تۇرىكمەنستانداعى تۇرمەلەردە ناعىز اشتىق باستالدى. Turkmen.news اقپارات كوزدەرىنىڭ حابارلاۋىنشا، تۇتقىندار تاماق جەتىسپەۋشىلىگىنەن جانە ءتۇرلى اۋرۋلاردان ءولىپ جاتىر، دەپ حابارلايدى «ادىرنا» ۇلتتىق پورتالى.
«كولونيالارداعى دۇكەندەر بوس، ال اسحانالارداعى تاماق ىلعي جەتكىلىكسىز بولدى. ۇلىم تاماق پەن مەديتسينالىق كومەكتىڭ جوقتىعىن ايتتى. ادامدار ءولىپ جاتىر. اقشا جىبەرەيىن دەگەنىمدە ول دۇكەندە ەشتەڭە جوق، «ول اقشاعا نە ساتىپ الامىن؟» دەپ جاۋاپ بەردى»، - دەدى تۇتقىننىڭ اناسى.
گازەت اتاپ وتكەندەي، سەيدي قالاسىنداعى لەباپ ۆەلاياتىنىڭ LB-K/11 جانە LB-K/12 كولونيالارىندا بىرنەشە كۇن بويى نان بولمايدى.
تۇتقىندارعا تاماقتى تۋىستارى اكەلىپ بەرە الادى. بىراق 2020 جىلدىڭ ناۋرىز ايىنان باستاپ COVID-19 ەپيدەمياسىنا بايلانىستى ولارعا تاماق اكەلۋگە دە تىيىم سالىندى. 2021 جىلدىڭ ساۋىرىنەن باستاپ تۇتقىنداردىڭ تۋىستارىنا ايىپتالۋشىلارعا تاماق اكەلۋگە رۇقسات بەرىلدى. الايدا ايماقتار اراسىنداعى قوزعالىس ءالى تولىق اشىلماعاندىقتان، ولاردىڭ كولونيالارعا جەتۋى قيىن بولىپ جاتىر.
ناۋرىز ايىنىڭ سوڭىندا لب-ك/12 كولونياسىندا ەسىرتكى ساتۋمەن اينالىسقان تۇركيا ازاماتى وزگۋر كۋچچۋكاي قايتىس بولدى. ونىڭ دەنەسى وتانىنا «تۇركمەن اۋە جولدارىنىڭ» چارتەرلىك رەيسىمەن جەتكىزىلدى. رەسمي مالىمەتتەرگە سايكەس ول قاتەرلى ىسىكتىڭ سالدارىنان ومىردەن ءوتتى. الايدا تۇتقىننىڭ تۋىستارى مۇنىمەن كەلىسپەيدى. ولاردىڭ ايتۋىنشا، كۋچچۋكاي تۋبەركۋلەزدىڭ اسقىنعان تۇرىمەن اۋىرعان جانە ءتيىستى ەم الماعان. تۋىستارى تەرگەۋدى تالاپ ەتىپ، تۇركىمەنستانداعى تۇركيا ەلشىلىگىمەن بايلانىسقا شىقتى.
سونىمەن قاتار 2020 جىلدىڭ قاراشاسىندا بايرامالي قالاسى، MR-K/16 كولونياسىنداعى تۇتقىندارعا كۇزەتشىلەردىڭ تاماق ساتقانى بەلگىلى بولدى. بۇرىن ايىپتالۋشىلار كۇزەتشىلەردەن تىيىم سالىنعان زاتتاردى عانا ساتىپ الاتىن (مىسالى الكوگول).
ايتا كەتەيىك، COVID-19 ەپيدەمياسى تۇركىمەنستانداعى ەكونوميكالىق جانە ازىق-تۇلىك داعدارىسىن كۇشەيتتى. ۇكىمەت بەلگىلەگەن باعالار دا ءوسىپ جاتىر. دەگەنمەن ولار ءالى كۇنگە دەيىن نارىقتىق باعادان ەداۋىر تومەن. الايدا سونىڭ ءوزى ادامداردى ساعاتتاپ كەزەككە تۇرۋعا ءماجبۇر ەتەدى.
"ادىرنا" ۇلتتىق پورتالى
