مالايزيالىق Elektro Serve (M) Sdn Bhd كومپانياسى مەن قازاقستاندىق Alshin-West جشس كومپانياسى اتىراۋ قالاسىندا Alshin Elektro Serve بىرلەسكەن كاسىپورنىن قۇرۋ تۋرالى كەلىسىمگە قول قويدى.
ءىس-شاراعا قاتىسقان اتىراۋ وبلىستىق كاسىپكەرلىك جانە يندۋستريالىق-يننوۆاتسيالىق دامۋ باسقارماسى باسشىسىنىڭ مىندەتىن اتقارۋشى قانىش مامبەتوۆ جەرگىلىكتى بيلىك ءوڭىردىڭ دامۋى مەن جەرگىلىكتى ازاماتتارعا جۇمىس ورنىن بەرەتىن ينۆەستيتسيالىق جوبالاردى كوپتەپ ىسكە قوسۋ ءۇشىن اۋقىمدى جۇمىستار جۇرگىزىپ جاتقانىن اتاپ ءوتتى.
ال نۇر-سۇلتان قالاسىنان ارنايى كەلگەن قازاقستانداعى مالايزيا مەملەكەتىنىڭ ەلشىسى سايد ابدۋ راحمان باستاماعا ساتتىلىك تىلەپ، ورتاق جوبالار جالعاسىن تابادى دەگەن سەنىمىن ءبىلدىردى.
ەكى ەلدىڭ ورتاق جوبا قۇرۋىنىڭ باستاۋى “Kazakh Invest” ۇك” اق باسشىلىعىنىڭ 2019 جىلى مالايزياعا جاساعان ساپارىنان باستالادى.
بىرلەسكەن كاسىپورىن جوعارى ۆولتتى قوزعالتقىشتارعا، گەنەراتورلارعا، كومپرەسسورلارعا، سورعىلار مەن تۋربوماشينالارعا تەحنيكالىق قىزمەت كورسەتەدى، سونداي-اق جوندەيدى.
Elektro Serve (M) Sdn Bhd جىلى ەلەكتر جابدىقتارىن، مەحانيكا مەن اسپاپتاردى جوبالاۋ جانە ءوندىرۋ بويىنشا مامانداندىرىلعان كومپانيا رەتىندە 1990 جىلدارى قۇرىلعان. قازىرگى كەزدە جوعارى ۆولتتى جابدىقتارعا (موتورلار، گەنەراتورلار) تەحنيكالىق قىزمەت كورسەتۋ جانە جوندەۋ بويىنشا مالايزياداعى ءنومىرى ءبىرىنشى كومپانيا سانالادى. تومەن جانە جوعارى كەرنەۋلى گەنەراتورلارعا قىزمەت كورسەتەدى، دياگنوستيكا جاسايدى، جوندەۋدەن وتكىزەدى جانە قايتا ورايدى.
Elektro Serve (M) Sdn Bhd-نىڭ Jeumont Electric, Indar سونداي-اق Schneider Electric سەكىلدى بىرنەشە تانىمال حالىقارالىق تۇپنۇسقالىق جابدىق وندىرۋشىلەرىمەن بىرلەسكەن كاسىپورىندارى دا بار.
قازاقستان جاعىنان سەرىكتەس بولىپ وتىرعان “Alshin-West” جشس ءوز كەزەگىندە قاجەتتى ينفراقۇرىلىممەن، وندىرىستىك بازالار، جابدىقتار جانە جەرگىلىكتى كادرلارمەن قامتاماسىز ەتەدى. 2016 جىلدان بەرى تومەن ۆولتتى ەلەكتر قۇرالدارىن جوندەۋ سالاسىندا جۇمىس ىستەپ كەلە جاتقان وتاندىق كومپانيا ورتاق كاسىپورىن ارقىلى سەرۆيستىك قىزمەت كورسەتۋدە ەۋروپالىق ستاندارقا ساي جاڭا دەڭگەيگە شىعادى. “Alshin-West” جشس باسشىسى ورازكەلدى ساتامباقىنىڭ ايتۋىنشا، بۇعان دەيىن ءوڭىرىمىزدىڭ ءىرى مۇناي-گاز كومپانيالارى قۇرال-جابدىقتارىن ەۋروپاعا اپارىپ جوندەتىپ جۇرگەن. بۇدان بىلاي ەۋروپاعا دا تانىمال مالاي كومپانياسىمەن بىرلەسە وتىرىپ اتالعان كومپانيالارعا اتىراۋدىڭ وزىندە-اق ساپالى قىزمەت كورسەتۋدى جوسپارلاپ وتىر.
ال Elektro Serve (M) Sdn Bhd بولسا، جەرگىلىكتى مامانداردى وقىتۋ ءۇشىن ەڭ جاڭا جابدىقتار، تەحنولوگيالار، ستاندارتتار، پروتسەدۋرالار جانە بىلىكتى ينجەنەرلەرمەن قامتاماسىز ەتەدى. اتالعان كومپانيانىڭ باس تەحنيكالىق ديرەكتورى كيرك جان بەلياننىڭ ايتۋىنشا، الداعى ۋاقىتتا رەسەي نارىعىنا كىرۋ دە جوسپارلانعان.
باستى ماقساتىمىز — ساپالى سەرۆيس ءداستۇرىن قالىپتاستىرۋ. باستاپقىدا مۇناي سالاسىنداعى ءىرى كاسىپورىندارعا قىزمەت كورەتەمىز. بولاشاقتا موتور جانە گەنەراتورلار مەن باتىرىلاتىن سورعىلاردى شىعارۋدى دا ويلاستىرىپ وتىرمىز. بىرلەسكەن كاسىپورىندى قازاقستاننىڭ اتىراۋ قالاسىنان باستاۋمىزدىڭ دا وزىندىك ءمانى بار. ءبىزدىڭ قىزمەت كورسەتۋىمىزگە لايىقتى ءىرى مۇناي كومپانيالارى وسىندا كوپ. الداعى جىلدارى رەسەي نارىعىنا كىرۋ دە جوسپاردا بار،-دەيدى.
قازىر 4 جەرگىلىكتى مامان ارنايى وقۋدان ءوتىپ، جۇمىسقا كىرىسكەن. جىل سوڭىنا دەيىن ولاردىڭ سانىن 20 ادامعا جەتكىزۋ جوسپارلانىپ وتىر.
