قازان قالاسىنداعى اتىستا 11 ادامنىڭ قايتىس بولعانى بەلگىلى بولدى. بۇعان دەيىن 6, سودان سوڭ 9 ادامنىڭ اجال قۇشقانىن حابارلاعان بولاتىنبىز. ەكى وقۋشى ءۇشىنشى قاباتتان سەكىرىپ، كوز جۇمعان.
تاتارستان پرەزيدەنتى رۋستام ميننيحانوۆ 7 ادامنىڭ قايتىس بولعانى تۋرالى مالىمدەدى. ونىڭ تورتەۋى – ۇل، ۇشەۋى – قىز، بارلىعى دا 8 سىنىپ وقۋشىلارى. ونىڭ سوزىنشە، 12 بالا جانە 4 ەرەسەك ادام اۋرۋحاناعا جاتقىزىلدى.
ەسكە سالايىق، دجاۋداتا فايزي، 8 كوشەسىندە ورنالاسقان №175 مەكتەپتە بەلگىسىز ادامدار وق جاۋدىردى.
مالىمەتتەر بويىنشا، شابۋىل جاساعان جاسوسپىرىمدەر بولىپ شىقتى. ولاردىڭ ءبىرى قولعا ءتۇستى.
ءدال قازىرگى ۋاقىتتا ەۆاكۋاتسيالانعان بالالارمەن پسيحولوگتار جۇمىس ىستەپ جاتىر.
وقيعا ورنىنا 21 جەدەل جاردەم بريگاداسى جىبەرىلدى. سونىمەن قاتار ميننيحانوۆ، رەسپۋبليكانىڭ دەنساۋلىق ساقتاۋ ءمينيسترى مارات سادىكوۆ جانە وبلىس پروكۋرورى يلدۋس نافيكوۆ تا باردى.
"ادىرنا" ۇلتتىق پورتالى
