«فۋتبول - تابىستى سپورت تۇرلەرىنىڭ ءبىرى»

3932
Adyrna.kz Telegram

تاياۋدا الماتىدا «فەنەرباحچە» بالالار مەن جاسوسپىرىمدەر فۋتبول كلۋبى اشىلعان ەدى. نازارلارىڭىزعا تۇركياداعى اتالمىش اكادەميانىڭ وكىلى،  قازاقستانداعى «فەنەرباحچە» فۋتبول كلۋبىنىڭ باس ديرەكتورى سايگىن بالىكەلمەن اراداعى سۇحباتتى ۇسىنامىز.

- سايگىن بەي، قازاق ەلىنە قوش كەلىپسىز! ءبىر اي بۇرىن الماتىداعى ورتالىق ستاديون جانىنان «فەنەرباحچە» فۋتبول كلۋبىن اشقانىڭىزعا قانىقپىز. سوناۋ تۇركيادان كەلىپ، وسىندا بالالارعا ارنالعان فۋتبول الاڭىن اشۋعا نە سەبەپ بولدى؟

- «فەنەرباحچە» گەرمانيا، ازەربايجان جانە ەندى، مىنە، قازاقستاندا ءوز فيليالىن اشىپ وتىر. بۇعان ەكى سەبەپ بار. بىرىنشىدەن، ءبىز قازاق ۇلتىن باۋىر دەپ قارايمىز، وزىمىزگە ۇدايى جاقىن تارتىپ جۇرەمىز. ياعني، الەۋمەتتىك ينتەگراتسيا مەن مادەني جاقىندىققا بايلانىستى بىزگە سۇرانىس تۇسكەن بىرنەشە ەل اراسىنان قازاقستان تاڭداپ الىنىپ وتىر. ەكىنشىدەن، ماسەلەن، كوشەدە كەتىپ بارا جاتقان قازاق بالاسىن سىرتتاي باقىلاساڭ، قيمىلى وتە شيراق ءارى كوبىنە شىمىر كەلەدى. نەگە وسىنداي جەتكىنشەكتەردى شىڭداپ، باۋلىماسقا؟!

- «فەنەرباحچە» اتاۋى قالاي پايدا بولعان؟ جالپى بۇل اكادەميانىڭ دامۋ تاريحىنا قىسقاشا توقتالىپ وتسەڭىز؟

- «Fener – شام»، ال «bahçe – باقشا»، تەك بۇل جەردەگى باقشا ءسوزى الاڭ دەگەن ماعىنادا. اۋەل باستان وزدەرى ويناپ-وسكەن اۋداننان شابىت العان فۋتبولشىلار كومانداسى «فەنەرباحچە» فۋتبول كلۋبى دەپ اتاسا كەرەك. وسىلايشا، فەنەرباحچە سپورت كلۋبى 1907 جىلى ىستامبۇلدىڭ كادىكوي وكرۋگىنىڭ مودا اۋدانىندا فۋتبول كومانداسى رەتىندە قۇرىلدى.

- فۋتبول – تابىس كوزى بولا الا ما؟ تۇركياداعى بيلىكتىڭ فۋتبولعا دەگەن كوزقاراسى قانداي؟ ول جاقتا قانداي فۋتبول كلۋبى الدىڭعى ورىندا تۇر؟

- فۋتبول الەم بويىنشا ايتارلىقتاي تابىس اكەلەتىن سپورت تۇرلەرىنىڭ قاتارىنا جاتادى. سونىڭ ىشىندە فۋتبول كلۋبتارى تاباتىن تابىس از ەمەس. تۇركيادا «فەنەرباحچە»، «گالاتاساراي»، «بەشيكتاش»، «ترابزونسپور»، «باساكشەحير»، «بۋرساسپور»، «انتالياسپور» سياقتى فۋتبول كلۋبتارى تانىمال.

- تۇركياداعى فەنەرباحچەنىڭ دەڭگەيى قانشالىق دارەجەدە؟ قازىردە الەم بويىنشا قاي ەل فۋتبولدان الدىڭعى قاتاردا دەپ ويلايسىز؟

- «فەنەرباحچە» تۇركياداعى ۇزدىك 3-ءتىڭ قۇرامىنا كىرەدى. بىلۋىمشە، قازىرگى ۋاقىتتا الەمدە انگليا، گەرمانيا، يسپانيا جانە فرانتسيا ليگالارى كوش باستاپ تۇر.

