Qazaqstanda naqty jalaqynyń mólsheri 221 myń teńgege deıin ósedi. Bul týraly premer-mınıstr Asqar Mamın málimdedi, dep habarlaıdy «Adyrna» ulttyq portaly Sputnik Qazaqstan saıtyna silteme jasap.
Ol bıyl jumyspen qamtýǵa járdemdesý sharalarymen 1,2 mıllıon adam qamtylatynyn atap ótti.
«Naqty jalaqynyń mólsheri 10 paıyzǵa, ıaǵnı 221 myń teńgege deıin artady dep josparlanyp otyr. Jumyssyzdyq deńgeıi 4,9 paıyzdan aspaıdy», - dedi Mamın úkimet otyrysynda.
Aıtýynsha, Pavlodar, Qaraǵandy jáne Atyraý oblystarynda turaqty jumys oryndaryn qurý boıynsha jumys qarqyny jaqsy. Osy rette premer ózge óńirlerge de osy jumysty belsendi jalǵastyrýdy tapsyrdy. Ol úshin barlyq quraldar men qajetti resýrstar bar, dedi úkimet basshysy.
«Bastaý bıznes» jobasy tıimdiligin kórsetti. Bıyl 30 myń adamdy kásipkerlik negizderine oqytý josparlanyp otyr. «Atameken» palatasy eńbek mınıstrligimen birlesip, bilim alýshylardyń sanyn kóbeıtsin», dedi - Mamın.
Premer-mınıstr «Eńbek» ulttyq jobasy ekonomıka salalaryn sapaly básekege qabiletti eńbek resýrstarymen qamtamasyz etýge tıis dep sanaıdy.
Osyǵan baılanysty ol eńbek mınıstrligine 1 maýsymǵa deıin 2021-2025 jyldarǵa arnalǵan «Eńbek» ulttyq jobasyn úkimetke engizýdi tapsyrdy.
Ulttyq ekonomıka, eńbek mınıstrlikteri men ákimdikter 1 shildege deıin jumyspen qamtýdyń óńirlik kartalaryn ázirleýge tıis. Mamın jumyspen qamtýdyń josparly kórsetkishterine qol jetkizýge jáne turaqty jumys oryndaryn qurýǵa erekshe nazar aýdarý qajet ekenin aıtty.
Sondaı-aq quzyrly organdar men ákimdikterge «Eńbek» jobasynyń is-sharalaryn qarjylandyrýdy qamtamasyz etý mindeti júkteldi.
