Aımaq basshysy Mahambet Dosmuhambetov aýyl sharýashylyǵyn damytý arqyly baǵany turaqtandyrýǵa múmkindik bolatynyn aıtty.
Óńir basshysynyń tóraǵalyǵymen ótken otyrysta aýyl sharýashylyǵyna qatysty, ásirese kóktemgi egis naýqanyna daıyndyq týraly basqarma basshysy Amangeldi Salamat keńinen baıandady.
«Óńirde egistikten joǵary ónimder alýǵa úlken septigin tıgizip kele jatqan tamshylatyp sýarý tehnologııasyna kóńil bólinýde. Aǵymdaǵy jyly tamshylatyp sýarý tehnologııasymen egiletin egistik kólemderin 161 gektarǵa ulǵaıtyp, 3167 gektarǵa jetkizýge, jańbyrlatyp sýarý tehnologııasyn 80 gektarǵa ulǵaıtyp, 776 gektarǵa jetkizý josparlanýda»,- dedi aýyl sharýashylyǵy basqarmasynyń basshysy Amangeldi Salamat.
Sonymen qatar, basqarma basshysy oblys boıynsha aǵymdaǵy jyly egistik jumystarymen 1 600 jýyq adamy bar 390 aýyl sharýashylyǵy qurylymdary jumys jasaıtynyn jetkizdi. Oǵan qosa kóktemgi egis jumystaryn atqarýǵa 862 traktor men aýyl sharýashylyǵy tehnıkalary naýqandyq jumystarǵa tolyq daıyn ekenin málimdedi.
Jıynda óńir basshysy Mahambet Dosmuhambetov salaǵa qatysty birqatar tapsyrmalar berdi.
«Óńirimizde tek munaı men gaz óndirý salasynda ǵana emes, aýyl sharýashylyǵyn damytýǵa da qolaıly aımaqtar jeterlik. Oblysymyzdaǵy Jaıyq, Oıyl jáne Jem ózenderi sýarmaly egin sharýashylyǵyn óristetýge úlken múmkindik beredi. Osy jaǵdaıdy tıimdi paıdalana otyryp, egin sharýashylyǵyn ilgeriletý baǵytynda jańa jobalardy iske qosý tetikterin qarastyrý qajet. Sol arqyly biz salany damytyp, azyq-túlik qaýipsizdigin qamtamasyz ete alamyz. Sondaı-aq, aýyl sharýashylyǵy ónimderin syrttan tasymaı, ózimizde kóptep ósirý arqyly baǵany turaqtandyrýǵa múmkindik jasaımyz. Bul bizdiń basty maqsatymyzdyń biri»,- dedi aımaq basshysy Mahambet Dosmuhambetov.
Sondaı-aq, oblys ákimi birinshi kezekte salanyń jumystaryn ıgerýde jergilikti turǵyndardy qamtý qajettigin basa aıtty.
Al, basqarma basshysy jergilikti turǵyndardy jumysqa shaqyrǵanmen qyzyǵýshylyq tanytpaı otyrǵanyn, bes júzdeı sheteldik azamatqa maýsymdyq jumystarǵa baılanysty shekaradan ótýge ruqsat berilgenin, olarsyz, jospardaǵy ónim alynbaı qalý múmkin ekenin jetkizdi.
Aımaq basshysy atalǵan máseleni birtindep sheshý qajettigin tapsyrdy.
Sondaı-aq, basqarma basshysynyń málimetinshe, bıyl aýyl sharýashylyǵy taýar óndirýshilerine sýbsıdııalyq qoldaýlar jasaýǵa 262 mln teńge qarajat bólingen. Oǵan qosa, Reseıdiń Astrahan qalasynda ótken semınar-kórme jumysyna óńirdiń birneshe aýyl sharýashylyǵy kásiporyndary qatynasyp, tuqym, tehnologııa, ósimdik qorǵaý quraldaryna baılanysty sharttar jasasyp kelgeni aıtyldy.
Aıta ketý kerek, bıyl «Qazsýshar» mekemesiniń 14 sýarý-sýlandyrý júıesi oblystyń 9 myń jarym gektardy quraıtyn egistik kólemin sýarady.
