2014 جىلى ۋكرايناعا رەسەي اگرەسسياسى باستالىپ، قىرىمدى ماسكەۋ وككۋپاتسيالاپ الدى. ال ۋكراينا شىعىسىندا سەپاراتيستەرگە قارۋ بەرىپ، رەسەي اسكەرىن ايىرىم بەلگىسىنسىز كىرگىزىپ، سوعىس باستادى. 2014 جىلدان اششى ساباق العان ۋكراينا اسكەرىن جاڭا قارۋ تۇرلەرىمەن جاراقتاندىرىپ، قورعانىس سالاسىن مودەرنيزاتسيالاۋدى باستادى. ۋكراينا شىعىسىنداعى سوعىستا 15 مىڭنان استام ادام قازا تاپتى. كيەۆ سەپاراتيستەر قولىنداعى شىعىس ايماعىن ازات ەتۋ وپەراتسياسىن باستاۋى مۇمكىن. قازىرگى ۋاقىتتا ۋكراينا اسكەرىندە قانداي قارۋ تۇرلەرى بار؟
كيەۆ قارۋدىڭ باسىم بولىگىن ناتو ەلدەرىن ساتىپ الۋدا. تەك قانا ساتىپ الماي، ونى مەڭگەرۋ بويىنشا ءتۇرلى جاتتىعۋلار ءوتىپ جاتىر. ەل شىعىسىنداعى ۇرىستا كوبىنە جەڭىل اتىس قارۋلارى ماڭىزدى ءرول ويناپ كەلەدى. سوندىقتان ءبىز تانك، تىكۇشاق جانە ۇشاقتان بولەك ۋكراينا اسكەرى سەپاراتيستەرگە قانداي قارۋ تۇرىمەن جاۋاپ قايتاراتىنىن قاراستىرىپ كورەلىك.
Bayraktar TB2 سوققى جاساۋشى دروندارى. بۇل درونداردى بىلمەيتىن قازاق جوق شىعار. ول ءوزىنىڭ ۇرىس دالاسىنداعى قۋاتىن ليۆيا مەن سيريادا كورسەتتى. ال قاراباق سوعىسىندا ءتىپتى شەشۋشى ءرول ويناپ، ارميان اسكەرىنىڭ تاس-تالقانىن شىعارۋشى قارۋعا اينالدى. 2018 جىلى ۋكراينا تۇركيادان 6 Bayraktar TB2 cوققى جاساۋشى دروندارىن ساتىپ الدى. درونداردىڭ سانى 2020 جىلى جانە 2021 جىلى ەكى مارتە تولىقتىرىلدى. قازىرگى تاڭدا سەپاراتيستەر قولىندا بۇل درونداردى اتىپ تۇسىرەتىن قارۋ جوقتىڭ قاسى. ءتىپتى رەسمي قورعانىس مينيسترلىگى بار، اسكەرى ءتۇرلى قارۋ تۇرىمەن جاراقتالعان ارمەنيانىڭ ءوزى قاراباقتا بۇل دروندارعا ايتارلىقتاي قارسىلىق كورسەتە المادى.
Javelin تانككە قارسى كەشەنى. بۇل قارۋ "تانك ورتەۋشى" اتاۋىنا يە بولعان. رەسمي ۆاشينگتون كيەۆكە بۇل قارۋدى بەرۋ بويىنشا ۇزاق ويلانىپ، اقىرى بەردى. سەبەبى بۇل قارۋ قۋاتتى، جاۋ اسكەرىنىڭ تانك، بتر، بمپ سىندى بروندى تەحنيكاسىن تاس-تالقان ەتەدى. رەسەي ۇزاق جىلدار بويى FGM-148 Javelin سىندى قارۋ ءتۇرىن جاساۋدى ويلاستىرۋدا، الايدا ازىرگە ناتيجەسىز. قارۋدىڭ ەرەكشەلىگى سول، زىمىران تراەكتورياسى اتىلعان سوڭ باعىتىن وزگەرتىپ، تەحنيكانىڭ ەڭ وسال تۇسى سانالاتىن توبەسىنەن تۇسەدى. بۇل دەگەنىمىز تانك پەن بمپ، ءبتردىڭ ءاپ-ساتتە وتقا ورانۋىنا اسەر ەتەدى. قازىرگى تاڭدا ۋكراينادا اشىق دەرەكتەرگە سۇيەنسەك 52 Javelin تانككە قارسى كەشەنى بار.
