ەڭبەك جانە حالىقتى الەۋمەتتىك قورعاۋ مينيسترلىگى زەينەتاقى تولەۋ جۇيەسىنە قاتىستى ماڭىزدى اقپاراتتى جاريالادى، دەپ حابارلايدى "ادىرنا" ۇلتتىق پورتالى مەملەكەتتىك ورگاننىڭ رەسمي سايتىنا سىلتەمە جاساپ.
ايتا كەتەيىك، 2018 جىلى 1 شىلدەدەن باستاپ مەملەكەتتىك بازالىق زەينەتاقى ءاربىر ادامنىڭ زەينەتاقى جۇيەسىندەگى تاجىريبەسىن ەسكەرە وتىرىپ، جەكە-دارا تاعايىندالادى. وسى جۇيەگە سايكەس، 1998 جىلعى 1 قاڭتارداعى جاعداي بويىنشا ىنتىماقتى جۇيەدە جۇمىس ىستەگەن ۋاقىتى، سونداي-اق مىندەتتى زەينەتاقى جارنالارى تولەنگەن كەزەڭدەر زەينەتاقى جۇيەسىندەگى ەڭبەك وتىلىنە قوسىلادى.
وسىلايشا، زەينەتاقى جۇيەسىندەگى جۇمىس ءوتىلى 10 جىل نەمەسە ودان از بولعان جاعدايدا نەمەسە مۇلدە جوق بولسا، بازالىق زەينەتاقى ەڭ تومەنگى كۇنكورىس دەڭگەيىنىڭ 54 پروتسەنتىن (19 مىڭ تەڭگەنىڭ اينالاسىندا ) قۇرايدى. ال 10 جىلدان اسقان ءار جىل ءۇشىن 2 پروتسەنت قوسىلادى.
"مىسالى، ەگەر ءسىز 20 جىل قاتىسساڭىز، بازالىق زەينەتاقى كۇنكورىس دەڭگەيىنىڭ 74 پروتسەنتى، 30 جىل – 94 پروتسەنتىن، 33 جانە ودان دا كوپ جىل جۇمىس ءوتىلى بولسا، كۇنكورىس قۇنىنىڭ 100% جوعارى مولشەرىندە بەلگىلەنەدى. ەگەر ءبىر اي ىشىندە مەملەكەتتىك زەينەتاقى جارنالارى بىرنەشە رەت بىرىڭعاي جيناقتاۋشى زەينەتاقى قورىنا جاسالسا، جيناقتاۋشى جۇيەگە قاتىسۋ مەرزىمى ءبىر ايدى قۇرايدى", - دەيدى مينيسترلىك ماماندارى.
وسىلايشا، مىندەتتى زەينەتاقى جارنالارى نەعۇرلىم تۇراقتى جانە تولىق سالىناتىن بولسا، ادام زەينەتاقى جاسىنا جەتكەندە بازالىق زەينەتاقى تولەمدەرىنىڭ مولشەرىن سوعۇرلىم كوپ الادى.
