سۋديا جولمانوۆا سەيفىنەن تابىلعان 10 مىڭ دوللار تۋرالى بار شىندىقتى ايتتى

5701
Adyrna.kz Telegram

ءىرى كولەمدە پارا الدى دەپ كۇدىككە ىلىنگەن الماتى قالاسى مەدەۋ اۋداندىق سوتىنىڭ سۋدياسى سۆەتلانا جولمانوۆا جۇرتتان اراشا سۇراپ، بولعان ءىستىڭ ءمان جايىن ءوز اۋزىمەن ايتتى دەپ حابارلايدى «ادىرنا» ۇلتتىق پورتالى Dalanews.kz سايتىنا سىلتەمە جاساپ.

جۋرناليستەرمەن وتكەن ونلاين كەزدەسۋدە سۋديا ءوزى تۋرالى الەمجەلىدە تاراعان الىپ-قاشپا اقپاراتقا قاتىستى تۇسىنىك بەرىپ، سەيفتەن تابىلعان 10 مىڭ دوللاردىڭ «شىعۋ تەگىن» بايان ەتتى.

ونىڭ اتاپ وتكەنىندەي الگى قاراجات ءوز جيناعى، ونىڭ وزىندە تۇتاستاي ەمەس. قارجىنىڭ ءبىر بولىگىن پاتەر ساتىپ الۋ ءۇشىن قارىزعا العان.

«تۇركىسب اۋدانىندا تۇراتىن شەشەمنىڭ ءۇيىن ساتىپ، ونىڭ ۇستىنەن از-ماز اقشا قوسىپ، تاپ جانىمنان پاتەر ساتىپ الۋدى ۇيعارعانبىز. سول كۇنى وتباسى بانككە بارۋدى ويلاستىرىپ، العاشقى جارنانى اۋدارۋ ءۇشىن اقشانى جۇمىسقا الىپ كەلگەن جايىم بار ەدى»، – دەيدى جولمانوۆا.

«مىنا زاماندا اقشانى جۇمىستا ساقتاۋشى ما ەدى؟» دەگەن جۋرناليستەر ساۋالىنا سۋديا قوماقتى قاراجاتتى ۇيدە ساقتاۋدان سەزىكتەنگەنىن، بالالاردىڭ كوزىنە ءتۇسىپ جۇمسالىپ كەتەرىنەن قاۋىپتەنگەنىن ايتتى.

سوتتىڭ قىزمەتى قاۋىرت بولعاسىن تاڭنان كەشكە دەيىن ءۇي بەتىن كورمەيتىن ساتتەر كوپ. كەي كەزدە بالالارى كەشكى تاماقتى ۇيگە الدىرادى ەكەن.

«سوندىقتان اقشانى ۇيدە ساقتاعاندى ءجون كورمەدىم. ۇيگە كۋرەرلەر ءجيى كەلەدى. بەيساۋات جۇرگەن بىرەۋدىڭ كوزىنە تۇسسە اقشادان بۇرىن، وتباسىم سورلاپ قالار ەدى»، – دەيدى سۋديا.

...

جولمانوۆانىڭ بۇدان وزگە كاپيتالى جوق. ميلليون دوللار تۋرالى الەمجەلىگە لەزدە تاراپ كەتكەن اقپارات – جالعان. كولىگىندە دە، كۆارتيراسىندا دا مۇنداي قاراجات تابىلماعان.

ءسوي دەگەن سۋديا ءتىپتى كولىگى دە جوق ەكەنىن ءمالىم ەتتى. ال سەيفتەن تابىلعان 10 مىڭ دوللار زاڭدى تابىسى، قالاي، قايدان كەلگەنىن ءتۇسىندىرىپ بەرە الاتىنىن ايتادى.

«كولىگىم مەن پاتەرىمنەن استا-توك اقشا تابىلدى دەپ «الاقايلاعاندار» وسى ارقىلى قوعامدى مىنا ماعان قارسى قويماق بولدى. مەن عانا ەمەس، تۇتاس سوت سالاسىنا كىر كەلتىرۋدى كوزدەدى»، – دەيدى ول.

...

جولمانوۆا ءوزىنىڭ كوزىن الا بەرە ۇيىنە باس-كوكتەپ كىرىپ، ءتىنتۋ جۇرگىزگەن تەرگەۋشىلەرگە نارازى. سەبەبى ءتىنتۋ سوتتىڭ سانكتسياسىنسىز جانە باس پروكۋروردىڭ پارمەنىنسىز جۇرگىزىلگەن. سۋديا لاۋازىمىنىڭ يممۋنيتەتى تابانعا تاپتالعان.

