قاراعاندى وبلىسىندا سۋ تاسقىنى كەزىندە ءىز-ءتۇزسىز جوعالعان نۇرلان سۇلەيمەنوۆتىڭ دەنەسى ءبىر اي دەگەندە ارەڭ تابىلدى. ەكس-دەپۋتاتتىڭ ءولى دەنەسى وزەن تۇبىندەگى شىلىكتەرگە شىرمالىپ قالعان، دەپ حابارلايدى «ادىرنا» ۇلتتىق پورتالى.
شارۋا قوجالىعىنىڭ يەسى جوعالعاننان ەكى كۇننەن كەيىن ونىڭ كولىگى نۇرا وزەنىڭ تاسسۋات اۋىلى ماڭىنداعى وتكەل تۇسىنان تابىلدى. قىزىل سۋ جولدان اسقاندا سۇلەيمەنوۆ تىزىندەگەن كولىك كوپىردەن تايىپ كەتۋى مۇمكىن دەگەن بولجام بولعان. بىراق ونىڭ ءوزى تابىلماي، ەل جۇرت قاستاندىق جاسالۋى مۇمكىن دەپ سان-ساققا جۇگىرتتى. ال تۋىستارى مارقۇم كەپىلدە وتىر دەپ سوڭىنا دەيىن ءۇمىت ۇزبەگەن. دەگەنمەن كولىكتىڭ كوپىردەن اۋىپ كەتكەنىن كورگەندەر تابىلىپتى. سوندىقتان ىزدەۋ جۇمىستارى توقتاتىلماي، وزەن ارناسىنىڭ 170 شاقىرىم جەرى تەكسەرىلگەن. الايدا 62 جاستاعى كاسىپكەردىڭ دەنەسى كولىك قۇلاعان جەردەن نەبارى ءتورت شاقىرىم جەردەن سۋ دەڭگەيى تومەندەگەندە عانا كورىنىپ وتىر.
«دەنە اعىستىڭ قاتتىلىعىنان قارقىنمەن كەلىپ، قالىڭ شىلىككە قىستىرىلىپ قالعان. سۋ دەڭگەيى جوعارى كەزدە شىلىكتىڭ اراسىنان كورىنبەگەن. سۋ تۇبىندە وسىنداي تال شىلىكتەردىڭ كوپتىگى ىزدەۋدى قيىنداتتى. سۋ شامامەن 70 سانتيمەرگە دەيىن تۇسكەندە عانا كورىندى. شالقاسىنان جاتىر، دەنەسىندە زاقىم بەلگىسى جوق»، - دەيدى قۇتقارۋشى الەكساندر ۆيتسۋ كتك ارناسىنىڭ ماتەريالىندا.
"ادىرنا" ۇلتتىق پورتالى
