بيۋدجەتتىڭ تاعى 5 تريلليون تەڭگەسى سۇراۋسىز كەتپەي مە؟

3447
Adyrna.kz Telegram

قازىر قازاق قوعامى، اتىلعالى تۇرعان جانارتاۋ ىسپەتتى. ەلارالىق ءھام ەلىشىلىك، ۇلتتىق ماسەلەلەردەن باستاپ تۇرمىستىق دەڭگەيگە دەيىنگىنىڭ بارلىعى قوعامنىڭ، وندا دا قازاق قوعامىنىڭ قاتاڭ باقىلاۋىندا. 

اسىرەسە، ەل-جۇرت اقوردا ءھام اقوردا اينالاسىنا شوعىرلانعان اق جەيدەلى از قاۋىمنىڭ (بيلىكتەگىلەر) ءار ايتقان ءسوزى، ءار باسقان ءىزىن اڭدىپ قاراپ وتىر. سەبەبى دە تۇسىنىكتى. ساياسات ساباقتاستىعىن دارىپتەيتىن قازاق بيلىگى مەن قالت-قۇلت ەتىپ كۇن كورىپ جۇرگەن قازاق قوعامىنىڭ اراسى كۇن ساناپ الشاقتاپ بارادى. حالىقتىڭ بيلىككە دەگەن سەنىم كرەديتى تاۋسىلار بولعان...

بيىلعى جەر كودەكسىنىڭ كەيبىر باپتارىنا سالىنعان موراتوري مەرزىمى اياقتالاتىنى بەلگىلى. قازاقستان حالقىنىڭ 2016 جىلدان بەرگى جالعىز تالابى - اۋىل شارۋاشىلىق جانە وزگە دە ماقساتتارعا ارنالعان جەرلەردى جەكەگە ساتۋ جانە شەتەلدىك تۇلعالارعا جالعا بەرۋگە تىيىم سالۋ. وسى ماقساتتا پرەزيدەنت توقاەۆتىڭ پارمەنىمەن زاڭ جوباسى ازىرلەنىپ، ءماجىلىس پەن سەناتتا تالقىلانىپ، ماقۇلداندى. جەر كودەكسىنىڭ اۋىل شارۋاشىلىعى جەرلەرىن جەكەگە بەرۋ يا بەرمەۋ ماسەلەسىن تالقىلاعان جەر كوميسسياسى ۇيىمداستىرىلدى.

مىنە، وسى وقيعالاردىڭ بارلىعى دەرلىك قوعامنىڭ، وندا دا قازاق قوعامىنىڭ نازارىن ساپارحان وماروۆ تىزگىنىن ۇستاعان قر اۋىل شارۋاشىلىق مينيسترلىگىنە بۇردى. سوندىقتان، اتالعان مينيسترلىكتىڭ ءار باسقان قادامىنا قوعام قىراعى كوزبەن قاراپ وتىر.

بۇگىن دە تىكەلەي مينيستر وماروۆ مينيسترلىگى مەن مامين ۇكىمەتىنە قاتىستى ماڭىزدى اقپاراتتى ءسوز ەتپەكپىز. رەت-رەتىمەن:

قازاقستانىنڭ اگروونەركاسىپ كەشەنىن دامىتۋ بويىنشا مەملەكەتتىك جوباعا بيۋدجەتتەن 5 تريلليون تەڭگە سۇراپتى. بۇل تۋرالى «قازتاگ» اگەنتتىگى جازدى كەشە.

مەملەكەتتىك بيۋدجەتتەن قارجىلاندىرۋ كەزەگى كەلەسىدەي بولماق:

2021 جىلى – 637,1 ميلليارد تەڭگە،

2022 جىلى – 970,5 ميلليارد تەڭگە،

2023 جىلى – 1 035,1 ميلليارد تەڭگە،

2024 جىلى – 1 115,1 ميلليارد تەڭگە،

2025 جىلى – 1 151,2 ميلليارد تەڭگە. بارلىعى: 4 909,2 ميلليارد تەڭگە. جوبا پاسپورتىندا سولاي دەپ جازىلىپتى.

