دەنساۋلىق ساقتاۋ مينيسترلىگى كوروناۆيرۋسقا قارسى ۆاكتسينانىڭ ءبىرىنشى دوزاسىنان كەيىن تۇماۋ تيگەن جاعدايدا نە ىستەۋ كەرەكتىگىن ءتۇسىندىردى، دەپ حابارلايدى «ادىرنا» ۇلتتىق پورتالى Sputnik قازاقستان سايتىنا سىلتەمە جاساپ.
سانيتارلىق-ەپيدەميولوگيالىق باقىلاۋ كوميتەتى توراعاسىنىڭ ورىنباسارى زاۋرە احمەتوۆانىڭ ايتۋىنشا، ەكپەدەن كەيىن تۇماۋ تيگەنى انىقتالسا، ەكى ايدىڭ ىشىندە ەكىنشى كومپونەنتىن الۋعا بولادى.
«ءبىرىنشى ەكپەدەن كەيىن ادام كوروناۆيرۋسقا ەمەس، باسقا ءبىر ينفەكتسياعا شالدىقسا، تولىعىمەن جازىلىپ شىققاننان كەيىن 60 كۇننىڭ ىشىندە ۆانكتسينانىڭ ەكىنشى كومپونەنتىن قابىلداۋعا بولادى. ال كوروناۆيرۋستى جۇقتىرسا، التى اي ءوتۋى كەرەك»، – دەدى احمەتوۆا ورتالىق كوممۋنيكاتسيالار قىزمەتىندە وتكەن ونلاين بريفينگتە.
وسى ورايدا مامان جۇكتىلىكتى جوسپارلاۋ ماسەلەسىن دە ءتۇسىندىردى. ونىڭ ايتۋىنشا، كوروناۆيرۋستىڭ ەكى دوزاسىن العاننان كەيىن 1,5-2 اي ءوتۋى ءتيىس. سول كەزدە ۆيرۋسقا قارسى يممۋنيتەت تولىعىمەن قالىپتاسادى. جۇكتىلىكتى دە جوسپارلاۋعا بولادى.
«ال ايەلدىڭ ۆاكتسينا سالدىرعاننان كەيىن جۇكتى بولعانى انىقتالسا، ەكىنشى كومپونەنتتى الۋدىڭ قاجەتى جوق»، – دەپ اتاپ كورسەتتى احمەتوۆا.
ايتا كەتەيىك، بۇگىندە رەسپۋبليكا بويىنشا رەسەيلىك «سپۋتنيك V» ۆاكتسيناسى ەگىلىپ جاتىر. وسى ايدىڭ سوڭىندا قازاقستاندىق «QazVac» ۆاكتسيناسىنىڭ العاشقى پارتياسى وڭىرلەرگە جەتكىزىلەدى دەگەن جوسپار بار.
