Belgısız bıreuler belgılı Abaitanuşy, ǧalym Qaiym Mūhamedhanovtyŋ ziratyndaǧy qūlpytasty qiratyp, qaq ortasynan syndyryp ketken.
Ǧalymnyŋ ūly Qanaǧat Qaiymūlynyŋ aituynşa, būl oqiǧa bırınşı ret bolyp otyrǧan joq.
«Bügın bız bır top aǧaiyn–tuystar jinalyp, äkemız ben anamyzdyŋ basyna ziiarat etıp baryp qaitqan edık. Abai Qūnanbaiūlyna bükıl ǧūmyryn arnap, sol jolda qiyndyq pen azaptyŋ bärın körgen äkemızdıŋ dünieden ötkenıne 17 jyldyŋ jüzı boldy. Äke qabırınıŋ basyna barǧanymyzda qūlpytasynyŋ bel ortasynan qaq bölınıp, jerde jatqanyn körıp, közımız şarasynan şyqty. Eŋ auyry, būl sūmdyq bırınşı ret bolyp otyrǧan joq. 100 jyldyǧy kezınde de äldekımder qabır qorşauyn būzyp ketken bolatyn. Odan keiın Abai köşesı boiyndaǧy äkemızdıŋ qūrmetıne qoiylǧan barelefındegı esımınen latunnnen qūiylǧan ärıpterın ūrlap ketıp, taǧy da jıgerımızdı qūm ettı», - deidı ol «Ertıs öŋırı» gazetıne bergen pıkırınde.Sonymen qatar Qanaǧat Qaiymūly mūndai qastandyqtyŋ kımnıŋ tarapynan kelıp jatqanyn sezetınderın de aitty.
«Mūndai qastandyqtyŋ kımnıŋ tarapynan kelıp jatqanyn ışımız sezedı. Atauǧa dätımız barmaidy. Bıletınımız – būl ömırbaqi äkemmen jönsız jaulasyp, köre almai kündep ötetın adamnyŋ ısı», - deidı ol.Semei qalasy mädeniet bölımı 12 mamyr künı Facebook paraqşasynda qūlpytastyŋ jaqyn uaqytta qalpyna keltırıletının jariialady.
«Bügın qala äkımınıŋ tapsyrmasy boiynşa, Qazaqtyŋ qaisar ūly – Qaiym Mūhamedhanovtyŋ beiıtıne qala äkımınıŋ orynbasary A.S.Sadyrbaev, mädeniet jäne tılderdı damytu bölımınıŋ basşysy N.M.Aqqojina jäne ǧalymnyŋ ūly Qanaǧat Qaiymūly bardy. Ǧalymnyŋ beiıtıne ornatylǧan qūlpytastyŋ kölemı ölşenıp alyndy. Jaqyn uaqytta qūlpytas ornyna keltırıletın bolady», - delıngen jazbada.
"Adyrna" ūlttyq portaly