تەرگەۋشىلەر ۇيدە بالا-شاعا بارىنا قاراماي ءتىنتۋدى باستاپ كەتكەن. سۋديانىڭ ۇيدە جوقتىعىن پايدالانىپ، باسپانانى استاڭ-كەستەڭىن شىعارماق ويى بولعان.

«ءۇيىمدى تىنتىگەلى جاتقانىن ەستىپ، ونىڭ الدىن-الۋ ءۇشىن ەدەل-جەدەل ارەكەت ەتتىم. ايتسە دە بوساعاعا ءوتىپ ۇلگەرىپتى. كابينەتىمدى تىمىسكىلەپ بولعانىن كەيىن مەنىڭ كوزىمشە ءۇيدى اقتارۋعا كوشتى. تۇك تاپپادى. ال كولىك اتاۋلى مەندە اتىمەن جوق»، –  دەيدى جولمانوۆا.

...

كابينەتىندەگى 10 مىڭ دوللار ادال اقىسى ەكەنىن، قوعامدىق كولىكپەن جۇرەتىنىن، ال ءۇيىن تىنتىگەندەر تۇك تاپپاعانىن ءمالىم ەتكەن سۋدياعا قانداي ايىپ تاعىلىپ وتىر؟

Dalanews.kz ءتىلشىسى وسى ماسەلەنىڭ انىق-قانىعىن ءبىلۋ ءۇشىن سۋدياعا ساۋال قويعان ەدى.

ول ءوزىنىڭ كۇدىكتى ەمەس، كۋاگەر ەكەنىن، وزىنە قاتىستى قانداي قىلمىستىق ءىس قوزعالعانىنان الىگە دەيىن حابارسىز ەكەنىن ايتادى. ونىڭ ءتىنتۋ كەزىندە دە، ءازىر دە بوستاندىقتا جۇرگەنى سودان بولسا كەرەك.

بۇدان بۇرىن بىرقاتار باق: «جولمانوۆا قۇرىلىس كومپانياسىنان ميلليون دوللارعا جۋىق پارا الدى» دەگەن اقپارات تاراتقان-دى.

سۋديا مۇنى جوققا شىعارىپ وتىر.

«قۇرىلىس كومپانياسىنان كوك تيىن العان ەمەسپىن. مويىندايىن، وسىعان دەيىن قۇرىلىس سالاسىنا قاتىستى ءىس-قۇجاتتى قاراستىرعانىم راس. مەن عانا ەمەس، بۇلارعا قاتىستى باسقا دا سۋديالار حالىقتىڭ ءسوزىن سويلەپ، تەرىس شەشىم شىعاردى.

ماسەلەن «ەسەنتاي ءسيتيدىڭ» داۋى. مەن تۇرعىنداردىڭ شاعىمىن زاڭدى دەپ تانىپ، اۋقىمى كەڭەيىپ جاتقان تۇرعىن-ءۇي كەشەنىنىڭ كەسىرىنەن اۋلاسىنا وتە الماي قالعانىن ازاماتتاردى اقتاپ شىقتىم. «ەۋروپوليس» تۇرعىن-ءۇي كەشەنىنە ارىزدانعان تۇرعىنداردىڭ تالابىن تىڭداپ، ءۇيدىڭ قولدانىسقا بەرىلۋىن زاڭسىز دەپ تاپتىم»، – دەيدى ول.

...

جولمانوۆا تەرگەۋدى ۇلتتىق قاۋىپسىزدىك كوميتەتى جۇرگىزىپ جاتقانىنا تاڭ. زاڭعا ساي كوررۋپتسيا جانە الاياقتىق ىستەردى ۇقك تەرگەمەيدى. مۇنىمەن سىبايلاس جەمقورلىققا قارسى اگەنتتىك نەمەسە پوليتسەيلەر اينالىسۋى ءتيىس.

«ۇقك-نىڭ مەندە نە جۇمىسىن بارىن تۇسىنبەي-اق قويدىم. مۇنىڭ باسىندا تويباەۆ سۇلتان دەگەن كوميتەت وكىلى وتىر. ءىستى ۋىستان شىعارماي وتىرعان دا سونىڭ ءوزى. ونىڭ قوس قىزمەتى بار. الماتى قالالىق سوتى توراعاسىنىڭ كەڭەسشىسى قىزمەتىن قوسا اتقارادى»، – دەيدى سۋديا.

...

ىلگەرىدە سوت يممۋنيتەتى تۋرالى ءسوز قوزعاعانبىز. ناقتىلاساق، سۋديالار سوت بيلىگىن جۇزەگە اسىرۋشى تۇلعا رەتىندە بىرقاتار نورماتيۆتىك اكتىلەرمەن، سونىڭ ىشىندە قر كونستيتۋتسياسىمەن جəنە كونستيتۋتسيالىق زاڭدارمەن ايقىندالعان ارنايى مəرتەبەگە يە.

