11 مامىر كۇنى رەسەي حالقى ءدۇر سىلكىندى. 19 جاستاعى لاڭكەس تاتارستان استاناسى قازان قالاسىندا №175 مەكتەپكە شابۋىل جاساپ، وقۋشىلاردى قىرىپ سالدى. الايدا بۇل رەسەي تاريحىنداعى مەكتەپكە جاسالعان العاشقى شابۋىل ەمەس.
2004 جىلدىڭ 1 قىركۇيەگىندە لاڭكەستەر توبى بەسلان قالاسىنداعى (سولتۇستىك وسەتيا-الانيا رەسپۋبليكاسى) №1 مەكتەپتى باسىپ الدى. شابۋىل جاساعانداردىڭ ناقتى سانى انىقتالعان جوق، رەسمي تەرگەۋ 32 سودىر تۋرالى ايتادى. ال كۋاگەرلەردىڭ ايعاقتارى ولاردىڭ سانى الدەقايدا كوپ بولدى دەيدى.
لاڭكەستەر 1128 ادامدى كەپىلگە الدى، ولاردىڭ كوپشىلىگى بالالار بولاتىن. الەم حالقى ءۇش كۇن بويى سودىرلار باسىپ العان مەكتەپكە نازارىن اۋداردى. بيلىك پەن لاڭكەستەر اراسىنداعى كەلىسىم ءساتسىز اياقتالىپ، مەكتەپتى اسكەريلەر كۇشپەن ازات ەتۋگە شەشىم قابىلدادى. بۇل كوپتەگەن ادامنىڭ قازاسىنا اكەلدى. 333 ادام قازا تاپتى، ونىڭ ىشىندە 186 وقۋشى بولاتىن. بەسلان وقيعاسىن ورىس-شەشەن سوعىسىنىڭ ەڭ قاندى وقيعاسى رەتىندە اتايدى. الايدا بۇل وقيعاعا رەسەي بيلىگىنىڭ تىكەلەي قاتىسى بار دەگەن بولجامدار دا جوق ەمەس.
2018 جىلدىڭ 17 قازانىندا كەرچ پوليتەحنيكالىق كوللەدجىنە شابۋىل جاسالدى. شابۋىل الدىندا جويقىن جارىلىس بولىپ، ارتىنشا قارۋلانعان لاڭكەس كوللەدجكە باسىپ كىردى. شابۋىل سالدارىنان 20 ادام قايتىس بولىپ، 65 ادام جاراقات الدى. رەسەي فەدەراتسياسىنىڭ تەرگەۋ كوميتەتى شابۋىل جاساۋشىنىڭ كىم ەكەنىن بىردەن انىقتادى. ول كوللەدجدىڭ ءتورتىنشى كۋرس ستۋدەنتى، 18 جاستاعى ۆلاديسلاۆ روسلياكوۆ بولىپ شىقتى. ول اۋىر جاراقاتپەن كوللەدج عيماراتىنىڭ بىرىنەن تابىلدى. كوپ ۇزاماي ول جاراقاتتان كوز جۇمدى. وقيعا فاكتىسى بويىنشا رەسەي فەدەراتسياسىنىڭ قىلمىستىق كودەكسىنىڭ 205-بابى («تەررورلىق اكت») بويىنشا قىلمىستىق ءىس قوزعالدى. الايدا كوپ ۇزاماي ونى رەسەي فەدەراتسياسى قىلمىستىق كودەكسىنىڭ 105-بابىنىڭ 2-بولىگىنە اۋىستىردى. «ەكى نەمەسە ودان دا كوپ ادامدى جالپى قاۋىپتى تاسىلمەن ءولتىرۋ» دەگەن ايىپ تاعىلدى. 2019 جىلدىڭ ساۋىرىندە بۇكىلرەسەيلىك مەملەكەتتىك ادىلەت ۋنيۆەرسيتەتىندە وتكەن دارىستە سويلەگەن رەسەي فەدەراتسياسى تەرگەۋ كوميتەتىنىڭ توراعاسى الەكساندر باسترىكين كەرچ كوللەدجىندە بولعان اتىستىڭ سەبەبىن «لاىكەسكە كوللەدج قابىرعاسىندا جاسالعان قىسىمنان» دەپ اتادى. باسترىكيننىڭ ايتۋىنشا، ۆلاديسلاۆ روسلياكوۆ «ءوزىنىڭ سىنىپتاستارى تاراپىنان ۇنەمى قورلىق كورگەن».
2021 جىلدىڭ 11 مامىرىندا تاتارستان استاناسىندا ءوزىن «قۇداي» دەپ اتاعان 19 جاستاعى يلناز گالياۆيەۆ مەكتەپ وقۋشىلارى مەن مەكتەپ قىزمەتكەرلەرىن اتىپ تاستادى. 8 مينۋت ىشىندە كەم دەگەندە توعىز ادام قايتىس بولىپ، تاعى 23 ادام جاراقات الدى. قازا تاپقانداردىڭ ىشىندە 7 وقۋشى بار. لاڭكەس شابۋىلعا تياناقتى دايىندالعان. ول ارنايى قارۋ ساتىپ الىپ، زاڭدى نەگىزدە تىركەتكەن. سوندىقتان ەش قيىندىقسىز شابۋىلعا بىرنەشە كۇن قالعاندا 200 وق ساتىپ الۋعا مۇمكىندىك العان. مەكتەپكە شابۋىل جاسايتىن كۇنى تاڭەرتەڭ كەلىپ، ساباق كەستەسىن، قوڭىراۋ ۋاقىتىن ءبىلىپ العان. ارتىنشا الەۋمەتتىك جەلىگە "كوپتەگەن ادامداردى ولتىرەتىنىن" جازىپ، قارۋىن اسىنىپ، مەكتەپكە كەلگەن. سولايشا ءوزىنىڭ قىلمىسىن ىسكە اسىرعان. قازىرگى تاڭدا ول تەرگەۋدە وتىر.
اسحات قاسەنعالي،
"ادىرنا" ۇلتتىق پورتالى
