ەلىمىزدە زاڭ شىعارۋ قىزمەتى ساپاسى دەڭگەيىنىڭ تومەندەۋىنەن بولەك، ەرەكشە قاۋىپتى ماسەلەلەردىڭ ءبىرى - عىلىمي مەكتەپ ساباقتاستىعىن قالىپتاستىرا الماۋ. بۇل تۋرالى M.S. Narıkbaev atyndaģy KAZGUU Unıversıteti-ءنىڭ باسقارما توراعاسى تالعات نارىكباەۆ «وزبەكستاندا زاڭ عىلىمىن دامىتۋدىڭ جانە زاڭ شىعارۋ قىزمەتىن جەتىلدىرۋدىڭ وزەكتى ماسەلەلەرى» اتتى عىلىمي-پراكتيكالىق كونفەرەنتسياسىندا مالىمدەدى.
حالىقارالىق كونفەرەنتسيا بارىسىندا باسقارما توراعاسى اكادەميالىق مانساپتىڭ تارتىمدىلىعىن جوعالتۋعا قاتىستى پىكىرىمەن ءبولىستى.
«قازاقستاندا عالىمداردىڭ ورتاشا جالاقىسى 129 مىڭ تەڭگەنى (300 اقش دوللارى) قۇرايدى، ياعني ەلدەگى ورتاشا جالاقىدان ءبىر جارىم ەسە از. ۋنيۆەرسيتەتتەگى جاس زاڭگەر-وقىتۋشىنىڭ جالاقىسى كورپوراتيۆتى سەكتورداعى بىلىكتىلىگى وزىمەن تەڭ مامانعا قاراعاندا 5 ەسە از»، - دەدى تالعات نارىكباەۆ.
سپيكەردىڭ ايتۋىنشا، بۇل تۇلەكتەردىڭ ۋنيۆەرسيتەتتەن جاپپاي كەتۋىنە جانە كونسالتينگتىك نەمەسە حالىقارالىق زاڭگەرلىك فيرمالاردان جۇمىس ىزدەۋىنە اكەلىپ سوقتىرادى: «بۇگىنگى تاڭدا قازاقستانداعى بەلگىلى زاڭگەر عالىمداردىڭ ورتاشا جاسى - 65 جاس. ياعني، بىلىكتى عىلىمي كادرلار قارتايىپ جاتىر. سايكەسىنشە، دارىندى ستۋدەنتتەردى دايىندايتىن ەشكىم جوق. بۇل ۆاكۋم وتە قاۋىپتى قۇبىلىس جانە ءتيىستى شارالاردى قازىردەن باستاپ قابىلداۋىمىز كەرەك».
كونفەرەنتسيا بارىسىندا KAZGUU باسقارما توراعاسى جوعارىدا اتالعان ماسەلەنى شەشۋ ءۇشىن جوعارى وقۋ ورىندارىندا لايىقتى جالاقىنى قامتاماسىز ەتۋ ارقىلى جاس مامانداردى عىلىمي ورتاعا بەلسەندى تۇردە تارتۋ قاجەت ەكەنىن باسا ايتتى.
M.S. Narıkbaev atyndaģy KAZGUU Unıversıteti-ءنىڭ ءباسپاسوز قىزمەتى
