بەلگىسىز بىرەۋلەر بەلگىلى ابايتانۋشى، عالىم قايىم مۇحامەدحانوۆتىڭ زيراتىنداعى قۇلپىتاستى قيراتىپ، قاق ورتاسىنان سىندىرىپ كەتكەن.
عالىمنىڭ ۇلى قاناعات قايىمۇلىنىڭ ايتۋىنشا، بۇل وقيعا ءبىرىنشى رەت بولىپ وتىرعان جوق.
«بۇگىن ءبىز ءبىر توپ اعايىن–تۋىستار جينالىپ، اكەمىز بەن انامىزدىڭ باسىنا زيارات ەتىپ بارىپ قايتقان ەدىك. اباي قۇنانبايۇلىنا بۇكىل عۇمىرىن ارناپ، سول جولدا قيىندىق پەن ازاپتىڭ ءبارىن كورگەن اكەمىزدىڭ دۇنيەدەن وتكەنىنە 17 جىلدىڭ ءجۇزى بولدى. اكە قابىرىنىڭ باسىنا بارعانىمىزدا قۇلپىتاسىنىڭ بەل ورتاسىنان قاق ءبولىنىپ، جەردە جاتقانىن كورىپ، كوزىمىز شاراسىنان شىقتى. ەڭ اۋىرى، بۇل سۇمدىق ءبىرىنشى رەت بولىپ وتىرعان جوق. 100 جىلدىعى كەزىندە دە الدەكىمدەر قابىر قورشاۋىن بۇزىپ كەتكەن بولاتىن. ودان كەيىن اباي كوشەسى بويىنداعى اكەمىزدىڭ قۇرمەتىنە قويىلعان بارەلەفىندەگى ەسىمىنەن لاتۋنننەن قۇيىلعان ارىپتەرىن ۇرلاپ كەتىپ، تاعى دا جىگەرىمىزدى قۇم ەتتى»، - دەيدى ول «ەرتىس ءوڭىرى» گازەتىنە بەرگەن پىكىرىندە.
سونىمەن قاتار قاناعات قايىمۇلى مۇنداي قاستاندىقتىڭ كىمنىڭ تاراپىنان كەلىپ جاتقانىن سەزەتىندەرىن دە ايتتى.
«مۇنداي قاستاندىقتىڭ كىمنىڭ تاراپىنان كەلىپ جاتقانىن ءىشىمىز سەزەدى. اتاۋعا ءداتىمىز بارمايدى. بىلەتىنىمىز – بۇل ومىرباقي اكەممەن ءجونسىز جاۋلاسىپ، كورە الماي كۇندەپ وتەتىن ادامنىڭ ءىسى»، - دەيدى ول.
سەمەي قالاسى مادەنيەت ءبولىمى 12 مامىر كۇنى Facebook پاراقشاسىندا قۇلپىتاستىڭ جاقىن ۋاقىتتا قالپىنا كەلتىرىلەتىنىن جاريالادى.
«بۇگىن قالا اكىمىنىڭ تاپسىرماسى بويىنشا، قازاقتىڭ قايسار ۇلى – قايىم مۇحامەدحانوۆتىڭ بەيىتىنە قالا اكىمىنىڭ ورىنباسارى ا.س.سادىرباەۆ، مادەنيەت جانە تىلدەردى دامىتۋ ءبولىمىنىڭ باسشىسى ن.م.اققوجينا جانە عالىمنىڭ ۇلى قاناعات قايىمۇلى باردى.
عالىمنىڭ بەيىتىنە ورناتىلعان قۇلپىتاستىڭ كولەمى ولشەنىپ الىندى. جاقىن ۋاقىتتا قۇلپىتاس ورنىنا كەلتىرىلەتىن بولادى»، - دەلىنگەن جازبادا.
"ادىرنا" ۇلتتىق پورتالى
