قازاقستاندىق اۆتوبيزنەس قاۋىمداستىعىنىڭ (قابق) دەرەكتەرى بويىنشا، 2021 جىلدىڭ ءۇش ايىندا قازاقستان اۋماعىندا جالپى قۇنى 140,4 ميلليارد تەڭگەدەن اساتىن 19848 تەحنيكا شىعارىلعان. مۇنىڭ 66%-ى قوستاناي وبلىسىنداعى «سارىارقااۆتوپروم» زاۋىتىنا تيەسىلى. قازىر وڭىردە Chevrolet اۆتوموبيلدەرىنە دەگەن سۇرانىس ارتقان. قوستانايلىقتار ءبىرىنشى توقساندا وسى كولىكتىڭ 10 مىڭنان استام بىرلىگىن نارىققا شىعارعان.
«ءۇش ايدىڭ قورىتىندىسى بويىنشا قوستاناي اۆتوموبيل زاۋىتى 13063 تەحنيكا شىعاردى، بۇل وتكەن جىلدىڭ سايكەس كەزەڭىمەن سالىستىرعاندا 34,7% -عا ارتىق. ءبىز ۇنەمى اۆتوموبيل ءوندىرىسىنىڭ دەڭگەيىن كوتەرۋگە عانا ەمەس، سونىمەن بىرگە زامان تالاپتارىنا ساي كولىكتەردى شىعارۋعا دا ۇمتىلامىز. قازىر تەك قازاقستان نارىعى عانا ەمەس، ەكسپورت تۋرالى دا ءسوز قوزعاي الامىز. جىل باسىنان بەرى 2000-عا جۋىق كولىك شەتەلگە جىبەرىلدى. بۇل ءبىزدىڭ ءوڭىر ءۇشىن، ەلدىڭ ءاۆتووندىرىسى ءۇشىن ايتارلىقتاي جەتىستىك»، - دەيدى «سارىارقااۆتوپروم» جشس ديرەكتورى سىرىم سەمەيباەۆ.
2020 جىلى دا قوستانايلىق زاۋىت ءونىمدى جۇمىس ىستەدى. بىلتىر 40 مىڭنان استام كولىك قۇراستىرىلىپ، رەكوردتىق دەڭگەيگە شىقتى. وسى جىلى كاسىپورىن Jac, Chevrolet, UAZ جانە MAN برەندتەرىمەن كەلىسىم-شارتتى ۇزارتپاق. بۇل تىزىمگە ناۋرىز ايىندا KIA اۆتوموبيل شىعاراتىن كومپانياسى قوسىلدى. جوبا شەڭبەرىندە جىلىنا 20 مىڭ KIA اۆتوموبيلدەرىن شىعارۋ جوسپارلانعان. ءونىمدى وقشاۋلاۋ دەڭگەيى شاناقتاردى دانەكەرلەۋ جانە بوياۋ وپەراتسيالارىن قوسا العاندا، ۇساق توراپتى ءوندىرىس تەحنولوگيالارىن قولدانۋ ارقىلى 50% دەيىن ارتتىرىلاتىن بولادى.
سونىمەن قاتار جاقىندا «سارىارقااۆتوپروم» مەن «اۆتوۆاز» زاۋىتى اراسىندا سەرىكتەستىك تۋرالى كەلىسىمگە قول قويىلدى.
سىرىم سەمەيباەۆتىڭ ايتۋىنشا، قازاقستاننىڭ ءىرى اۆتوموبيل زاۋىتى بيىل 100 مىڭ تەحنيكانى قۇراستىرۋعا نيەتتى. سەبەبى مەملەكەت قولداۋىنىڭ ارقاسىندا كاسىپورىن كادر ساپاسىن تومەندەتكەن جوق. كەرىسىنشە ماماندارىن شەتەلدەرگە ءبىلىمىن جەتىلدىرۋگە جىبەرىپ، ءىرى زاۋىتتارمەن تىعىز بايلانىس ورناتتى.
