ەلوردادا شوقان ءۋاليحانوۆ كوشەسىنىڭ ءبىر بولىگى نوسەر كارىزىن جالپى قالالىق جەلىگە قوسۋ جۇمىستارىنىڭ جۇرۋىنە بايلانىستى ۋاقىتشا جابىلادى، دەپ ححابارلايدى "ادىرنا" ۇلتتىق پورتالى Tengrinews.kz-كە سىلتەپ. بۇل تۋرالى قالا اكىمدىگىنىڭ ءباسپاسوز قىزمەتى مالىمدەدى.
"شوقان ءۋاليحانوۆ كوشەسى جانىبەك تارحان كوشەسىنەن اعىباي باتىر كوشەسىنە دەيىنگى ۋچاسكەدە نوسەر كارىزىن جالپى قالالىق جەلىگە قوسۋ جۇمىستارىنىڭ جۇرۋىنە بايلانىستى 2021 جىلدىڭ 25 ءساۋىرى ساعات 06.00-گە دەيىن جابىلادى", - دەلىنگەن حابارلامادا.
كولىك قوزعالىسى ءتيىستى جول بەلگىلەرىن ورناتۋ ارقىلى ۋاقىتشا سحەما بويىنشا جابىق ۋچاسكەنى اينالىپ ءوتۋ ءۇشىن ۇيىمداستىرىلادى. اتالعان كوشە ارقىلى ترانزيتتىك كولىكتىڭ ءوتۋى جوندەۋ جۇمىستارى اياقتالعانعا دەيىن تولىعىمەن جابىلادى. ال جاقىن ماڭداعى تۇرعىنداردىڭ تۇرعىلىقتى جەرىنە جەتۋى ءۇشىن بالاما مارشرۋتتار قاراستىرىلعان.
"نۇر-سۇلتان قالاسىنىڭ پوليتسيا دەپارتامەنتى ەلوردا تۇرعىندارى مەن قوناقتارىن قۇرىلىس جۇمىستارى جۇرگىزىلىپ جاتقان نەمەسە اياقتالماعان جول ۋچاسكەلەرىنە اسا مۇقيات بولۋدى جانە قازاقستان رەسپۋبليكاسىنىڭ جول قوزعالىسى ەرەجەلەرىنىڭ تالاپتارىن ساقتاي وتىرىپ، ۋاقىتشا سحەما بويىنشا بەلگىلەنگەن جول بەلگىلەرىن ەسكەرە وتىرىپ، باعىتىن جۇزەگە اسىرۋدى سۇرايدى", - دەلىنگەن ەلوردا پد حابارلاماسىندا.
"ادىرنا" ۇلتتىق پورتالى
