Almatyda janarmaı beketiniń úsh birdeı jumysshysy káriz qudyǵyna qulap, baqılyq bola jazdady, dep habarlady KTK.
Qudyqta qalǵandardy qutqarý sátin kýágerler uıaly telefonǵa túsirip alǵan. Kadrda kórinip turǵandaı, nájisten bólingen gazdyń ıisine tunshyqqan jumysshylardyń esi kiresili-shyǵasyly.
Oqıǵa janarmaı quıý beketiniń aýmaǵynda boldy. Eseptegish quralyndaǵy kórsetkishti jazyp almaq bolyp qudyqqa aldymen bir jumysshy túsken. Al qalǵan ekeýi ony qutqarmaq bolypty. Alaıda ózderi de ýlanyp, qudyqta esinen tanyp qulaǵan. Úsh jigit jansaqtaý bóliminde jatyr. Metan gazy mı men ókpesin, baýyryn zaqymdaǵan. Soǵan qaraǵanda qudyqta olar uzaq ýaqyt jatyp qalǵanǵa uqsaıdy. Sebebi, ý qanǵa da sińgen deıdi dárigerler.
"Úsh jumysshy káriz qudyǵynda metan gazymen ýlanǵan. Qutqarýshylar oqıǵa ornyna der kezinde jetip qutqaryp qaldy. Áıtpese oqıǵa qaıǵyly jaǵdaımen aıaqtalýy múmkin edi", - deıdi Almaty qalasy qutqarý qyzmetiniń baspasóz hatshysy Baýyrjan Isabaev.
Jumysshylar tehnıkalyq qaýipsizdikti saqtamady degen boljam bar. Qutqarýshylar olardy qudyqtan shyǵarǵan kezde tynys alý jolyn qorǵaıtyn qural tabylmaǵan. Polıııa tekserý bastady.
Eger tehnıkalyq qaýipsizdiktiń saqtalmaǵany anyqtalsa, janarmaı beketi basshylaryna qatysty qylmystyq is qozǵalýy múmkin.
