2020 جىلدان باستاپ الماتى وبلىسىندا «قاراپايىم زاتتار ەكونوميكاسى» سالالارىن دامىتۋ شەڭبەرىندە باسىم جوبالاردى جەڭىلدىكتى نەسيەلەۋ باعدارلاماسى بويىنشا جالپى سوماسى 57,1 ملرد تەڭگەگە 192 جوبا ماقۇلداندى. اگروونەركاسىپتىك كەشەن، تاماق ونەركاسىبى، تۋريزم جانە قىزمەت كورسەتۋ، جەڭىل ونەركاسىپ جانە اعاش وڭدەۋ، ونەركاسىپ، ەلەكتر ەنەرگەتيكاسى جانە باسقا سالالارداعى جوبالار جەڭىلدىكتى نەسيە الدى.
جوبالاردى ىسكە اسىرۋعا مونيتورينگ جۇرگىزۋ جانە سۇيەمەلدەۋ ماقساتىندا «اتامەكەن» كاسىپكەرلەر پالاتاسىنىڭ جانىنان جوبالىق كەڭسە قۇرىلىپ، ونىڭ جۇمىسىنا الماتى وبلىسىنىڭ كاسىپكەرلىك جانە يندۋستريالىق-يننوۆاتسيالىق دامۋ باسقارماسىنىڭ، «دامۋ» كدق فيليالىنىڭ، «اگرارلىق نەسيە كورپوراتسياسى» اق فيليالىنىڭ جانە ەكىنشى دەڭگەيدەگى بانكتەردىڭ وكىلدەرى تارتىلدى.
«جالپى باعدارلاما بويىنشا ءبىز قۇنى 86,2 ملرد تەڭگە بولاتىن 265 جوبادان تۇراتىن جوبالار ءتىزىلىمىن ازىرلەدىك. باعدارلامانىڭ وپەراتورلارى ەكىنشى دەڭگەيلى بانكتەر مەن اگرارلىق نەسيە كورپوراتسياسى بولىپ تابىلادى. بۇگىنگى تاڭدا بانكتەر مەن اگرارلىق نەسيە كورپوراتسياسى تاراپىنان جالپى سوماسى 57,1 ملرد تەڭگەگە 192 جوبا ماقۇلداندى. كاسىپكەرلىك سۋبەكتىلەرى قاراجاتتى ءوندىرىس ورنىن كەڭەيتۋگە، مال مەن تەحنيكانى ساتىپ الۋعا، كوكتەمگى ەگىس جۇمىستارىنا الدى. قازىرگى تاڭدا تاعى 21 جوبا قاراستىرىلۋ ۇستىندە. 38 جوبا بويىنشا قۇجاتتار جينالىپ، بيزنەس-جوسپارلار جاسالۋدا», - دەپ اتاپ ءوتتى الماتى وبلىسى كاسىپكەرلەر پالاتاسىنىڭ ديرەكتورى اسەت شاياحمەتوۆ.
مىسالى، باعدارلاما بويىنشا تالدىقورعان قالاسىنداعى «جۇماعالي» شارۋا قوجالىعى ءداندى (كۇرىشتەن باسقا), بۇرشاق جانە مايلى داقىلداردى وسىرۋگە 75 ملن تەڭگە الدى. تالعار اۋدانىندا كەڭسەلىك جانە ستۋديالىق جيھاز وندىرەتىن «P. T. Z.» جشس زاۋىتى 500 ملن تەڭگەگە قارجىلاندىرىلىپ، بۇگىندە ءوندىرىسىن كەڭەيتۋ مەن ءونىم جيناعىن ۇلكەيتۋدە. باعدارلامانىڭ ارقاسىندا ەڭبەكشىقازاق اۋدانىنداعى «التاير» وندىرىستىك كووپەراتيۆىنە قۇراستىرمالى تەمىربەتون جانە بەتون كونسترۋكتسيالار مەن بۇيىمدار ءوندىرىسىن ىسكە قوسۋ ءۇشىن 135 ملن تەڭگە كولەمىندە جەڭىلدەتىلگەن نەسيە بەرىلدى. كەگەن اۋدانىندا «تاسبۇلاق» جشس 8,8 ملن تەڭگەگە جىلقى ساتىپ الىپ، مال فەرماسىن اشتى.
ەستەرىڭىزگە سالا كەتەيىك، «قاراپايىم زاتتار ەكونوميكاسى» سالالارىن دامىتۋ اياسىندا باسىم جوبالارعا جەڭىلدىكتى نەسيە بەرۋ باعدارلاماسى ەلىمىزدە 2019 جىلى ىسكە قوسىلدى.