MFTR-2100 رادارى. بۇل راداردى ۋكراينا دانيادان ساتىپ العان. رادار كەشەنى بپلا، ۇشاقتاردى، زىمىران كەشەندەرىنەن اتىلعان زىمىرانداردى جوعارى دالدىكپەن تابادى. ءبىر مەزەتتە 256 نىسانعا دەيىن انىقتاي الادى. ۋكراينا دانيادان اتالمىش رادار كەشەنىن تاعى دا ەسەلەپ ساتىپ الۋدى جوسپارلاپ وتىر.
"ولحا" زىمىران كەشەنى. بۇل كەڭەستىك "سمەرچ" كەشەنىنە ۇقساس. ۋكراينانىڭ ءتول تۋىندىسى. 2018 جىلى ۋكراينانىڭ قورعانىس سالاسىنا كەلىپ ءتۇستى. ال 2019 جىلى زىمىران كەشەنىنىڭ مودەرنيزاتسيالانعان "ولحا-م" ءتۇرى سىناقتان ءساتتى ءوتتى. زىمىران كەشەنى 120 شاقىرىمداعى نىساندى جويا الادى.
"Dana-م2" وزدىگىنەن جۇرەتىن ارتيللەريالىق قوندىرعىسى. ۋكراينا 26 دانا چەحيالىق وزدىگىنەن جۇرەتىن ارتيللەريالىق قوندىرعىسىن ساتىپ الدى. بۇل قوندىرعىنىڭ سىرتقى برونى ءتوزىمدى، 20 شاقىرىمداعى نىساندى جويا الادى.
2س1 «گۆوزديكا» وزدىگىنەن جۇرەتىن گاۋبيتساسى. ۋكراينادا بۇل گاۋبيتسانىڭ 300-دەن استام داناسى بار. ارينە جاڭا قارۋ ءتۇرى ەمەس، دەگەنمەن ول تالاي اسكەري قاقتىعىستا ءوزىنىڭ تيىمدىلىگىن كورسەتكەن. سوڭعى ەكى جىلدا كيەۆ چەحيادان تاعى دا وسى گاۋبيتسالاردى ساتىپ الدى.
Barrett سنايپەرلىك مىلتىعى. ۋكراينا 2015 جىلى اقش-تان وسى قارۋ ءتۇرىن الا باستادى. سول ۋاقىتتان باستاپ ۋكراين مەرگەندەرىنىڭ سەپاراتيستەر مەرگەندەرىنەن ارتىقشىلىعى ەسەلەپ ارتتى. ويتكەنى Barrett سنايپەرلىك مىلتىعىنىڭ وعى ۇزاققا ۇشادى، ءدال تيەدى جانە وعى تيگەن جەردى جۇلىپ تۇسەدى.
ارينە بۇل ۋكراينا اسكەرىندە بار جۇزدەگەن قارۋ تۇرلەرىنىڭ ءبىرشاماسى عانا. كيەۆتە تانكتەر، ۇشاقتار مەن تىكۇشاقتار، زەڭبىرەكتەر، جاعالاۋ كۇزەتىنە ارنالعان كەمەلەر مەن اۆتومات، پۋلەمەت تۇرلەرى، اي سايىن ناتو ەلدەرىنەن كەلىپ جاتقان بارلاۋشى دروندار، گراناتا تۇرلەرى مەن قورعانىش كوستيۋمدەرى، مينالار مەن تاپانشالار جانە باسقا قارۋلار بار.
اسحات قاسەنعالي
"ادىرنا" ۇلتتىق پورتالى
