىلىقپەنەن جۇمىستان شەكتەلگەن ج كۇزەمباەۆ قازىر ىشكى قاۋىپسىزدىك مامانى. مەن اقشا بەرمەگەن سوڭ قۋدالاۋ باستالدى، ايلىعىمدى ەكى ەسە قىسقارتتى، جۇمىسىمنان ءارتۇرلى سىلتاۋلار ىزدەپ، رەسەي پوليتسياسىنا بەرىپ، ءىس قوزعاپ نەشە ءتۇرلى ارەكەتتەر جاساپ جاتىر. مەن ءوز جۇمىسىمدى تيانىقتى جوعارعى دەڭگەيدە ىستەيمىن، قۇقىعىمدى دا بىلەمىن. سوندىقتان مەنى جۇمىستان شىعارۋ ءۇشىن نەگىز تاپپاي، ءوزىنىڭ قاسىندا جۇرگەن ۇقت -قا تاپسىرما بەرىپ قىسىم كورسەتىپ جاتىر.
وسىعان ۇقساس جانە باسقا دا بىلىق جاعدايلار وتە كوپ. ءبارى ۇندەمەيدى، قورقادى. بىراق شىدامنىڭ دا شەگى بولادى. مەن اللادان عانا قورقام، باس دارىگەردەن قورىقپايمىن، سوندىقتان شىندىقتى ايتىپ جاتىرمىن. جوعارىداعى ايتىلعان جاڭدايارعا قۇداي كۋا.
تاعى وسىعان ۇيقاس جاعداي - ول ج.ءادىلحان كادر ءبولىمىنىڭ ينسپەكتورى دارمەنكۇلوۆ ايبولاتتى ەڭبەك شارتىنا فالسيفيكاتسيا جاساپ جۇمىستان الىپ تاستاۋى. ءوز جۇمىسىن جاقسى بىلەتىن زاڭگەر، بىلىكتى مامان، بىراق پودحاليم ەمەس جانە باس دارىگەردىڭ ادامى بولماعاندىقتان، ورنىنا ءوزىنىڭ ادامىن قويۋ ءۋشىن زاڭدى بەلدەن باسىپ، جۇمىستان شىعارىپ وتىر. ەڭبەك شارتىنداعى بەلگىلەنبەگەن مەزگىلدى، بەلگىلەنبەگەن مەزگىلگە اۋىستىرىپ، ياعني استىن دورەكى سىزىپ ەڭبەك شارتىنىڭ اياقتالۋ كۇنىن 01.04.2021ج دەپ ( ول مەرزىم بۇرىن جازىلماعان) وزگە ادامنىڭ قولىمەن جانە باسقا قالامساپپەن تولتىرعان. دارمەنقۇلوۆتان كادر بولىمىندەگى شارتتىڭ داناسى جوعالىپ قالىپتى دەپ الداپ سۇراتىپ الىپ ەكى داناسىنا دا وزگەرتۋ ەنگىزگىزىپ، كادر ءبولىمىنىڭ ارناۋلى جەكە ىستەر ساقتالاتىن كابينەتىنە قويعان. وزگەرتۋلەر ورەسكەل كوزگە انىق كورىنىپ تۇر. ەكسپەرتيزا ونى وڭاي انىقتايدى. سوت بولاتىنىنا كۇمانىمىز جوق. تاڭ قالاتىنىمىز - نەگە ج.ءادىلحان وسىنداي قاراپايىم جەردەن ءسۇرىندى، زاڭ بۇزۋعا باردى، شىنىمەن اقشا ءۇشىن با؟ الدە ونىڭ بولمىسى سونداي قىلمىسقا جاقىن با؟
سونىمەن داۋرەنبەكوۆتى 2021 جىلدىڭ 13 ساۋىرىندە جوعارىداعى فالسيفيكاتسيا جاسالعان شارتتى نەگىز قىلىپ، N326ج/ق بۇيرىقپەن ەڭبەك شارتىنىڭ مەرزىمىنىڭ اياقتالۋىنا بايلانىستى جۇمىستان بوساتتى. داۋرەنبەكوۆ جۇمىستان بوساتۋ جونىندەگى بۇيرىقپەن كەلىسپەيتىنى تۋرالى جازىپ بەرگەن. وسى زاڭ بۇزۋ فاكتىلەرىنە بايلانىستى وبلىستىق دەنساۋلىق ساقتاۋ باسقارماسىنا ارىز ءتۇسىرىلدى، بىراق جاۋاپ جوق. جاۋاپتى الىپ، ونىڭ وڭ شەشىلەتىنىنە كۇمانىمىز بار. سەبەبى وبلىستىق دەنساۋلىق ساقتاۋ باسقارماسىنىڭ باسشىسى س. پازيلوۆ مىرزا 9 ساۋىردە بايقونىرعا كەلىپ، اۋرۋحانادا بىلىقتىڭ كوپ ەكەنىنە كوزى جەتىپ، باس دارىگەردى ورنىنان الاتىن بولىپ كەتكەن. بىراق ج ءادىلحاننىڭ ايتقانى بار، مەن ول پازيلوۆقا پىسقىرمايمىن دا دەپ، وعان دا ءبىر سەبەپ بار شىعار. ەڭ قىزىقتىسى، پازيلوۆتىڭ اۋرۋحانانىڭ، باس دارىگەردىڭ كەمشىلىكتەرى تۋرالى قىزمەتكەرلەرمەن تالقىلاعان جەكە اڭگىمەسىن ج.