– الايدا، – دەيدى جولمانوۆا. مەنى ءبىر جولى بويى تورىپ كەلگەن ەكەن. كابينەتىمە جاسىرىن كامەرا ورناتىپ، كىرگەن-شىققانىمدى اڭدىپ وتىرعان. مۇنى ءبىر توپ ادام كابينەتىمە باسىم كىرگەن كۇنى ءبىر-اق ءبىلدىم. ءتىپتى كەڭەسۋ بولمەسىندە دە كامەرا ورناتىلىپتى.

ايتۋىنشا وسىلايشا ونىڭ سۋديالىق يممۋنيتەتى تابانعا تاپتالعان. كەڭەسۋ بولمەسى ادەتتە سۋديانىڭ ءىستىڭ ءمان-جايىنا ءۇڭىلىپ، شەشىم شىعاراتىن كابينەتى. ارنايى مارتەبەگە ساي سۋديا تاۋەلسىز تۇلعا، وعان ەشكىم قىسىم جاساماۋى قاجەت، ولاردىڭ سوڭىنان شام الىپ ءتۇسىپ، باسقان ءىزىن اڭدۋعا ەشكىمنىڭ قۇقى جوق.

ءسوي دەگەن جولمانوۆا «ماعان كەپىلدىك بەرىلگەن يممۋنيتەت ءادىرام قالدى»، – دەيدى.

...

Dalanews.kz ءتىلشىسىن تاڭعالدىرعان تاعى ءبىر جايت – قۇرىقتاۋ كەزىندە جولامانوۆانىڭ تەلەفونىن شۇقىلاپ، جايباراقات وتىرعانى. مۇنى قالاي تۇسىنەمىز؟

«تۇسىنبەيتىن نەسى بار؟ مەن ءوزىمنىڭ ادالدىعىما، تازالىعىما سەنىمدىمىن. سوندىقتان سابىر ساقتاپ وتىردىم. زاڭعا تومپاق كەلەرلىك ارەكەت ەتكەن جوقپىن. “سانكتسيامەن كەلدىك” دەگەندەردى كابينەتىمە كىرگىزدىم، ءتىنتۋ جۇرگىزۋگە رۇقسات بەردىم. سول ساتتە تەلەفونىما تىنىم بولماي، الاڭداعان ارىپتەستەرىم حابار-وشار سۇراي باستادى. سولارعا جاۋاپ جازىپ جاتقان ءسات سۋرەتكە ءتۇسىپ قالسا كەرەك»، – دەيدى جولمانوۆا.

ابىر-سابىر ساتتە تەلەفونىنا ۇلى حابارلاسىپ، تەرگەۋشىلەردىڭ ءۇيدى تىنتۋگە كەلگەنىن حابارلاعان. جولمانوۆا شۋ كوتەرىپ، ءوزى جوقتا ءۇيدى تىنتۋگە كەلگەندەردىڭ ارەكەتى زاڭسىز ەكەنىن ايتقان.

...

اتالعان ءىستىڭ قوعامدىق رەزونانس تۋعىزۋىنا اتىشۋلى بلوگەر ايگۇل ورىنبەكتىڭ جازباسى ايتارلىقتار اسەر ەتكەنى انىق.

بلوگەردىڭ جازباسىندا جولمانوۆانىڭ كابينەتىنەن 4500 دوللار، ءۇيىن ءتىنتۋ كەزىندە 2 800 000 دوللار، جەكە كولىگىنەن 600 000 دوللار تابىلعانى ايتىلعان-تىن. سونداي-اق مەدەۋ اۋداندىق سوتىنىڭ سۋدياسى قۇرىلىس سالۋشىدان 1 180 000 دوللار كولەمىندە پارا العانى تۋرالى اقپاراتتى ورىنبەكتەن وقىعان ەدىك.

«وسى راس پا؟ ورىنبەك بۇل مالىمەتتى قايدان الدى؟» دەگەن Dalanews ساۋالىنا «جوق» دەپ جاۋاپ بەرگەن جولمانوۆا قازاقستانداعى سۋديالار وداعى ار-نامىسىن اياققا تاپتاتپاي، وزىنە اراشا تۇسەرىنە سەنىمدى.

«سەبەبى مۇنىڭ ءبارى جالعان. مەن قوعامدىق كولىكپەن جۇرەمىن. ماشىنەم جوق. ال ءۇيدى ءتىنتۋ كەزىندە تۇك تاپپادى»، – دەيدى ول. سوزىنە قاراعاندا قازىرگى سيتۋاتسيا تولىق شەشىمىن تاپقاننان كەيىن، ءىسى ايگۇل ورىنبەكپەن بولماق.

