الماتىدا جانارماي بەكەتىنىڭ ءۇش بىردەي جۇمىسشىسى كارىز قۇدىعىنا قۇلاپ، باقيلىق بولا جازدادى، دەپ حابارلادى كتك.
قۇدىقتا قالعانداردى قۇتقارۋ ءساتىن كۋاگەرلەر ۇيالى تەلەفونعا ءتۇسىرىپ العان. كادردا كورىنىپ تۇرعانداي، ناجىستەن بولىنگەن گازدىڭ يىسىنە تۇنشىققان جۇمىسشىلاردىڭ ەسى كىرەسىلى-شىعاسىلى.
وقيعا جانارماي قۇيۋ بەكەتىنىڭ اۋماعىندا بولدى. ەسەپتەگىش قۇرالىنداعى كورسەتكىشتى جازىپ الماق بولىپ قۇدىققا الدىمەن ءبىر جۇمىسشى تۇسكەن. ال قالعان ەكەۋى ونى قۇتقارماق بولىپتى. الايدا وزدەرى دە ۋلانىپ، قۇدىقتا ەسىنەن تانىپ قۇلاعان. ءۇش جىگىت جانساقتاۋ بولىمىندە جاتىر. مەتان گازى مي مەن وكپەسىن، باۋىرىن زاقىمداعان. سوعان قاراعاندا قۇدىقتا ولار ۇزاق ۋاقىت جاتىپ قالعانعا ۇقسايدى. سەبەبى، ۋ قانعا دا سىڭگەن دەيدى دارىگەرلەر.
ء"ۇش جۇمىسشى كارىز قۇدىعىندا مەتان گازىمەن ۋلانعان. قۇتقارۋشىلار وقيعا ورنىنا دەر كەزىندە جەتىپ قۇتقارىپ قالدى. ايتپەسە وقيعا قايعىلى جاعدايمەن اياقتالۋى مۇمكىن ەدى", - دەيدى الماتى قالاسى قۇتقارۋ قىزمەتىنىڭ ءباسپاسوز حاتشىسى باۋىرجان يساباەۆ.
جۇمىسشىلار تەحنيكالىق قاۋىپسىزدىكتى ساقتامادى دەگەن بولجام بار. قۇتقارۋشىلار ولاردى قۇدىقتان شىعارعان كەزدە تىنىس الۋ جولىن قورعايتىن قۇرال تابىلماعان. پوليتسيا تەكسەرۋ باستادى.
ەگەر تەحنيكالىق قاۋىپسىزدىكتىڭ ساقتالماعانى انىقتالسا، جانارماي بەكەتى باسشىلارىنا قاتىستى قىلمىستىق ءىس قوزعالۋى مۇمكىن.
