3 قىركۇيەكتە الماتىداعى Chaplin Mega Alma-Ata كينوتەاترىندا IX Baiqonyr كينوفەستيۆالىنىڭ سالتاناتتى اشىلۋ ءراسىمى ءوتتى. ءۇش جۇزدەن استام قوناق جينالعان شارا كورەرمەندەرگە حالىقارالىق جۇلدەلەرگە يە بولىپ ۇلگەرگەن رەجيسسەر كەنجەبەك شايقاقوۆتىڭ «ايقاي» ءفيلمىنىڭ كورسەتىلىمىمەن باستالدى.
جىل سايىن كينو سالاسىنىڭ ۇزدىكتەرىن جيناپ، كينو الەمىنە ەندى اياق باسقان جاس كينەماتوگرافتارعا باستاۋ بولاتىن Baiqonyr كينوفەستيۆالى وسىمەن توعىزىنشى جىل قاتارىنان ۇيىمداستىرىلىپ وتىر.
اشىلۋ سالتاناتىندا العاش ءسوز العان Baiqonyr Film Festival پرەزيدەنتى انۋار كەنجەباەۆ بيىلعى فەستيۆالدىڭ بىرنەشە ەرەكشەلىگىن اتاپ ءوتتى. سونىڭ ءبىرى - بۇعان دەيىن Baiqonyr اياسىندا ۇيىمداستىرىلىپ كەلگەن انيماتسيالىق فيلمدەر بايقاۋى - Almaty Animation Festival بيىل بولەك فەستيۆال رەتىندە شىلدەدە ءوتتى. بۇل دا فەستيۆال اياسىن قالاي كەڭەيتىپ جاتقانىن كورسەتەدى.
«كينوفەستيۆال تەك جاس تالانتتاردى كورسەتۋمەن شەكتەلمەيدى. ءبىز ولاردى قولداپ قانا قويماي، سونىمەن قاتار كينو سالاسىن دامىتىپ جاتىرمىز دەپ ويلايمىن. مۇنىڭ ايقىن دالەلى - فەستيۆال اياسىندا كينوتانۋشىلار مەن كينوسىنشىلاردىڭ III حالىقارالىق فورۋمىنىڭ وتكىزىلۋى»، - دەدى كەنجەباەۆ فەستيۆالمەن قاتار ءوتىپ جاتقان فورۋم تۋرالى.
فەستيۆال ءداستۇرلى تۇردە تمد-عا قاتىسۋشى مەملەكەتتەردىڭ مەملەكەتارالىق گۋمانيتارلىق ىنتىماقتاستىعى قورىنىڭ قولداۋىمەن وتەدى. سونداي-اق، انۋار كەنجەباەۆ ءوز سوزىندە Chaplin Mega Alma-Ata كينوتەاترىنا ەرەكشە العىسىن ءبىلدىرىپ، كينوتەاتردىڭ ارقاسىندا بيىل بۇرىنعىدان 160 ادامعا كوبىرەك قوناق شاقىرۋ مۇمكىندىگى تۋعانىن اتاپ ءوتتى.
IX Baiqonyr كينوفەستيۆالىنىڭ تاعى ءبىر ەرەكشەلىگىن اتاعان باعدارلامالىق ديرەكتور ەرجان جۇمابەكوۆ بيىل العاش رەت دەبيۋتتىك تولىقمەتراجدى فيلمدەر بايقاۋى وتەتىنىن ايتتى.
بيىل 20 ەلدەن كەلىپ تۇسكەن 670 ءوتىنىمنىڭ ىشىنەن فەستيۆالدىڭ بايقاۋ باعدارلاماسىنا قاتىساتىن 34 فيلم ىرىكتەلىپ الىندى. بايقاۋعا قازاقستان، گرۋزيا، ءازىربايجان، ارمەنيا، وزبەكستان، تاجىكستان، قىرعىزستان جانە رەسەي ەلدەرىنىڭ وكىلدەرى قاتىسىپ جاتىر.
«بيىل ءبىز Baiqonyr كينوفەستيۆالى باعدارلاماسىن ماقتانىشپەن ۇسىنامىز. بۇرىنعى فەستيۆالدەردە تولىقمەتراجدى فيلمدەردى باعدارلامادان تىس كورسەتەتىنبىز، ال بيىل بايقاۋ اياسىندا كورسەتىپ جاتىرمىز. قىسقا مەترلى فيلمدەردەن وسكەن جاس رەجيسسەرلەردىڭ العاشقى فيلمدەرىن كورسەتەتىن بىرەگەي پلاتفورما فەستيۆال بولادى دەپ ويلايمىز»، - دەدى جۇمابەكوۆ.
بايقاۋعا تۇسكەن فيلمدەر اراسىنان ۇزدىكتەرىن انىقتايتىن قازىلار القاسى دا سالتاناتتى شارادا نازاردان تىس قالمادى. Baiqonyr كينوفەستيۆالىنىڭ حالىقارالىق بايقاۋىن قازاقستاندىق قازىلار القاسى باعالايدى، ال ۇلتتىق بايقاۋدىڭ جەڭىمپازدارىن حالىقارالىق قازىلار القاسى انىقتايدى.
«مەنىڭ ويىمشا، قازىر Baiqonyr كينوفەستيۆالدەر اراسىندا مونوپوليست رولگە يە بولعان سياقتى، سەبەبى بۇل - دەبيۋتانتتاردىڭ، ستۋدەنتتەر مەن جاڭا ەسىمدەر اشىلىپ، مانسابى باستالاتىن جالعىز جۇمىس ىستەپ تۇرعان فەستيۆال. ماعان رەجيسسەر جانە كينو سالاسىنداعى ادام رەتىندە Baiqonyr فيلمدەرىن كورۋ ارقاشان قىزىقتى. بۇل - يمپۋلس، تىنىس جانە الەمدىك ارەناعا ترامپلين»، - دەدى تانىمال رەجيسسەر ءادىلحان ەرجانوۆ. ول بيىل حالىقارالىق بايقاۋدا باعا بەرەتىن قازىلار القاسىنىڭ توراعاسى.
كەيىن شاراعا جينالعان قوناقتار اسىعا كۇتكەن سەمەي پوليگونىمەن تاعدىرلاس اكە مەن بالا ءومىرىن باياندايتىن كەنجەبەك شايقاقوۆتىڭ «ايقاي» ءفيلمىنىڭ كورسەتىلىمىن تاماشالادى. فيلم العاش رەت قازاقستاندا كورسەتىلىپ وتىر، بۇعان دەيىن ءفيلمنىڭ پرەمەراسى پۋسان حالىقارالىق كينوفەستيۆالىندە وتكەن.
IX Baiqonyr كينوفەستيۆالى 3-8 قىركۇيەك ارالىعىندا وتەدى، بايقاۋعا تۇسكەن بارلىق فيلم MEGA Alma-Ata ساۋدا ورتالىعىنداعى Chaplin Cinemas كينوتەاترىندا تەگىن كورسەتىلەدى. تەك تولىقمەتراجدى فيلمدەر اقىلى نەگىزدە كورسەتىلەدى، وعان بيلەتتى Kino.kz سايتىنان، نە قوسىمشاسىنان ساتىپ الۋعا بولادى.
سونىمەن قاتار، III حالىقارالىق كينوتانۋشىلار مەن كينوسىنشىلار فورۋمى اياسىندا ءتۇرلى اۆتورلىق دارىستەر، پانەلدىك سەسسيالار مەن شەبەرلىك ساباقتارى AlmaU ۋنيۆەرسيتەتىندە وتەدى. كىرۋ تەگىن.
