كوروناۆيرۋس ينفەكتسياسىن حالىق جاسىرىن تويلارعا بارىپ جۇقتىرۋدا. بۇل تۋرالى "ادىرنا" ۇلتتىق پورتالى ينفورمبيۋرو جاڭالىقتار باعدارلاماسىنا سىلتەمە جاساپ حابارلايدى.
كوروناۆيرۋستان ەم الىپ جاتقان ناۋقاستاردىڭ ءبىرى جۋرناليست ارمان كاريموۆ جانىندا جاتقانداردىڭ باسىم بولىگى ۆيرۋستى مەرەكەلىك ءىس-شارادا، وتباسىلىق كەشتەردە جۇقتىرعانىن ايتادى. ول ءتىپتى ءوزىنىڭ دە قالاي ينفەكتسيا جۇقتىرعانىن بىلەدى.
"مەن قازىر ورتالىق كلينيكالىق اۋرۋحانادا جاتىرمىن. ناۋرىزدان كەيىن اۋرۋحاناعا ءتۇستىم. بىراق ۆيرۋستى ودان بۇرىن جۇقتىرعانمىن. شامامەن ۆيرۋستى ءدارىحانادا جۇقتىرىپ العان سياقتىمىن. مەن جورگەك الۋعا بارعانمىن. سول كەزدە ءتۇرى كوگەرىپ كەتكەن ەر ادامدا كەزەكتە تۇرعان. ءوزىن ناشار سەزىنىپ تۇرعان ەدى. مەنىڭ ويىمشا سول كىسى كوروناۆيرۋسپەن اۋىرعان. ويتكەنى ۆيرۋسقا قارسى دارىلەر ساتىپ الدى", - دەيدى ول.
سونىمەن قاتار، ارمان كاريموۆ اۋرۋحاناداعى قازىرگى جاعداي ءماز ەمەس ەكەنىن جەتكىزدى. مەرەكەلىك ءىس-شارالارعا بارىپ، بۇكىل وتباسىن جۇقتىرعاندار وتە كوپ ەكەنىن ايتادى ول.
"اۋرۋحانادا ادامدار جەكە-جەكە پالاتادا جاتىر. ءبىرى وتتەگىمەن تىنىس الىپ جاتسا، ەندى ءبىرى دارىگەر جازىپ بەرگەن پرەپاراتتاردى قابىلداۋىن جالعاستىرۋدا. بارلىق بولمەلەر جابىق. بۇل جەردە اۋىرىپ جاتقاندار ۆيرۋستى ەكى جولمەن جۇقتىرعان. ءبىرىنشى جولى - وزدەرى ءارتۇرلى كەشتەرگە، تويلارعا بارعان. ەكىنشى جولى - جاقىندارىنان جۇقتىرعان. بۇل ماسەلەگە ءمان بەرۋ كەرەك. ايىپپۇل كولەمىن دە ارتتىرۋ قاجەت", - دەيدى ارمان كاريموۆ.
ول ءبىر پالاتادا جاتقان ناۋقاستاردىڭ ۆيرۋستى قالاي جۇقتىرعانى تۋرالى بىرنەشە وقيعامەن ءبولىستى.
"اتا مەن اجە 30-50 ادام جينالعان قونىس تويعا بارىپتى. ءۇش كۇننەن كەيىن اۋىرىپ، جەدەل جاردەم شاقىرعان. قاتەلەسپەسەم جەدەل جاردەم كەلمەپتى. ءۇش كۇننەن كەيىن اتاسى تىنىس جەتىسپەۋشىلىكتەن كوز جۇمىپتى. ال اجەي قازىر ەم الىپ جاتىر", - دەيدى ول.
تويعا بارماسا دا، بارلاردا قىدىرىپ جۇرگەن جاس جىگىت تە اتا-اناسىنا ۆيرۋس جۇقتىرىپ، قازىر ءوزى اۋرۋحانادا جاتقان كورىنەدى.
"تاعى ءبىر بالا لاۋنج-بارلارعا بارىپ جۇرگەن. بارلىعى اشىق، جاسىرىن جۇمىس ىستەپ جاتىر دەيدى. دوستارىمەن بارعا بارامىن دەپ اتا-اناسىنا جانە تاعى ءبىر دوسىنا ۆيرۋس جۇتىرىپتى", - دەيدى كاريموۆ.
اۋىرعانداردىڭ اراسىندا تويعا بارعىسى كەلمەسە دە، "ۇيات بولادى" دەپ بۇكىل وتباسىنىڭ ءومىرىن قاۋىپكە تىككەندەر دە بار.
"بانۋ ەسىمدى قىز تالعاردا جاسىرىن تۇردە وتكەن قۇربىسىنىڭ ۇزاتۋىنا بارىپتى. تويعا بارىپ كەلگەننەن كەيىن ۇيىندەگىلەردىڭ بارلىعىنا ۆيرۋس جۇقتىرعان. بانۋ تويعا بارعىسى كەلمەپتى. بىراق ەڭ جاقىن قۇربىسى ۇزاتىلعاندىقتان، كوڭىلىن قالدىرماعان", - دەيدى جۋرناليست.
ناۋقاستاردىڭ باسىم بولىگى جاسىرىن تويلارعا، رۇقسات ەتىلمەگەن ءىس-شارالارعا، ادام كوپ جينالعان جەرگە وزدەرى بارعانىن ايتىپ اشىنعان جۋرناليست بۇلاي جالعاسا بەرسە، جاعداي جاقسارمايتىنىن تۇسىندىرمەك بولدى.
"بۇل قارقىنمەن شىلدە ايىنداعى جاعدايعا قايتادان جەتەمىز. ول كەزدەرى ءمايىتحانالاردىڭ ءوزى تولىپ كەتكەن ەدى. دارىگەرلەرگە ارنايى كيىممەن ءجۇرۋ وتە قيىن. قازىر كۇن جىلىناتىن بولسا، ءتىپتى قيىنعا سوعايىن دەپ تۇر. سوندىقتان، وزدەرىڭىزدى كۇتىڭىزدەر، ۆيرۋستى ۇيگە تاسىماڭىزدار. ومىرىڭىزدە بۇل تويدان باسقا توي بولمايتىنداي بارلىق جەرگە بارا بەرۋدىڭ قاجەتى جوق", - دەيدى ارمان كاريموۆ.