ءادىلحان قۇپيا اگەنتتەرى ارقىلى جازىپ العانى جانە سول ايتىلعان اڭگىمەنى پازيلوۆقا جىبەرگەنى تاڭ قالدىرادى. بۇل شانتاج با، قورقىتۋ ما، وكتەمدىگىن كورسەتۋ مە، الدە تاعى دا ءبىر نارسە مە، تۇسىنبەي قالدىق. سودان كەيىن پازيلوۆ حابار وشارسىز كەتتى. باس دارىگەردىڭ قولىنان نەشە ءتۇرلى نارسە كەلەدى. ول سونداي ينتريگاعا جاقىن ادام.
ءبىزدىڭ تۇسىنىگىمىزدە ج.ءادىلحان س. پازيلوۆتىڭ بەتىنە تۇكىردى - ءسوز جوق ناعىز باتىر! تاعى دا ءبىر ايتاتىن ماسەلە - اۋرۋحانا ۇيىمىنىڭ شارتىندا كورسەتىلگەن ەڭبەك دەمالىسىن بەرۋ ۋاقىتىندا ءبىر وكلاد ەكولوگيالىق، ءبىر وكلاد ماتەريالدىق كومەك كورسەتىلەتىنى تۋرالى جازىلعان. ول شارتتار ورىندالمايدى، ماتەريالدىق كومەك بەرىلمەيدى ول اقشا قايدا؟ سونىمەن قاتار ج.ءادىلحان قوسىمشا ستاۆكالاردى بالدىزىمەن بىرگە ويىنشىققا اينالدىرعان. كوڭىلى قالاعان قىزمەتكەرگە 0.25, 0.5 قوسىمشا ستاۆكالارىن بەرەدى دە، ايدىڭ سوڭىندا تابەل تاپسىرار كەزىندە ۇناماعانداردان الىپ تاستايدى. اتاپ ايتقاندا، وتە تاجىريبەلى دارىگەر ر.ك. ەسماعامبەتوۆانىڭ وزىنە بەرىلگەن 0.25 ستاۆكاسىن ج.ءادىلحاننىڭ بىرەسە الىپ، بىرەسە بەرىپ، ويىنشىققا اينالدىرعانى - جاقسى ماماننىڭ جۇمىستان كەتۋىنە سەبەپ بولدى. ج.ءادىلحان ءوزىنىڭ جاقىندارىنا قوسىمشا 0.5 ستاۆكالارىن تاعايىندايدى. ولارمەن ەڭبەك شارتى جاسالمايدى، جۇمىس ۋاقىتى بەلگىلەنبەيدى. سەبەبى ج.ادىلحانمەن تيىم سالىنعان. ونىڭ جاقىندارى 8-ساعات جۇمىس ىستەپ، 12 ساعاتتىڭ جالاقىسى الادى. مۇمكىن بولىسەر، كىم بىلەدى.
2020 جىلدىڭ اياعىندا پرەميا بەرەمىز، سوعان 20 ميلليون تەڭگە بار دەپ قىزمەتكەرلەردى ۇمىتتەندىردى. بىراق پرەميا بەرىلمەدى. ۇزىنقۇلاقتاردان ەستىدىك، وزدەرى ءبولىپ الىپتى دەپ، ونى تەكسەرىپ جاتقان ەشكىم جوق. حيرۋرگيا بولىمىندە كوسمەتولوگيالىق وپەراتسيالار جاسالىپ جاتىر. ول وپەراتسيالار فومس-قا كىرمەيدى. تەك قانا اقىلى، ودان تۇسكەن اقشا قاي كىسىنىڭ قالتاسىنان ءتۇسىپ جاتىر؟ ماسقارا بولعاندا اۋرۋحانانىڭ ونداي وپەراتسيا جاساۋعا ليتسەنزياسى جوق. ەگەر اسقىنۋ بولسا، اسقىنۋ بولماۋىنا ەشكىم كەپىل بەرە المايدى، وعان كىم جاۋاپ بەرەدى؟ كەمىستىكتەردى ايتساڭ نەمەسە داۋ شىعارساڭ بولدى، ايتەۋىر رەسەيدىڭ پوليتسياسىن پايدالانىپ ۇستىڭنەن ويدان شىعارىلعان ءىس قوزعايدى. ءبىزدى قورعايدى ما دەسەك كەرىسىنشە بوتەن مەملەكەتتىڭ توقپاعىنا جىعىپ بەرىپ وتىر. وسىلاي فاشيستىك، الاياق، سوتقارلىق رەجيممەن اۋرۋحانانى باسقارىپ وتىر. وسىلاي جالعاسا بەرسە اۋرۋحانا تۇرمەگە اينالاۋى دا مۇمكىن.