جوسپار بويىنشا كۇتىلەتىن ەكونوميكالىق ەففەكت (ساپا جانە سان جاعىنان):

-ەڭبەك ونىمدىلىگىن 2,5 ەسەگە كوتەرۋ،

-قايتا وڭدەلگەن اگروونەركاسىپ كەشەنى ونىمدەرىن ەكسپورتتاۋدى 2 ەسەگە ۇلعايتۋ،

-ەكوجۇيەگە 350 مىڭ فەرمەرلىك جانە ءۇي شارۋاشىلىقتارىن تارتۋ،

-70 مىڭ وتباسىلىق شارۋاشىلىق قۇرۋ.

كۇتىلەتىن الەۋمەتتىك ناتيجە (سان جانە ساپا جاعىنان):

-ىشكى نارىقتى تامىق ونىمدەرىمەن (الەۋمەتتىك ماڭىزى بار ونىمدەرمەن) قامتۋدى 80 پايىزعا جەتكىزۋ،

-1 ملن اۋىلدىق تۇرعىندى تۇراقتى تابىس كوزىمەن قامتۋ،

-500 مىڭ اۋىلدىق تۇرعىندى جۇمىسپەن قامتۋ.

جوبا 5 باعىت بويىنشا جۇزەگە اسىرىلماق كورىنەدى. ولار:

1) ەڭبەك ونىمدىلىگىن 2,5 ەسەگە كوتەرۋ، اوك تسيفرلاندىرۋ، تەحنيكالىق جانە تەحنولوگيالىق جابدىقتاردى جاڭارتۋ دەڭگەيىن كوتەرۋ، جوعارى ساپالى تۇقىمداردى قولدانۋدى ارتتىرۋ، مينەرالدى تىڭايتقىشتاردى قولدانۋ دەڭگەيىن ارتتىرۋ،قارقىندى مال شارۋاشىلىعى،جەردى ۇتىمدى پايدالانۋ، اگروونەركاسىپتىك كەشەندى دامىتۋ ءۇشىن اگرارلىق عىلىمنىڭ اسەرىن ارتتىرۋ ت.ب.

2) ىشكى نارىقتى تامىق ونىمدەرىمەن (الەۋمەتتىك ماڭىزى بار ونىمدەرمەن) قامتۋ.

3)وڭدەلگەن اۋىل شارۋاشىلىعى ونىمدەرىنىڭ ەكسپورتىن ەكى ەسەگە ارتتىرۋ،ەكسپورتقا باعىتتالعان ينۆەستيتسيالىق جوبالاردى جۇزەگە اسىرۋ جانە ەكسپورتتىق كەدەرگىلەردى جويۋ، ۆەتەريناريانى كۇشەيتۋ جانە دامىتۋ، فيتوسانيتاريانى نىعايتۋ جانە دامىتۋ.

ء4)ىرى ينۆەستيتسيالىق جوبالاردىڭ اينالاسىندا جەتى ەكوجۇيەنى قالىپتاستىرۋ،

5) 1 ملن اۋىلدىق تۇرعىندى تۇراقتى تابىس كوزىمەن قامتۋ، اۋىلشارۋاشىلىق كووپەراتسياسىن دامىتۋ، اۋىل تۇرعىندارى اراسىندا كاسىپكەرلىكتى دامىتۋعا جاعداي جاساۋ.

جوعارىدا اتالعان جوبانى جۇزەگە اسىرۋ 2021-2025 جىلدارعا جوسپارلانىپتى. ول ءۇشىن بيۋدجەتتەن 5 تريلليون تەڭگەگە جۋىق قاراجات بولىنبەك. 5 تريلليون تەڭگە دەگەنىڭىز شامامەن 12 ميلليارد اقش دوللارى دەگەن ءسوز. وراسان زور قارجى. قازاقستاننىڭ جىلدىق بيۋدجەتىنىڭ تەڭ جارىمىسىنا پارا-پار سوما. ونى ءتيىمدى پايدالانۋ ساپارحان وماروۆ مينيسترلىگىنىڭ قولىنان كەلە مە؟

نۇرگەلدى ابداعانيۇلى،

"ادىرنا" ۇلتتىق پورتالى

 

پىكىرلەر