ەلوردادا ساۋىردىڭ 3-ءى كۇنى «سارايشىق: ۇلى قالا تاريحى» تاقىرىبىمەن حالىقارالىق عىلىمي كونفەرەنتسيا وتكىزۋ جوسپارلانىپ وتىر، دەپ حابارلايدى "ادىرنا."كز قر مادەنيەت جانە سپورت مينيسترلىگىنىڭ ءباسپاسوز قىزمەتىنە سىلتەمە جاساپ.
عىلىمي ماجىلىسكە 40-تان استام وتاندىق جانە شەتەل عالىمدارى قاتىسادى. بارلىعى ورتاعاسىرلىق سارايشىق قالاشىعىن ساقتاپ قالۋ بويىنشا شارالار مەن عىلىمي زەرتتەۋلەردىڭ قورىتىندىسىن تالقىعا سالماق. كونفەرەنتسيانىڭ نەگىزگى ماقساتى - قالاشىقتى قالپىنا كەلتىرۋ مەن بۇزىلۋدان ساقتاۋ ماسەلەلەرىنە جوعارى بىلىكتى شەتەلدىك جانە وتاندىق عالىمداردىڭ نازارىن اۋدارۋ. سەبەبى بۇگىنگى تاڭدا تابيعي-كليماتتىق جانە انتروپوگەندىك فاكتورلاردىڭ اسەرىنەن سارايشىق قالاشىعىنىڭ جاعدايى مينيسترلىكتىڭ، اكىمدىكتىڭ، قوعام مەن عالىمداردىڭ الاڭداۋشىلىعىن تۋعىزۋدا.
عىلىمي كونفەرەنتسياعا قر مادەنيەت جانە سپورت ءمينيسترى ا.مۇحامەديۇلى، قر پارلامەنتىنىڭ دەپۋتاتتارى، تاريح عىلىمدارىنىڭ دوكتورلارى، بەلگىلى ارحەولوگتار ز.ساماشەۆ، ك.بايپاقوۆ، ج.تايماعامبەتوۆ، ب. كومەكوۆ، فيلوسوفيا عىلىمدارىنىڭ دوكتورى، پروفەسسور، قر ۇعا اكادەميگى ع.ەسىم، ا. باقتىگەرەەۆا، م. قۇلكەنوۆ، ق.جىلقىشيەۆ ءتارىزدى قوعام جانە مادەنيەت قايراتكەرلەرى، جاقىن جانە الىس شەتەل عالىمدارى، قوعامدىق ۇيىمداردىڭ، مەملەكەتتىك مەكەمەلەردىڭ وكىلدەرى، جوعارى وقۋ ورىندارىنىڭ ستۋدەنتتەرى جانە باق قاتىسادى.
سونىمەن قاتار، كونفەرەنتسيا اياسىندا سارايشىق قالاشىعى تاريحىنا ارنالعان كورمە ۇيىمداستىرىلادى. كورمەگە ەجەلگى قالاعا قاتىستى كوپتەگەن قۇندى ارحەولوگيالىق بۇيىمدار، كارتينالار جانە تاعى باسقا زاتتار قويىلاتىن بولادى.
"ادىرنا."كز
