تالدىقورعان قالاسىنداعى نازارباەۆ زياتكەرلىك مەكتەبىنىڭ باستاۋىش سىنىبىنىڭ اراسىندا ۇلى وتان سوعىسىنداعى جەڭىستىڭ 76 جىلدىعىنا ارنالعان «ءبىز جەڭىستىڭ مۇراگەرلەرىمىز» اتتى سۋرەت بايقاۋى ءوتتى.
بايقاۋعا جەتپىستەن استام وزىندىك شىعارماشىلىق جۇمىستار ۇسىنىلدى، بۇل سۋرەتتەردە بالالاردىڭ «ۇلى وتان سوعىسىنداعى جەڭىس» تاقىرىبىنا كوزقاراسىن كورۋگە بولادى.
ۇستاز-ۇيىمداستىرۋشى-كۋراتورلاردىڭ ايتۋى بويىنشا، ۇلى مەرەكە قارساڭىندا پاتريوتتىق سۋرەت بايقاۋى مەكتەپتىڭ جاقسى داستۇرىنە اينالدى. ءىس-شارا ساباقتاستىقتى ساقتاۋعا، اعا ۇرپاق وكىلدەرىنە دەگەن قۇرمەتپەن قاراۋعا، سوعىس ارداگەرلەرىنە العىس بەلگىسىن ۇسىنۋعا مۇمكىندىك بەرەدى.
2-سىنىپ وقۋشىسى ميلانا تسوي ۇلىن مايدانعا شىعارىپ سالعان انانىڭ سۋرەتىن سالعان. ميلانا ءوزىنىڭ شىعارماشىلىق جۇمىسىن «چەرەز گودا، چەرەز ۆەكا. پومنيتە…»، دەپ اتادى.
- وسى سۋرەتتى سالعان كەزدە اجەمنىڭ اڭگىمەلەرى ەسىمە ءتۇستى. اجەمنىڭ اتى ۆەرا، ول 84 جاستا. اجە اكەسى سوعىسقا اتتانعان كەزدە ءۇش جاستا بولعانىن ايتتى. بىراق كوپ ۋاقىت وتپەي، قارا قاعاز كەلدى. اكەسىنىڭ ءتۇرىن ۇمىتسادا، سوعىس جىلدارىنداعى سەزىنگەن اشتىق پەن جوقشىلىق ءالى ەسىندە. ماعان اجەم ارقاشان وسى سوزدەردى ايتىپ وتىرادى «ءبىز ءۇشىن ءوز ءومىرىن قيعان جانە وسى بەيبىت الەمدى سىيلاعان ۇلى باتىرلارىمىزدى ءاردايىم قۇرمەتتەۋىمىز كەرەك»، دەپ، - دەيدى ميلانا ءوزىنىڭ سۇحباتىندا.
زياتكەرلىك مەكتەپتىڭ 5-سىنىپ وقۋشىسى رامينا ادىلحان ءوزىنىڭ ۇلكەن اتاسى ابدىعاي دجۋنۋسوۆتى ءوز ەلەستەتكەندەي ەتىپ بەينەلەدى. ويتكەنى، اتاسىنان ءتىپتى فوتوسۋرەتتەر دە ساقتالعان جوق. ول سوعىستان وكىنىشكە وراي ورالماي، ءىز-ءتۇسسىز جوعالىپ كەتكەن ەكەن.
- ۇلكەن اتام ۇيگە ورالمادى. ول ۇرىس دالالارىندا حابارسىز كەتكەن مىڭداعان باتىرلاردىڭ ءبىرى بولىپ قالا بەردى. ول ءوزىنىڭ ءومىرىن وتان ءۇشىن، ءبىزدىڭ باقىتتى بولاشاعىمىز ءۇشىن بەردى! ءبىز ۇلكەن اتامىزدى ماقتان تۇتامىز جانە ونىڭ ەسىمىن ارقاشاندا جۇرەگىمىزدە ساقتايمىز»، - دەپ ءوز پىكىرىن رامينا ءبىلدىردى.
جالپى تاقىرىپپەن بىرىكتىرىلگەن شىعارماشىلىق جۇمىستار ءبىر-بىرىنەن ورىنداۋ تەحنيكاسىمەن ەرەكشەلەندى، بىراق ولاردىڭ ارقايسىسىندا اتا-بابالارىنا دەگەن سالتانات پەن ماقتانىش سەزىمى بايقالدى.
