پاندەميا ءبىزدى قانشا جاسقا قارتايتتى؟

2589

الەمدى اۋرە-سارساڭعا سالعان كوروناۆيرۋستىڭ كەزىپ جۇرگەنىنە ءبىر جارىم جىلدان استى. 2020 جىلى جەر پلانەتاسىنىڭ تۇرعىندارى كارانتين، لوكداۋن، بلوكپوست سياقتى سوزدەرمەن ەتەنە جاقىن تانىستى. پاندەميا ادامداردى ۆيرۋستان قورعانۋدىڭ جولدارىن ۇيرەتىپ قانا قويماپتى. سونىمەن قاتار پاندەميا ادامنىڭ جاس مولشەرىنە دە ەداۋىر زاردابىن تيگىزگەن كورىنەدى.

Le Figaro سايتى ءبىراز ادامنىڭ پاندەميا كەزىندەگى ەموتسيونالدى جاعدايىنا سۇراۋ سالىپ، اسا جاعىمدى بولا قويماس جاۋاپتار العان دەپ جازادى «ادىرنا» ۇلتتىق پورتالى دەرەككوزگە سىلتەمە جاساپ.

باسىلىم شەتەل ازاماتتارىنىڭ قازىرگى كوڭىل-كۇيى تۋرالى ساۋالناما جۇرگىزىپ، سونىڭ ناتيجەسىن جاريالاپتى. ءبىز دە ءوز كەزەگىمىزدە 2020 جىلى ناۋرىزدىڭ 16-سى كۇنى باستالعان پاندەميانىڭ قازاقستاندىقتارعا قالاي اسەر ەتكەنىن ءبىلۋ ماقساتىندا بىرقاتار ازاماتتى سوزگە تارتتىق.

«ءومىرىمىز كۇرت وزگەردى عوي. پاندەمياعا دەيىن «شىركىن، الاڭسىز ءبىر ۇيىقتاپ، دوستارىممەن كەزدەسىپ، ابدەن قىدىرسام ەكەن» دەيتىنمىن.  بىلتىرعى كارانتينگە دەيىن شاعىن بيزنەسىم بولدى. سونىڭ جۇمىسىمەن اعايىن، تۋىس، دوستارىممەن كەزدەسۋگە ۋاقىت تابۋ مۇڭ ەدى. وكىنىشكە قاراي، بىلتىر بيزنەسىمدى  توقتاتۋعا ءماجبۇر بولدىم. پايداسىنان گورى شىعىنى ارتىپ كەتتى. كارانتيندە كۇندىز ۇيىقتاپ، تۇندە تىرشىلىك ەتۋ رەجيمىنە وتتىك. ءبىر جىلداي وسىنداي رەجيمگە تۇسكەنىمىز سونشا، بۇگىنگە دەيىن كۇندىز سىرتقا شىققىم كەلمەيدى. شىعا قالسام دا، تەز شارشاپ، السىرەپ قالامىن»،- دەيدى ءسابيرا مۇراتقىزى.  كۇن مەن ءتۇنى اۋىسقان ادامداردىڭ باسىم بولىگى جاستار ەكەن. 28 جاسار مۇحيت باقىتۇلى دا: «كارانتين ۇيگە قاماپ قانا قويمادى. جۇرتتىڭ ەڭسەسىن دە ەزىپ تاستادى. قازىر بايقاساڭىز، كوبىمىز قارت ادامدار سۇرەتىن ءومىردى ءسۇرىپ جاتقاندايمىز. تۇندە ۋاقىتىلى ۇيىقتاي المايمىز. كۇندىز ءبىر مىزعىپ الساق، جۇرە بەرەمىز. كۇندەلىكتى تاماقتى عانا ويلايتىن بولدىق. الدەبىر ۇلكەن ماقساتتاردى العا قويىپ، وعان ۇمتىلا قويمايمىز. ويتكەنى ەرتەڭ نە بولارىن بىلمەيتىن، ءبىر تۇمانعا كىرىپ كەتكەندەيمىز»،-دەيدى.