- المانيا، ازەربايجان ەلىن قوسا العاندا، الەم بويىنشا ءبىزدىڭ ەلىمىزدە بۇل كلۋبتىڭ ءۇشىنشى فيليالى اشىلىپ جاتىر ەكەن. قادامدارىڭىز وڭ بولعاي! قازاقستان تاراپىنان «فەنەرباحچەنىڭ» قازاق ەلىنە كەلۋىنە قانداي دا ءبىر سۇرانىس بولدى ما؟

- نۇرسۇلتان نازارباەۆ «فەنەرباحچە» سپورت كلۋبىنىڭ باسشىسى الي كوك جانە ونىڭ دەلەگاتسياسىمەن وتكەن رەسمي كەزدەسۋ ۇستىندە قازاقستان فۋتبولىنا ءوز ۇلەسىن قوسىپ، ينۆەستيتسيا سالۋدى سۇراسا كەرەك. ال بۇل قازاقستاندا فۋتبول مەكتەبىنىڭ اشىلۋ جوسپارىن تەزدەتتى.

- فەنەرباحچەدە جاتتىعىپ، الەمدىك ارەنادا جۇرگەن قانداي تانىمال سپورتشىلار بار؟

- فەنەرباحچەدە وينايتىن الەمنىڭ تانىمال فۋتبولشىلارى: مەسۋت وزيل، ديميتريس پەلكاس، ەننەر ۆالەنسيا، لۋيس گۋستاۆو، مبۆانا ساماتتا، پاپيس سيسسە.

- قازاقستانداعى قازىرگى فۋتبول احۋالىن قالاي باعالار ەدىڭىز؟ ەلدەگى فۋتبول دەڭگەيىن كوتەرۋ ءۇشىن قانداي شارالار جاسالۋى ءتيىس دەپ ويلايسىز؟

- قازاقستاندا كۇرەس، بوكس، كيكبوكس سياقتى جەكەلەگەن سپورت تۇرلەرى جوعارى دەڭگەيدە دەپ ويلايمىن. ال فۋتبول سياقتى كوماندالىق ويىندار جاڭا جەتىستىكتەرگە جەتۋدى، ءالى دە شىڭدالۋدى قاجەتسىنەدى. بالالار 16 جاستان اسقاننان كەيىن جالعاستىرۋعا بولاتىن سپورتتىق ويىن سانى شەكتەۋلى. ال بىزگە تالانتتى جاستاردى 16 جاستان كەيىن جالعاستىرۋعا مۇمكىندىك بەرەتىن جاڭا كلۋبتار نەمەسە الەمدىك نارىققا شىعۋعا مۇمكىندىك بەرەتىن جاڭا ۇيىمدارمەن قامتۋ قاجەت.

- الماتىدا اشىلعان كلۋب قۇرامىنا توقتالىپ وتسەڭىز. جالپى كلۋبتا قانشا بالا بار؟ الماتىلىقتاردىڭ سىزدەرگە دەگەن ىقىلاسى قانداي بولىپ جاتىر؟ جاس فۋتبولشىلار سىزدەرگە قالاي كەلدى؟

- قازىرگى ۋاقىتتا بىزدە 30 بالا بار، ولار 5-15 جاس ارالىعىندا. الەۋمەتتىك جەلىنىڭ ارقاسىندا از ۋاقىت ىشىندە كلۋبقا كەلۋشىلەر سانى ارتىپ، قارقىندى دامىپ كەلەمىز. كلۋب جاتتىقتىرۋشىلارى كاسىبي فۋتبولدان كەلگەن جانە وسى سالادا تاجىريبەگە، مانساپقا، سونداي-اق قاجەتتى ليتسەنزيالارعا يە بىلىكتى ماماندار.

- قازاق جاستارى نەلىكتەن وتاندىق فۋتبول كلۋبتارىندا ەمەس، «فەنەرباحچەدە» جاتتىعىپ، شەبەرلىكتەرىن جەتىلدىرۋلەرى كەرەك دەپ ويلايسىز؟

- «فەنەرباحچە» – بۇل 114 جىلدىق تاريحى بار، وزىندىك جەتىستىكتەرى مەن چەمپيوندارعا تولى كلۋب. ءبىزدىڭ كلۋبتىڭ قازاقستاندىق كلۋبتاردان ەرەكشەلىگى – بىزگە كەلگەن بالا فۋتبولدى يگەرىپ قانا قويماي، اعىلشىن تىلىندە ەركىن سويلەيتىن بولادى. سونىمەن بىرگە بۇل جەر قاجەتتى جاتتىعۋلار مەن بىلىمگە جانە جان-جاقتى دامۋعا كومەكتەسەتىن ادىستەردى قولداناتىن ورتا.

