باۋىرجان بايبەك بەلسەندى جانبولات مامايدىڭ ايىپتاۋلارىن «جالا» دەپ، ونى سوتقا بەرەتىنىن ايتتى. تىكەلەي ەفيردە سۇحبات بەرگەن بايبەك «ماماي دەموكراتيانىڭ جاۋاپكەرشىلىك ەكەنىن ءتۇسىنۋى كەرەك» دەپ ەسكەرتتى. ال ءوز كەزەگىندە بەلسەندى جانبولات ماماي شەنەۋنىكتى دەباتقا شاقىردى، دەپ حابارلايدى «ادىرنا» ۇلتتىق پورتالى The Qazaq Times سايتىنا سىلتەمە جاساپ.
بۇعان دەيىن جانبولات ماماي جۋرناليستىك زەرتتەۋىندە الماتى قالاسىنىڭ بۇرىنعى اكىمىن قالاداعى بىرقاتار «جەمقورلىق ىستەرگە» قاتىسى بار دەپ ايىپتاعان بولاتىن. كەيىننەن بلوگەر تاڭىربەرگەن بەردىوڭعاروۆتىڭ Youtube ارناسىندا قوناق بولعان باۋىرجان بايبەك بۇل مالىمدەمەگە جاۋاپ بەردى.
سۇحباتتا قازاقستاننىڭ ءبىرىنشى پرەزيدەنتى نازارباەۆتىڭ «ناقىل ءسوزىن» كەلتىرگەن بايبەك: «ەلباسى ءاردايىم ايتاتىن، «ەگەر ارىڭ تازا بولسا، وعان سەنىمدى بولساڭ، ءادىل سوتتا ار-نامىسىڭدى قورعا» دەپ. ءبىز دەموكراتيالىق مەملەكەت قۇرىپ جاتىرمىز. بىراق دەموكراتيا انارحيا ەمەس، زاڭسىزدىق ەمەس. بۇل – زاڭنىڭ ۇستەمدىگى. ءار ادامنىڭ ءوز اتىن، ابىرويىن قورعاۋعا كونستيتۋتسيالىق قۇقىعى بار.
...ول ءوزىنىڭ ساياسي كارەراسىن قۇرتتى. جىكتەپ ايتاتىن بولساق، ەندىگى «ساياسي ولىك» دەۋگە بولادى. پارتيانىڭ كودەكسى مەن جارعىسىنا ساي بۇگىن ونى ازاماتتىق، اكىمشىلىك ءىس جۇرگىزۋ شەڭبەرىندە سوتقا بەرەتىنىمدى رەسمي مالىمدەيمىن. بۇلاي بولماۋى كەرەك دەپ ەسەپتەيمىن. مەن بۇل ارەكەتتى بولاشاقتا ماماي سياقتى ادامدار كىناسىز ادامداردى ايىپتاماس ءۇشىن جاسايمىن»، – دەدى.
سونىمەن قاتار شەنەۋنىك وزىنە – ءجۇز ەمەس، ون شاقتى كومپانيا عانا تيەسىلى ەكەنىن، ءبارىنىڭ دەكلاراتسياعا ەنگەنىن اتاپ ءوتىپ، سول ءۇشىن سالىق تولەيتىنىن دە ايتقان.
Nur Otan پارتياسى توراعاسىنىڭ ءبىرىنشى ورىنباسارى بايبەك مامايدىڭ مالىمدەمەسىنە پىكىر بىلدىرگەندە تاعى ءبىر مارتە نازارباەۆتى تىلگە تيەك ەتكەن. «2015 جىلى ەلباسى بەس ينستيتۋتسيونالدىق رەفورماعا باستاما بولدى، ينستيتۋتتار تۋرالى ايتتى. قاسىم-جومارت كەمەلۇلى بۇل يدەيانى دامىتىپ، حالىق ۇنىنە قۇلاق اساتىن مەملەكەتتىڭ تۇجىرىمداماسىن جاسادى. ەستيتىن مەملەكەت – بۇل جاي عانا ەستۋ ەمەس، سونىمەن قاتار جاۋاپ بەرۋ. مەن مەملەكەتتىك قىزمەتكەر ەمەسپىن، شىن مانىندە مەن ونى ىستەۋگە مىندەتتى ەمەسپىن»، – دەدى ول. وسىلايشا، الماتى قالاسىنىڭ بۇرىنعى اكىمى بەلسەندىنى سوتقا بەرەتىنىن ايتتى.
ال شەنەۋنىكتى دەباتقا شاقىرعان جانبولات ماماي ءوزىنىڭ Facebook پاراقشاسىندا: «ول مەنى سوتقا بەرەمىن دەپ وتىر عوي. بىراق قازاقستاندا ادىلەتتى سوت جوق. قازاقستاندىق سوتتاردىڭ بارلىعى Nur Otan باسشىلىعى قولىندا. اتقارۋشى بيلىك نە ايتادى، تۋرا سونداي شەشىم شىعارادى. سوندىقتان بايبەككە ايتقىم كەلەدى: ەگەر جاسىراتىن ەشتەڭەسى بولماسا، ەگەر وسى Nur Otan پارتياسىنىڭ جاساپ جاتقان ىستەرىنىڭ بارلىعىن دۇرىس دەپ ساناسا، وندا ول مەنىمەن تىكەلەي ەفيردە دەباتقا شىقسىن. Nur Otan-عا قاتىستى، ەلدىڭ دامۋىنا قاتىستى، ءوزىنىڭ جەمقورلىق ىستەرىنە قاتىستى، جەر داۋىنا قاتىستى وسى ماسەلەلەردىڭ بارلىعىن تىكەلەي ەفيردە حالىق الدىندا اشىق تالقىلايىق»، – دەدى.