«پاندەميادا ءبىز وسىعان دەيىن قانىمىزعا ءسىڭىپ كەتتى دەپ سەنگەن بۇرىنعى داستۇرلەرىمىزدى، ءجون-جورالعىلارىمىزدى جوعالتتىق. جوعالتۋعا ءماجبۇر بولدىق. ماسەلەن، كوڭىل ايتۋ، كوڭىل سۇراۋ. ۆيرۋس جۇقتىرۋ قاۋپى دەپ بۇل كۇندە ەتەنە جاقىنىمىز بولماسا، قارالى ۇيگە بارۋدى دا ازايتتىق. تەلەفونمەن حابارلاسىپ، كوڭىل ايتاتىن بولدىق. اۋىرىپ جاتقان كىسىنىڭ كوڭىلىن سۇراۋ دا قازىر ونلاين اتقارىلاتىن بولدى. بۇعان دەيىن دە تەلەفونعا از تاۋەلدى ەمەس ەدىك. ال قازىر تەلەفونسىز ءولىپ قالاتىنداي كۇيگە جەتتىك. سەبەبى، بار قىزىق تا، بار دۇنيەڭ دە سول تەلەفوندا. جاڭالىقتى دا وقيسىڭ، جۇمىسىڭدى دا اتقاراسىڭ، اقشاڭ دا سول تەلەفوندا. بىلەسىز بە، قازىر ادام تاعدىرى دا سول تەلەفون ارقىلى شەشىلەتىن بولدى. مىسالى، ءتۇرلى الەۋمەتتىك جەلىلەر. چاتتاردا تالقىلانعان كەيبىر تاعدىرلار اقىرىندا سول چاتتاعى ايعاي-شۋدىڭ سالدارىنان تالقاندالىپ تا جاتىر. كارانتيندە جۇمىسسىز، تەك ۋاقىت وتكىزىپ ۇيدە جاتقان ادام ءۇشىن بۇل تەلەفون دەگەنىڭىز سيقىرشىنىڭ تاياعىنداي بولدى عوي»،- دەپ كۇلەدى اسىلحان ەلۋباەۆ.

40 جاستاعى كاميللا ءدال قازىر ءوزىن 72 جاستاعى كەمپىر سياقتى سەزىنەتىنىن ايتادى. «جالپىحالىقتىق كوممەندانتتىق ساعات، كارانتين، پاندەميانىڭ كەسىرىنەن وسىنداي جاستاعى كارى ادامشا سەزىنەمىن ءوزىمدى. بۇرىنعىداي سىرتقا ءجيى شىعىپ، ءار كۇننىڭ جاڭالىعىن، جاڭا قىزىقتارىن كورمەيمىز. تورىعىپ كۇن ۇزاققا ۇيدە وتىرامىز. ءتۇرلى بايلانىس قۇرالدارىمەن تانىستارىممەن سويلەسۋ بارىسىندا ولاردىڭ دا مەن سەكىلدى كۇيدى باستان كەشىپ جاتقانىن بايقايمىن. ءبىر-بىرىمىزگە حابارلاسا قالساق، ايتاتىنىمىز تاماق، كۇندەلىكتى كۇيبەڭ تىرشىلىك...»،- دەپ كۇرسىنەدى كاميللا.

وسىنداي جاعدايلارعا بايلانىستى فيلوسوف ماري روبەر: «پاندەميا كەزەڭى ادامداردى پسيحولوگيالىق شارشاۋعا، نەمقۇرايدىلىققا، ەشتەڭەگە قىزىقپايتىن حالگە اكەلدى. ادامداردىڭ ەرتەڭگى كۇنگە دەگەن سەنىمى ازايدى. الەم بويىنشا ءومىر توقتاپ قالعانداي. ءار كۇن سايىن ءبىر جاعدايدىڭ قايتالانا بەرۋى ادامدى مەزى ەتىپ، كۇيزەلىسكە تۇسىرەدى»،-دەگەن پىكىردى العا تارتادى.

ال ءسىزدىڭ ءومىرىڭىزدى پاندەميا قالاي وزگەرتتى؟

مۇقاش مۇراتۇلى،

«ادىرنا» ۇلتتىق پورتالى.

فوتو اشىق دەرەككوزدەن الىندى.

پىكىرلەر
ۇقساس جاڭالىقتار
Серіктестер/Партнеры
Студия IMA - создание сайтов Доставка цветов Астана - Lova Buket