قازاقستاندا ناقتى جالاقىنىڭ مولشەرى 221 مىڭ تەڭگەگە دەيىن وسەدى. بۇل تۋرالى پرەمەر-مينيستر اسقار مامين مالىمدەدى، دەپ حابارلايدى «ادىرنا» ۇلتتىق پورتالى Sputnik قازاقستان سايتىنا سىلتەمە جاساپ.
ول بيىل جۇمىسپەن قامتۋعا جاردەمدەسۋ شارالارىمەن 1,2 ميلليون ادام قامتىلاتىنىن اتاپ ءوتتى.
«ناقتى جالاقىنىڭ مولشەرى 10 پايىزعا، ياعني 221 مىڭ تەڭگەگە دەيىن ارتادى دەپ جوسپارلانىپ وتىر. جۇمىسسىزدىق دەڭگەيى 4,9 پايىزدان اسپايدى»، - دەدى مامين ۇكىمەت وتىرىسىندا.
ايتۋىنشا، پاۆلودار، قاراعاندى جانە اتىراۋ وبلىستارىندا تۇراقتى جۇمىس ورىندارىن قۇرۋ بويىنشا جۇمىس قارقىنى جاقسى. وسى رەتتە پرەمەر وزگە وڭىرلەرگە دە وسى جۇمىستى بەلسەندى جالعاستىرۋدى تاپسىردى. ول ءۇشىن بارلىق قۇرالدار مەن قاجەتتى رەسۋرستار بار، دەدى ۇكىمەت باسشىسى.
«باستاۋ بيزنەس» جوباسى تيىمدىلىگىن كورسەتتى. بيىل 30 مىڭ ادامدى كاسىپكەرلىك نەگىزدەرىنە وقىتۋ جوسپارلانىپ وتىر. «اتامەكەن» پالاتاسى ەڭبەك مينيسترلىگىمەن بىرلەسىپ، ءبىلىم الۋشىلاردىڭ سانىن كوبەيتسىن»، دەدى - مامين.
پرەمەر-مينيستر «ەڭبەك» ۇلتتىق جوباسى ەكونوميكا سالالارىن ساپالى باسەكەگە قابىلەتتى ەڭبەك رەسۋرستارىمەن قامتاماسىز ەتۋگە ءتيىس دەپ سانايدى.
وسىعان بايلانىستى ول ەڭبەك مينيسترلىگىنە 1 ماۋسىمعا دەيىن 2021-2025 جىلدارعا ارنالعان «ەڭبەك» ۇلتتىق جوباسىن ۇكىمەتكە ەنگىزۋدى تاپسىردى.
ۇلتتىق ەكونوميكا، ەڭبەك مينيسترلىكتەرى مەن اكىمدىكتەر 1 شىلدەگە دەيىن جۇمىسپەن قامتۋدىڭ وڭىرلىك كارتالارىن ازىرلەۋگە ءتيىس. مامين جۇمىسپەن قامتۋدىڭ جوسپارلى كورسەتكىشتەرىنە قول جەتكىزۋگە جانە تۇراقتى جۇمىس ورىندارىن قۇرۋعا ەرەكشە نازار اۋدارۋ قاجەت ەكەنىن ايتتى.
سونداي-اق قۇزىرلى ورگاندار مەن اكىمدىكتەرگە «ەڭبەك» جوباسىنىڭ ءىس-شارالارىن قارجىلاندىرۋدى قامتاماسىز ەتۋ مىندەتى جۇكتەلدى.
