اتىراۋ وبلىسىنىڭ مادەنيەت جانە تىلدەردى دامىتۋ باسقارماسى اۋعانستان دەموكراتيالىق رەسپۋبليكاسىنان كەڭەس اسكەرلەرى شەكتەۋلى كونتينگەنتىنىڭ شىعارىلعانىنىڭ 35 جىلدىعىنا ارناپ سالتاناتتى شارا وتكىزبەكشى، - دەپ حابارلايدى ادىرنا ۇلتتىق پورتالى www.goszakup.gov.kz سايتىنا سىلتەمە جاساپ.
اۋعانستانعا كسرو اسكەرىن كىرگىزۋ تۋرالى شەشىم 1979 جىلدىڭ 12 جەلتوقسانىندا قابىلداندى. ارادا ون بەس كۇن وتكەن سوڭ، 27 جەلتوقساندا قىزىل اسكەر اۋعانستان شەكاراسىنا باسىپ كىردى. كسرو قارۋلى كۇشتەرى 1978 جىلى اۋعانستاندا بولعان ءساۋىر توڭكەرىسىنەن كەيىن بيلىككە كەلگەن "حالىقتىق، دەموكراتيالىق ۇكىمەتتى قولداپ", كورشىلەس ەلدىڭ سوتسياليستىك باعىتتا دامۋىنا مۇددەلى بولعان ەدى. كەڭەستەر وداعى اسكەرىنىڭ اۋعانستان اۋماعىن باسىپ كىرگەنى، ونىمەن قويماي ىشكى ىسىنە قول سۇققانى جەرگىلىكتى حالىققا ۇناماي، ىمىراسىز سوعىس باستالدى. ول سوعىس ون جىلعا سوزىلىپ، 1989 جىلدىڭ 15 اقپانىندا كەڭەس اسكەرى "شەگىنۋگە" ءماجبۇر بولدى.
تاۋەلسىز اۋعان ەلىنە كسرو-نىڭ اسكەر كىرگىزۋىنىڭ دۇرىس-بۇرىستىعىنا تاريحي تۇرعىدان ءالى باعا بەرىلگەن جوق. ارادا شيرەك عاسىردان اسا ۋاقىت وتسە دە اۋعانستاندا قان كەشكەن مىڭداعان ينتەرناتسيونال-اسكەريلەر كىم ءۇشىن، نە ءۇشىن سوعىسقاندارىن بىلە الماي كەلەدى.
ءدال وسىنداي جۇمباعى كوپ سوعىستىڭ اياقتالعانىنا 35 جىل تولۋىن تاۋەلسىز قازاقستان ەلىنىڭ ماڭىز بەرىپ، تويلاعانى قانشالىقتى دۇرىس؟ اۋعانستاننان كەڭەس اسكەرى شىعارىلعان كۇندى تويلاۋ ارقىلى ءبىز كەڭەستەر وداعىنىڭ سول كەزدەگى ساياساتىن قولدايمىز با، جوق الدە ايىپتاماقپىز با؟
اتىراۋ وبلىسىنىڭ مادەنيەت باسقارماسى بۇل سۇراقتارعا جاۋاپ ىزدەپ اۋرە بولماسا كەرەك، سالتاناتتى شارانى وتكىزۋگە وبلىس بيۋدجەتىنەن 3 500 000 تەڭگە ءبولىپ تەندەر وتكىزىپتى. تەندەردىڭ تەحنيكالىق سيپاتتاماسىندا سالتاناتتى شارانىڭ 15 اقپان كۇنى ماحامبەت وتەمىسۇلى اتىنداعى قازاق دراما تەاترىنىڭ كونتسەرتتىك زالىندا وتەتىنى كورسەتىلگەن. سونداي-اق، تاپسىرىستى ورىنداۋشى 50 دانا شاقىرۋ بيلەت تاراتىپ، 2 دانا باننەر شىعارىپ، ساحنانى بەزەندىرىپ، 6 دانا وتشاشۋ شاشۋعا، ت.ب جۇمىستار اتقارۋعا مىندەتتەلگەن.
مەملەكەتتىك ساتىپ الۋدىڭ جەڭىمپازى 31 قاڭتار كۇنى انىقتالادى.
ءبىر قىزىعى، تەحنيكالىق سيپاتتامادا ارداگەرلەرگە 40 گۇل سىيلاۋ تۋرالى دا جازىلىپتى. رەسمي مالىمەتتەرگە سۇيەنسەك، 1979-1989 جىلدارى ارالىعىنداعى اۋعان سوعىسىنا اتىراۋ وبلىسىنان 782 جاۋىنگەر قاتىسقان. سوندا اتىراۋلىق 782 جاۋىنگەردەن بۇگىنگى تاڭدا امان قالعانى قىرىق-اق ارداگەر مە؟ مادەنيەت باسقارماسى ارداگەرلەرگە قۇرمەت كورسەتەر بولسا، نەگە ءبارىن تۇتاس قامتىمايدى؟
ءبىز كوكەيگە كەلگەن جوعارىداعى سۇراقتاردى اتىراۋ وبلىستىق مادەنيەت جانە تىلدەردى دامىتۋ باسقارماسىنىڭ باسشىسىنا جولدادىق. جاۋاپ كەلىپ جاتسا، ونى دا جاريالايتىن بولامىز...
قانات بىرلىكۇلى
ادىرنا ۇلتتىق پورتالى