...

جولمانوۆا بۇل ءىستىڭ قولدان قۇرالعانىن، قۋدالاۋدى قاستىق ويلاعاندار ۇيىمداستىرعانىن ايتادى.

ولاردىڭ اتىن اتاعان سۋديا «سوت جۇيەسىنىڭ تازالىعى مەن تاۋەلسىزدىگىن قورعاعانىم ءۇشىن «سۇيكىمسىز» اتاندىم» دەپ سانايدى.  پىكىرىنشە بۇل داۋدىڭ باستاۋىندا باسشىلىقپەن اراداعى كونفليكتى تۇر.

«مەدەۋ اۋداندىق سوتىنىڭ توراعاسى اسەت بورانباەۆ پەن الماتى قالالىق سوتىنىڭ توراعاسى اسقار سمايلوۆتىڭ ۇزاق ۋاقىت بويعى زاڭسىز ءىس-ارەكەتتەرىنە قارسى تۇردىم. سۋديالار شەشىمىنە ىقپال ەتىپ، قىسىم كورسەتۋىنە كەدەرگى كەلتىردىم.

اۋداندىق سوت توراعاسى ءبىزدىڭ جۇمىسقا سەپتىگىن تيگىزەتىن مامانداردى، حاتشىلاردى قۋدالاپ، جۇمىستان شىعارا باستادى. ءاربىر سۋديانىڭ حاتشىسى بولۋى كەرەك. بىلايشا ايتقاندا وڭ قولى. بۇلاردىڭ جۇكتەمەسى كوپ، جالاقىسى از.

ءبىزدىڭ شۇعىل شەشىم شىعارىپ، جۇمىستى جەدەل جۇرگىزۋىمىز وسى كومەكشىلەرگە تىرەلىپ تۇر. ال بورانباەۆ بولسا، ولارعا سەبەپسىزدەن سوقتىعىپ، تىرناق استىنان كىر ىزدەدى. سالدارىنان 6 حاتشى جۇمىستان كەتتى»، – دەيدى جولمانوۆا.

سۋديا وسىنى ايتىپ، جاقىن اسانوۆقا دەيىن جەتكەن. ماسەلە شەشىمىن تاپقانداي بولعان. الايدا كەيىن قالالىق سوتتىق توراعاسى اۋىسىپ كەتىپ، جاعداي قايتا ۋشىعىپتى.

«قالالىق سوت توراعاسى اسقار سمايىلوۆ ىندەت اسقىنىپ، كارانتين كۇشەيگەن شاقتا بىزدەردى جۇمىسقا شىعۋعا ماجبۇرلەدى. ءسويتىپ باس سانيتاردىڭ قاۋلىسىن بۇزدىق. ەكى سۋديا كوۆيدتان كوز جۇمدى. مۇنى كورە وتىرىپ، ءۇنسىز قالا المادىم. سمايلوۆتىڭ اتىنا ارىز جولداپ، ەكى سۋديانىڭ قايتىس بولعانىن ەسىنە سالىپ، قازىرگى شاقتا قاشىقتان جۇمىس ىستەۋىمىز قاجەت دەدىم. اشىعىن ايتقاندا، وعان ءوز پىكىرىمدى بىلدىرگەنىم ءۇشىن ۇناماي قالدىم»، – دەيدى جولمانوۆا.

ايتۋىنشا قالالىق سوت توراعاسى قىزمەتىنە تاعايىندالعان العاشقى كۇننەن باستاپ سوت شەشىمدەرىنە ارالاسا باستاعان. «تاپسىرىسىن» ورىنداماعان سۋديالاردىڭ جۇمىسقا بوسايتىنىن ايتىپ، قورقىتىپ-ۇركىتكەن.

«ءدال سولاي بۇيىرعان جازباسى بار. ءبىزدىڭ قانداي شەشىم قابىلداۋ كەرەگىمىزدى ايتىپ، ىسكە تۇمسىق تىعۋىن دوعارعان جوق. بۇعان قارسى شىققان مەنى جازالاي المادى. سەبەبى جۇمىسىمدا اعاتتىق جوق ەدى.

توق ەتەرىن ايتقاندا، مەن ءوز ىسىمە ادالمىن. اقىلعا سياتىن، زاڭ اياسىنداعى ادىلەتتى شەشىمدەر قابىلدادىم»، - دەيدى سۋديا جولمانوۆا.

ازىرلەگەن، دۋمان بىقاي

پىكىرلەر