ەڭبەكشىقازاق اۋدانىندا كوروناۆيرۋسقا قارسى ەكپە سالاتىن 26 كابينەت جۇمىسىن باستادى. وڭىردە ءوز ەركىمەن ىندەتكە توسقاۋىل بولامىن، ۆاكتسينا سالدىرامىن دەگەندەر سانى ارتىپ كەلەدى.
ناتيجەسىندە، اۋدان بويىنشا 7 مىڭنان اسا ادامعا ەكپە سالىندى. بۇل كورسەتكىشتىڭ ەسەلەپ وسەتىنى انىق. سوڭعى كەزدە ەلىمىزدە كوروناۆيرۋستىق ينفەكتسيامەن اۋىرعاندار كۇرت ءوستى. اسىرەسە، الماتىعا ىرگەلەس جاتقان وڭىرلەردە ۆيرۋس جۇقتىرعاندار كوبەيۋ ۇستىندە.
وسىعان بايلانىستى ەڭبەكشىقازاق اۋداندىق كوروناۆيرۋسپەن كۇرەس جونىندەگى جەدەل شتابتىڭ جيىنى وتكەن ەدى. وندا مەديتسينالىق مەكەمەلەردىڭ جاي-كۇيى جانە ءدارى-دارمەك قورىنىڭ جەتكىلىكتى دارەجەدە بولۋى جان-جاقتى ايتىلدى. سونداي-اق، كارانتيندىك شارالاردىڭ ساقتالۋىنا باقىلاۋ جۇرگىزەتىن مونيتورينگتىك توپتاردىڭ جۇمىسى دا تالقىلاندى.
جيىندا اۋدان اكىمى الىبەك جاقانباەۆ ۇيىمداستىرىلعان جۇمىستارمەن بىرگە كەيبىر اۋىلدىق وكرۋگ اكىمدەرىنىڭ ىندەتپەن كۇرەستە ءتيىستى دارەجەدە بەلسەندىلىك تانىتپاي وتىرعاندارىن سىنعا الدى. اسىرەسە، قوعامدىق تاماقتانۋ ورىندارى، ساۋدا-ساتتىق نۇكتەلەرى سياقتى حالىق كوپ شوعىرلاناتىن جەرلەردە كارانتين تالاپتارى ساقتالماي جاتقانى اتاپ كورسەتتى. سونىمەن قاتار اۋدان اكىمى باس دارىگەرگە ىندەت جۇقتىرعان ناۋقاستاردىڭ ەمدەلۋىن قاتاڭ باقىلاۋدا ۇستاۋ كەرەگىن، ەلدى مەكەندەردەگى موبيلدىك مەديتسينالىق توپتاردىڭ جۇمىسىن ودان ارى كۇشەيتۋدى مىندەتتەدى.
ايتا كەتۋ كەرەك، جىل باسىنان بەرى اۋداندا كوروناۆيرۋس ينفەكتسياسىنا شالدىققانداردىڭ سانى مىڭعا جۋىقتادى. وتكەن كۇندەردىڭ بىرىندە تاۋلىگىنە 28 ناۋقاس اۋرۋحاناعا تۇسكەن. ىندەتپەن كۇرەس توقتاۋسىز ءجۇرىپ جاتىر
