بۇگىن وتان قورعاۋشىلار كۇنى. مەملەكەتتىڭ تۇتاستىعى مەن تىنىشتىعىن كۇزەتۋ، ەل شەكاراسىن قورعاۋ قاشاندا باستى مىندەت. قازاقستان قارۋلى كۇشتەرىن مودەرنيزاتسيالاۋ جانە موديفيكاتسيالاۋ بويىنشا جۇمىستاردى اتقارىپ كەلەدى. بۇل تۇرعىدان وتاندىق قارۋ تۇرلەرىن شىعارۋدى دا قولعا الۋدامىز. سونىمەن قازاقستاندا قانداي قارۋ تۇرلەرى وندىرىلەدى؟
ارلان - بروندى اسكەري كولىگى. كولىك وار-مەن بىرلەسە وتىرىپ، "Paramount Group" كومپانياسى نەگىزىندە جاسالۋدا. كولىكتى ءتۇرلى ماقساتتا قولدانۋعا بولادى. اسكەريلەردى تاسىمالداۋ، بارلاۋ جۇرگىزۋ، باقىلاۋ جاساۋ، ۇرىس جاعدايىندا قولدانۋ. "ارلان" ميناعا قارسى بروندىق جابىندىمەن قورعالعان، سوندىقتان دا سەنىمدى. ساعاتىنا 120 شاقىرىممەن جۇيتكيتىن بۇل كولىكتىڭ ۇستىنە پۋلەمەت ورنالاستىرۋعا بولادى. ارنايى وپەراتسيالار جۇرگىزۋگە ىڭعايلى.
نايزا - "Israel Military Industries" كومپانياسىمەن بىرلەسە وتىرىپ شىعارىلعان زىمىران كەشەنى. 2007 جىلى جاسالىپ، 2008 جىلى قولدانىسقا بەرىلدى. قازىرگى ۋاقىتتا قازاقستاندا 18 داناسى بار. زىمىران كەشەنى 80 شاقىرىمداعى نىسانانى جويىپ جىبەرۋگە قاۋقارلى. بىرنەشە زىمىران ءتۇرىن قولدانۋعا مۇمكىندىك بەرەتىن ارتىقشىلىقتارعا يە.
ايبات - مينومەت. 120-مم مينومەت 2007 جىلى ءيزرايلدىڭ "سولتام" كومپانياسىمەن بىرلەسىپ جاسالعان. مينومەت مينۋتىنا 16 مارتە اتۋ قابىلەتىنە يە جانە 9 شاقىرىمداعى نىساندى جويا الادى.
سەمسەر - وزدىگىنەن جۇرەتىن ارتيللەريالىق قوندىرعىسى. 2007 جىلى ءيزرايلدىڭ "سولتام" كومپانياسىمەن بىرلەسىپ جاساعان وتاندىق ارتيللەريا قوندىرعىسى بولىپ تابىلادى. مينۋتىنا 6 مارتە سوققى جاساي الادى. 16 شاقىرىمداعى نىساناگى جويۋ قابىلەتىنە يە. قازىرگى ۋاقىتتا قازاقستان قارۋلى كۇشتەرىندە 20 "سەمسەر" بار.
بارىس - بروندى اسكەري تەحنيكاسى. 2ا42 30-مم اۆتوماتتى اتۋ زەڭبىرەگى ورنالاسقان. سىرتقى بروندىق قورعانىسى وتە بەرىك، ال ىشكى تۇسى ۇرىس جۇرگىزۋگە ىڭعايلى ەتىپ جاسالعان. بارىس "Kazakhstan Paramount Engineering" كومپانياسىنىڭ ءونىمى.
اسحات قاسەنعالي
"ادىرنا" ۇلتتىق پورتالى