- جالپى بۇل بالالار كلۋبىنىڭ العا قويعان ماقسات-مىندەتتەرى، جوسپارى قانداي؟

- ءبىزدىڭ ماقساتىمىز – فۋتبولدى جاقسى كورەتىن قازاق جاسوسپىرىمدەرى اراسىندا فۋتبولدى ودان ءارى تانىتىپ، ولاردىڭ دامۋىنا ءوز ۇلەسىمىزدى قوسۋ جانە تالانتتى جاستاردىڭ الەمدىك نارىققا تارالۋىنا كومەكتەسۋ.

- بىلۋىمشە، «فەنەرباحچە» فۋتبولدى عانا ەمەس، باسقا دا سپورتتىق ويىن تۇرلەرىن دامىتىپ وتىرعان اكادەميا. وسىعان توقتالىپ وتسەڭىز. اكادەمياداعى باسقا سپورتتىق ويىنداردىڭ جاعدايى قالاي؟

- «فەنەرباحچە» تۇركياداعى ەڭ كونە جانە تابىستى كلۋبتاردىڭ ءبىرى. اكادەميادا فۋتبولدى قوسپاعاندا، باسكەتبول، ۆولەيبول، جەڭىل اتلەتيكا، بوكس، ەلەكتروندى سپورت، ەسكەك ەسۋ، ۇستەل تەننيسى، جەلكەندى ءجۇزۋ جانە جالپى سۋدا ءجۇزۋ سەكىلدى سپورتتىڭ بەلسەندى سالالارى قامتىلعان. ماسەلەن، 2005 جىلى «فەنەرباحچەنىڭ» ەرلەر باسكەتبول كومانداسى FIBA EuroChallenge-دە ءتورت فينالدىق كەزەڭدە ونەر كورسەتتى; EuroLeague-دا 2007-2008 جىلدار ماۋسىمىندا شيرەك فينالعا دەيىن جەتىپ، 2014-2015 جىلعى ماۋسىمدا العاش رەت جارتىلاي فينالدىق كەزەڭگە جەتتى. 2015-2016 جىلعى ماۋسىمدا ەۋروليگانىڭ فينالىندا ويناپ، ەۋروپا قۇرلىعىنداعى ەكىنشى كوماندا اتاندى. ال 2016-2017 جىلدارعى ماۋسىمدا ەۋروليگا كۋبوگىن جەڭىپ العان العاشقى جانە جالعىز تۇرىك كومانداسى رەتىندە تاريحقا ەندى. سونىمەن قاتار كوماندا باسكەتبولشىلارى سوڭعى تورتتىك اينالىمعا قاتارىنان بەس رەت (2015, 2016, 2017, 2018, 2019 جىلدارى) كىرىپ، تۇرىك باسكەتبولىندا رەكورد تا جاسادى.

- بۇل ءبىر ورايى كەلگەن اڭگىمە بولدى، راحمەت! جاس فۋتبولشىلارعا، قازاق ەلىنە ايتارىڭىز بولسا، مارحابات؟

- مەنىڭ پايىماۋىمشا، قازاق جاسوسپىرىمدەرى سپورتتا وتە دارىندى جانە سپورتتى جاقسى كورەدى. مەن ولارعا ارقاشان تاباندى بولۋعا جانە ەشقاشان بەرىلمەۋگە كەڭەس بەرەمىن. سونداي-اق، جاستارعا ارمانداي بەرىڭىزدەر جانە سول ارماندارىڭىزدىڭ ورىندالۋى جولىندا ايانباي، تەر توگە بەرىڭىزدەر دەگىم كەلەدى. ال ءبىز ءوز تاراپىمىزدان الگى ارمانداردىڭ ورىندالۋى ءۇشىن ارقاشان سىزدەرمەن بىرگە بولامىز دەگىم كەلەدى. مەنەن سۇحبات الۋعا ىنتا بىلدىرگەنىڭىز ءۇشىن سىزگە دە راحمەت!

سۇحباتتاسقان: گۇلميرا اسىلبەكقىزى

پىكىرلەر