مەملەكەت باسشىسى قاسىم-جومارت توقاەۆ وتانداستارىن قازاقستان حالقىنىڭ بىرلىگى كۇنىمەن قۇتتىقتادى. قۇتتىقتاۋدىڭ ءماتىنى اقوردا سايتىندا جاريالاندى.
"بارشاڭىزدى قازاقستان حالقىنىڭ بىرلىگى كۇنىمەن شىن جۇرەكتەن قۇتتىقتايمىن! تۇڭعىش پرەزيدەنتىمىز – ەلباسى نۇرسۇلتان نازارباەۆتىڭ باستاماسىمەن بەلگىلەنگەن بۇل مەرەكە عاسىرلار بويى قازاق جەرىندە بەرىك ورنىققان دوستىق پەن اۋىزبىرشىلىك، ءوزارا قۇرمەت پەن سەنىم سياقتى قاستەرلى قۇندىلىقتارعا نەگىزدەلگەن", - دەدى توقاەۆ.
ول تاۋەلسىزدىك كەزەڭىندە نەگىزى قالانعان "ارالۋاندىعىمىز – بىرلىكتە" قاعيداتى قازاقستاننىڭ سان قىرلى مادەنيەتى مەن ءداستۇرىن باعا جەتپەس بايلىعىمىزعا اينالدىرعانىن اتاپ ءوتتى. ىرىس-ىنتىماق پەن وتانشىلدىق رۋح ۇلتتىق كودىمىزدىڭ ۇيىتقىسى بولىپ وتىر.
"حالقىمىزدىڭ ادىلەتتى ءارى دامىعان مەملەكەت قۇرىپ، ەلىمىزدى وركەندەتۋ جولىنداعى مۇددەسى ورتاق. ءبىز قوعامداعى تۇراقتىلىق پەن كەلىسىمنىڭ، ءوزارا قولداۋ مەن جاسامپاز ەڭبەكتىڭ ارقاسىندا كەز كەلگەن قيىندىقتى ەڭسەرىپ، كوزدەگەن ماقساتىمىزعا جەتەمىز. سىزدەرگە زور دەنساۋلىق، باق-بەرەكە تىلەيمىن! ءار شاڭىراقتا تاتۋلىق پەن ءوزارا تۇسىنىستىك بولسىن!", - دەپ تۇيىندەدى مەملەكەت باسشىسى.
قازاقستان حالقىنىڭ بىرلىگى كۇنى 1996 جىلدان باستاپ 1 مامىردا اتالىپ ءوتىپ كەلەدى.
