قازانداعى قاندى قىرعىن: وقۋشىلاردى ولتىرگەن قىلمىسكەر تۋرالى تىڭ اقپارات شىقتى

4715
Adyrna.kz Telegram

مەكتەپتەگى قىرعىن. مۇزداي قارۋلانعان بوزبالا ورتا ءبىلىم ورداسىنا باسا كوكتەپ كىرىپ، سەگىز ادامدى اتىپ تاستادى. وقۋشىلار جانۇشىرا جان-جاققا قاشىپ، ەسىككە سىيماعانى ءۇشىنشى قاباتتىڭ تەرەزەسىنەن سەكىرگەن. قاننەن-قاپەرسىز جۇمىس كۇنىندە قاس پەن كوزدىڭ اراسىندا مەكتەپتى ازان-قازان قىلعان قازانداعى قاندى قىرعىن جايلى "ادىرنا" ۇلتتىق پورتالى "ەۋرازيا" بىرىنشى ارناسىنا سىلتەمە جاساپ حابارلايدى.

مەكتەپتىڭ ماڭىنداعى تۇرعىندار اۋەلى نە بولعانىن تۇسىنبەگەن. تارس-تۇرس ەتكەن دىبىستاردى ەستىپ، تەلەفونعا ءتۇسىرىپ تۇرا بەرىپتى. ءدال وسى كەزدە ءبىلىم ورداسىنىڭ ىشىندە جەتكىنشەكتەر بىرىنەن سوڭ ءبىرى وققا ۇشىپ جاتىر ەدى.

جوعارى سىنىپتا وقيتىن قاسكوي ءبىر مۇعالىم مەن بەس وقۋشىنى جايراتىپ تاستاپ، ارى قاراي اتا بەرگەن. امان قالۋ ءۇشىن ءۇشىنشى قاباتتىڭ تەرەزەسىنەن سەكىرگەن بالالاردىڭ ەكەۋى اسفالتقا قۇلاپ، سول جەردە ءتىل تارتپاي  كەتكەن. تاعى 20-عا جۋىق ادام جارالاندى. تورتەۋى جانساقتاۋ بولىمشەسىندە جاتىر.

وقۋشىنىڭ اناسى:

ناقتى ەشتەڭە بىلمەيمىز، اۆتوماتتىڭ داۋسى ەستىلدى. ارتىنان جارىلىس بولدى دەيدى. جارالانعاندار كوپ دەپ ەستىدىك. ەشتەڭەنى ءتۇسىنىپ ۇلگەرمەستەن، ءبارى قاشا جونەلدى. سوسىن كۇشتىك قۇرىلىم وكىلدەرى ىسكە كىرىستى».

قاتارلاستارىنا اۆتوماتتان وقتى قارشا بوراتقان قاندىقول 19 جاستاعى يلناز گالياۆيەۆ بولىپ شىقتى. قىلمىس جاساماس بۇرىن ارام ويى تۋرالى الەۋمەتتىك جەلىگە جازعان دا ەكەن. بىراق ەشكىم ءمان بەرمەگەنگە ۇقسايدى. ول ادامداردى بيولوگيالىق قوقىسقا تەڭەپ، الەمدى تازارتاتىنىن مالىمدەگەن. وزگەلەردى دە وسى ىسكە شاقىرىپتى.

وقيعا ورنىنا جەتكەن تاتارستان پرەزيدەنتى رۋستام ميننيحانوۆ قاندىقول قاراقشىنىڭ اتىنا تىركەلگەن رەسمي قارۋى بار دەپ مالىمدەدى. سونداي-اق قازا بولعان ادامداردىڭ وتباسىنا جانە زارداپ شەككەندەرگە كومەك كورسەتىلەتىنىن ايتتى.

رۋستام ميننيحانوۆ، تاتارستان پرەزيدەنتى:

بۇل اۋىر قايعى. ءبىز جەتى بالامىزدان ايرىلىپ قالدىق. ءبارى سەگىزىنشى سىنىپتىڭ وقۋشىلارى. ءتورت ۇل، ءۇش قىز. تاعى 16 ادام، 12 بالا مەن 4 ەرەسەك جاراقاتپەن اۋرۋحاناعا جاتقىزىلدى».

شۇعىل ارەكەت ەتكەن قارۋلى كۇشتەر مەكتەپ اۋماعىندا كونترتەرروريستىك وپەراتسيا جۇرگىزىپ، مەرگەندى قولعا ءتۇسىردى. ازىرگە ونىڭ سىبايلاستارىنىڭ بار-جوعى انىقتالىپ جاتىر. قالاداعى بارلىق وقۋ ورنىنىڭ كۇزەتى كۇشەيتىلدى. ال بەيبىت كۇندە وققا ۇشىپ، وتباسىن قارا جامىلدىرعان قۇرباندار ءۇشىن ەرتەڭگى كۇن، ياعني 12 مامىر تاتارستاندا ازا تۇتۋ كۇنى دەپ جاريالاندى.

"ادىرنا" ۇلتتىق پورتالى 

پىكىرلەر