استانادا قالاعا كىرە بەرىس جولعا بوگەت ورناتۋ ماسەلەسى كوتەرىلدى، دەپ حابارلايدى “ادىرنا” ۇلتتىق پورتالى.
“بۇل جوبا كوشى-قوندى باقىلاۋعا، سونداي-اق قىلمىستى ازايتۋعا سەپتىگىن تيگىزەدى”، - دەيدى استانا ءماسليحاتىنىڭ قۇقىقتىق ءتارتىپ جانە قوعاممەن بايلانىس ماسەلەلەرى جونىندەگى تۇراقتى كوميسسياسىنىڭ توراعاسى ازامات ايتحوجين.
دەپۋتاتتىڭ ايتۋىنشا، ەلوردادا وتكىزۋ پۋنكتتەرىنىڭ جوقتىعى ساپاسىز ونىمدەردىڭ اكەلىنۋىنە، سونداي-اق قالاداعى كولىك قوزعالىسىنىڭ وتە از بولۋىنا سەبەپ بولىپ وتىر.
"قالاعا لاستانعان ەت اكەلىنىپ جاتىر دەگەن ماسەلەنى بىرنەشە رەت كوتەردىك – بۇل ءبىر. بۇگىندە ەلورداعا ەسىرتكى دە اكەلىنۋدە. وڭتۇستىك وبلىستاردان دا ادامدار كەلىپ جاتىر، ولاردىڭ وتكەنىن بىلمەيمىز. جانە ت.ب. بۇگىندە قالامىزدىڭ كىرە بەرىسىنە بوگەت قوياتىن كەز كەلدى دەگەن سۇراقتى ەشكىم كوتەرگەن جوق. وسى ماسەلەنى نەگە كوتەرمەيمىز، ايتىڭىزشى”، - دەدى ايتحوجين استانا قالاسى ءماسليحاتىنىڭ زاڭدىلىق، قۇقىقتىق ءتارتىپ جانە حالىقپەن جۇمىس ماسەلەلەرى جونىندەگى تۇراقتى كوميسسياسىنىڭ وتىرىسىندا.
دەپۋتاتتىڭ ساۋالىنا جاۋاپ بەرگەن استانا پوليتسيا دەپارتامەنتىنىڭ وكىلى جولعا بوگەت ورناتۋ ماسەلەسى قارالىپ جاتقانىن، باسقارما باسشىسى بۇل ماسەلەنى ىشكى ىستەر ءمينيسترىنىڭ الدىنا قويعانىن ايتتى.
“باقىلاۋ بەكەتتەرىنىڭ ماسەلەسىن تەز ارادا شەشۋ كەرەك. “تەاتر كيىم ىلگىشتەن باستالادى”، سولاي ەمەس پە؟ استاناعا كەز كەلگەن ادام كىرەدى. وزبەكستان مەن قىرعىزستان ازاماتتارى وڭتۇستىك قازاقستانعا كەلىپ، شەكارادان ءوتىپ جاتىر. بارلىعى وسىندا، استاناعا اسىعادى»، - دەپ قوستى ازامات ايتحوجين.
“ادىرنا” ۇلتتىق پورتالى