ج.ادىلحانعا ءاي دەيتىن اجا جوق، قوي دەيتىن كوكە جوق، 2-3 جىلدىڭ ىشىندە بىلگەنىن ىستەپ جاتىر. ەشكىمنەن قورىقپايدى. نە سەبەپتى دەيسىزدەر عوي؟ وعان دالەل - ءادىلحان جاندوستىڭ حالىق اراسىندا ايتقان ءسوزىن بايقوڭىر تۇرعىندارى ءوز قۇلاقتارىمەن ەستىگەن. ول مىناداي سوزدەر: "مەن ماحانوۆ تۇرعانباي دەگەن بەدەلدى كوكەمە قوماقتى قارجى بەرىپ وبلىس اكىمىنە كىرگىزدىم، سول ءۋشىن ماعان ەشكىم تيىسە المايدى جانە ءتىسى باتپايدى".بۇل ايتقان سوزدەرىنىڭ نەگىزى بار سياقتى. ويتكەنى "قوماقتى" اقشانى قايدان تاپتى؟ ءتۇسىنىپ وتىرعان شىعارسىزدا، مەنەن سۇراعان نەمەسە باسقالار بەرگەن، ەكونوميستپەن بىرگە ۇنەمدەگەن، نەمەسە پرەميادان ۇنەمدەگەن ميلليوندار ما؟ الدە بايقونىردان قازىنا تاپتى ما ەكەن؟ ول دا مۇمكىن. ەڭ قىزىقتىسى - ەتيكا ساقتاماعان باس دارىگەردىڭ وسى ءسوزى باق ارقىلى جانە حات حابارلامادا وبلىستىڭ اكىمىنە جەتكىزىلدى. اكىم ۇندەمەيدى، باس دارىگەردەن تۇسىنىكتەمە المايدى، شارا قولدانبايدى، تىم تىرىس. وسىدان كەيىن نەشە ءتۇرلى وي كەلەدى! شىن وسىنداي ما ەكەن دەپ! بىلەسىزدەر، ءشوپتىڭ باسى جەل تۇرماسا قيمىلدامايدى. ال ءبىزدىڭ بايقونىردىڭ اۋرۋحاناسىندا داۋىل سوعىپ تۇر. ءبىزدىڭ كوتەرگەن ماسالەمىز جاي عانا ايسبەرگتىڭ توبەشىگى. ەگەر دە ءادىل كومپلەكستى اسىرەسە فينانس جاعىنان تەكسەرۋ كەلسە، قىلمىستىق ءىس قوزعالاتىنىنا كۇمانىمىز جوق. بىزگە باس دارىگەردىڭ جۇمىسىنان كەتكەنى از، ول ءوزىنىڭ جاساعان بىلىقتارىنا زاڭ الدىندا جاۋاپ بەرۋى كەرەك.
قۇرمەتتى نۇرلان زايروللاۇلى!
ءبىزدىڭ ءۇمىتىمىز تەك سىزدە عانا!
بايقوڭىر اۋرۋحاناسىندا بولىپ جاتقان كەلەڭسىز جاعدايعا كوڭىل اۋدارۋىڭىزدى سۇرايمىز.
ءسىزدىڭ شىن كوز قاراسىڭىز جانە ءادىل، باتىل شەشىمىڭىز كەرەك بولىپ تۇر.
قۇرمەتپەن، داۋتوۆ ب، داۋرەنبەكوۆ ا، بۋحاەۆ ب جانە تاعى باسقا قىزمەتكەرلەر!
بايلانىس تەلەفونى:
87022683757
"ادىرنا" ۇلتتىق پورتالى
(اۆتورلاردىڭ كوزقاراسى رەداكتسيانىڭ كوزقاراسىن بىلدىرمەيدى. ەگەر دە قارسى تاراپتىڭ پىكىرى تۋىنداسا، ونى دا جاريالاۋعا دايىنبىز!)
