ايماق باسشىسى ماحامبەت دوسمۇحامبەتوۆ اۋىل شارۋاشىلىعىن دامىتۋ ارقىلى باعانى تۇراقتاندىرۋعا مۇمكىندىك بولاتىنىن ايتتى.
ءوڭىر باسشىسىنىڭ توراعالىعىمەن وتكەن وتىرىستا اۋىل شارۋاشىلىعىنا قاتىستى، اسىرەسە كوكتەمگى ەگىس ناۋقانىنا دايىندىق تۋرالى باسقارما باسشىسى امانگەلدى سالامات كەڭىنەن باياندادى.
«وڭىردە ەگىستىكتەن جوعارى ونىمدەر الۋعا ۇلكەن سەپتىگىن تيگىزىپ كەلە جاتقان تامشىلاتىپ سۋارۋ تەحنولوگياسىنا كوڭىل بولىنۋدە. اعىمداعى جىلى تامشىلاتىپ سۋارۋ تەحنولوگياسىمەن ەگىلەتىن ەگىستىك كولەمدەرىن 161 گەكتارعا ۇلعايتىپ، 3167 گەكتارعا جەتكىزۋگە، جاڭبىرلاتىپ سۋارۋ تەحنولوگياسىن 80 گەكتارعا ۇلعايتىپ، 776 گەكتارعا جەتكىزۋ جوسپارلانۋدا»،- دەدى اۋىل شارۋاشىلىعى باسقارماسىنىڭ باسشىسى امانگەلدى سالامات.
سونىمەن قاتار، باسقارما باسشىسى وبلىس بويىنشا اعىمداعى جىلى ەگىستىك جۇمىستارىمەن 1 600 جۋىق ادامى بار 390 اۋىل شارۋاشىلىعى قۇرىلىمدارى جۇمىس جاسايتىنىن جەتكىزدى. وعان قوسا كوكتەمگى ەگىس جۇمىستارىن اتقارۋعا 862 تراكتور مەن اۋىل شارۋاشىلىعى تەحنيكالارى ناۋقاندىق جۇمىستارعا تولىق دايىن ەكەنىن مالىمدەدى.
جيىندا ءوڭىر باسشىسى ماحامبەت دوسمۇحامبەتوۆ سالاعا قاتىستى بىرقاتار تاپسىرمالار بەردى.
«وڭىرىمىزدە تەك مۇناي مەن گاز ءوندىرۋ سالاسىندا عانا ەمەس، اۋىل شارۋاشىلىعىن دامىتۋعا دا قولايلى ايماقتار جەتەرلىك. وبلىسىمىزداعى جايىق، ويىل جانە جەم وزەندەرى سۋارمالى ەگىن شارۋاشىلىعىن ورىستەتۋگە ۇلكەن مۇمكىندىك بەرەدى. وسى جاعدايدى ءتيىمدى پايدالانا وتىرىپ، ەگىن شارۋاشىلىعىن ىلگەرىلەتۋ باعىتىندا جاڭا جوبالاردى ىسكە قوسۋ تەتىكتەرىن قاراستىرۋ قاجەت. سول ارقىلى ءبىز سالانى دامىتىپ، ازىق-تۇلىك قاۋىپسىزدىگىن قامتاماسىز ەتە الامىز. سونداي-اق، اۋىل شارۋاشىلىعى ونىمدەرىن سىرتتان تاسىماي، وزىمىزدە كوپتەپ ءوسىرۋ ارقىلى باعانى تۇراقتاندىرۋعا مۇمكىندىك جاسايمىز. بۇل ءبىزدىڭ باستى ماقساتىمىزدىڭ ءبىرى»،- دەدى ايماق باسشىسى ماحامبەت دوسمۇحامبەتوۆ.
سونداي-اق، وبلىس اكىمى ءبىرىنشى كەزەكتە سالانىڭ جۇمىستارىن يگەرۋدە جەرگىلىكتى تۇرعىنداردى قامتۋ قاجەتتىگىن باسا ايتتى.
ال، باسقارما باسشىسى جەرگىلىكتى تۇرعىنداردى جۇمىسقا شاقىرعانمەن قىزىعۋشىلىق تانىتپاي وتىرعانىن، بەس جۇزدەي شەتەلدىك ازاماتقا ماۋسىمدىق جۇمىستارعا بايلانىستى شەكارادان وتۋگە رۇقسات بەرىلگەنىن، ولارسىز، جوسپارداعى ءونىم الىنباي قالۋ مۇمكىن ەكەنىن جەتكىزدى.
ايماق باسشىسى اتالعان ماسەلەنى بىرتىندەپ شەشۋ قاجەتتىگىن تاپسىردى.
سونداي-اق، باسقارما باسشىسىنىڭ مالىمەتىنشە، بيىل اۋىل شارۋاشىلىعى تاۋار وندىرۋشىلەرىنە سۋبسيديالىق قولداۋلار جاساۋعا 262 ملن تەڭگە قاراجات بولىنگەن. وعان قوسا، رەسەيدىڭ استراحان قالاسىندا وتكەن سەمينار-كورمە جۇمىسىنا ءوڭىردىڭ بىرنەشە اۋىل شارۋاشىلىعى كاسىپورىندارى قاتىناسىپ، تۇقىم، تەحنولوگيا، وسىمدىك قورعاۋ قۇرالدارىنا بايلانىستى شارتتار جاساسىپ كەلگەنى ايتىلدى.
ايتا كەتۋ كەرەك، بيىل «قازسۋشار» مەكەمەسىنىڭ 14 سۋارۋ-سۋلاندىرۋ جۇيەسى وبلىستىڭ 9 مىڭ جارىم گەكتاردى قۇرايتىن ەگىستىك كولەمىن سۋارادى.
