رەسەيدە ءۇش قازاقستاندىق جاۋىنگەردىڭ سۇيەگى تابىلدى

3350
Adyrna.kz Telegram

رەسەيلىك ىزدەستىرۋ توبى نوۆگورود وبلىسى حولم قالاسىندا بۇرىن بەلگىسىز بولعان جاپپاي جەرلەۋ ورنىنان ءۇش قازاقستاندىق جاۋىنگەر سۇيەگىن تاپتى. ۇلى وتان سوعىسى جىلدارىندا قازا تاپقان ساربازداردىڭ ەسىمى جەرلەۋ ورنىنان تابىلعان مەدالوندار كومەگىمەن انىقتالدى. قازىر ولار قازاقستاندىق جاۋىنگەرلەردىڭ تۋىستارىن ىزدەستىرىپ جاتىر، دەپ حابارلايدى «ادىرنا» ۇلتتىق پورتالى Tengrinews.kz سايتىنا سىلتەمە جاساپ.

رەسەيلىك ىزدەستىرۋ توبىنىڭ اقپاراتى بويىنشا، حولمداعى «دولينا» ەكسپەديتسياسىنىڭ قۇرامىنا كىرەتىن «پيراميدا» جاساعى جاۋىنگەرلەر جەرلەنگەن بەلگىسىز قابىردى تاپقان. ۇلى وتان سوعىسىنا قاتىسقان ساربازدار جەكەمەنشىك ۇيلەردىڭ ءبىرىنىڭ اۋماعىندا ۇلكەن شۇڭقىردا كومىلگەن. پاۆلودارلىق «مايدان جولى» ىزدەستىرۋ جاساعىنىڭ كومانديرى الەكساندر شيتوۆ قازا تاپقان ساربازداردىڭ اراسىندا قازاقستاندىقتار دا بولعانىن ايتتى.

«رەسەيلىك ارىپتەستەردىڭ ايتۋىنشا، 29 ساۋىردە ولار ەكسگۋماتسيا جۇمىستارىن اياقتادى. 52 اسكەري قىزمەتكەردىڭ سۇيەگى شىعارىلعان. 16 مەدالون تابىلدى. ولاردىڭ التاۋى بوس، ۇشەۋى سول جەردە وقىلدى. جەتەۋى ساراپتاماعا جىبەرىلدى. وكىنىشكە قاراي، ءۇش مەدالدى وقۋ مۇمكىن بولمادى. بىرەۋىن وقۋ جۇمىستارى ءالى جالعاسىپ جاتىر. ال قالعان ۇشەۋى وقىلدى. ۇشەۋى دە ءبىزدىڭ جەرلەسىمىزگە تيەسىلى»، - دەدى شيتوۆ.

مەدالوندارىنىڭ بىرىندەگى جازباعا سايكەس، ىزدەستىرۋ توبى ونىڭ يەسى 1912 جىلى تۋعان قىزىل اسكەر ۆاسيلي ۆاسيلەۆيچ باننيكوۆ ەكەنىن انىقتادى. ول التاي ولكەسى بي وبلىسىنىڭ بىستروۆ اۋدانىندا تۇرعان. 1941 جىلى 18 قىركۇيەكتە سەمەي وبلىسى، جاڭا-سەمەي اۋدانى، قازاق كسر جاڭا-سەمەي ااك-كە مايدانعا شاقىرىلعان. سوڭعى قىزمەت ورنى 1280-ءشى اتقىشتار پولكىنىڭ 391-ءشى اتقىشتار ديۆيزياسى.

مۇراعات دەرەكتەرى بويىنشا، ونىڭ ايەلى اننا گريگورەۆنا باننيكوۆا سەمەيدە ومسكايا كوشەسى 78-ۇيدە تۇرعان. جاۋىنگەر 1942 جىلى ناۋرىزدا حابار-وشارسىز كەتكەن.

ەكىنشى قازاقستاندىقتىڭ سۇيەگى 1910 جىلى تۋعان اعا سەرجانت فەدور ميحايلوۆيچ ناگيبينگە تيەسىلى. تۋعان جەرى: قازاق كسر، الماتى وبلىسى، دزەرجين اۋدانى، دزەرجين اۋىلدىق وكرۋگى. شاقىرۋ پۋنكتى: اندرەەۆسكي ااك. وتباسىنىڭ مەكەن-جايى: ناگيبين ميحايل ي.، قازاق كسر، الماتى وبلىسى، دزەرجين اۋدانى، دزەرجين اۋىلدىق وكرۋگى.

قازا تاپقان ءۇشىنشى قازاقستاندىق قىزىل اسكەر پروكوپي يۆانوۆيچ چيتان(ل)وۆ 1902 جىلى تۋعان. مەدالوندا تۋعان جەرى كوكشەتاۋ ۋەزى ۆ... بولىسى، ۆاسيلەۆكا اۋىلى. شاقىرۋ ورنى: كۇرشىم ااك. وتباسىنىڭ مەكەن-جايى: ەفروسينيا ەناتا چيتان(ل)وۆا ...، قازاق رەسپۋبليكاسى، شىعىس قازاقستان وبلىسى، كۇرشىم اۋدانى، پۋگاچەۆ اۋىلدىق كەڭەسى، «ما...وۆود».

ىزدەستىرۋ توبى قايتىس بولعانداردىڭ تۋىستارىن تابۋعا كومەك سۇرايدى.

"ادىرنا" ۇلتتىق پورتالى

(فوتو tengrinews.kz سايتىنان)

پىكىرلەر